7
Jatianra Quiriat-jearim jonibaon, ja Ibon esé jain iká ani bonanti moa bokana iki, boxonra westíora mató ikain, jain Abinadabnin xobo iketian ja meran niakana iki; japekáora jan bonanti koiranon ixon jawen bake Eleazar Dios iboamakana iki.Samuel Israelbaon koshi iká
2 Ja Quiriat-jearimhainra jain Ibon esé iká ani bonanti rabé chonka baritia iká iki, jainxonra Israel jonibaon jatíxonbi keenshamankin, Ibo benakana iki.
3 Jaskákanketianra jatíbi israelitabo, Samuelnin jato yoia iki: “Akonkin shinanax jatíbi maton shinanyanix Iboki banékinra, maton wetsankonia iresa diosbo jeneti iki, jainoax Astarté dios jisáakin akanaribi maton jeneti iki, Ibokibiribi maton jati jenetaanan, já akonkin rabiti kopí. Jatianra mato filisteobaon iboa iitainbi mato jan xabáati iki”, akin.
4 Israelitabaonra, Baal betan ja dios Astarté jisá akin akanabo moa potakana iki, jaskáxonra Ibobichores moa rabikana iki.
5 Japekáora Samuelnin jato neskáti yoia iki: “Jatíbi Israelbora Mizpánko tsinkíti iki, jainxonra mato kopi en Ibo yokáti iki” akin.
6 Jatianra israelitabo Mizpánko tsinkíkana iki, jainoara onpax bixon, Ibo menikin chikoxonkana iki. Ja netebora noara Iboki yoitimaax ochaa iki ixon, onanmeexon ayunankana iki. Jainoaxa, Samuel moa isralitabaon koshi jikia iki.
7 Jatianra moa filisteobaon onanna iki, israelitabora Mizpánko tsinkikana iki ixon, jainoaxa filisteo joni koshibo jato betan reteanani bokana iki. Israelitabaonra, moa onanxon jatoki rakékin,
8 Samuel neskákana iki: “Noa kopi, non Ibo Dios yokákin jeneyamawe, filisteobaon noa iboa iketian, noa xabáanon ixon”, akin.
9 Jatianra Samuelnin westíora carnero bene bake bixon, Ibo menikin jatiobi keyokin menoxona iki; japekáora Israelbo kopípari jato Ibo yokáxona iki, jatianra Ibon ninkáxon jen aka iki.
10 Jaskáakin Ibo menixon, ja akí Samuel iitaitianra, filisteobobiribi ja israelitabo akí bei, moa ochómaakana iki; jatianra Ibon jatoki ani tirin ika pakéxon jato ratea iki, jaskákanketianra israelitabaon moa jatoaresa iki.
11 Jatianbira israelitabo Mizpánkoniax filisteobo chibani bokana iki, Bet-car tenaman kamanra jato reteboi nokókana iki.
12 Japekáora Samuelnin westíora makan bixon, Mizpá betan Sen naxaran aká iki, jainra janea iki, Eben-ezera akin, ja iki: “Neno kamanra, noa Ibon akinke”, iki iká.
13 Filisteobora moa jatoareskana iká iki, jaskákinra israelitabo moa jakiribi jato mai bichinyamakana iki; ja Samuel japarinontianra, Ibo filisteoboki jakonma iká iki.
14 Ja israelitabaon jemabora, filisteobaon jato bichinna iká iki, Ecrónhainoax Gat kaman, jabora moa Israelbaon biríbakana iki. Jaskáxonra israelitabaon, jaton mai filisteobaon iboa íitainbi moa biríbakana iki, jainoaxa israelitabo, amorreobo betan moa jakon jakana iki.
15 Samuelra jaai kaman Israelbaon koshi iká iki,
16 jainoaxa baritiatíibi kakátiai, Betelhain, Gilgalhain itan Mizpánko, jatíbi ja jemankonia Israelbo jato akinti kopí.
17 Japekáora jain jawen jati iketian Ramáin jakiribi banékatitai, jainxonbira Israelbaon koshi ixon jato ikínkatitai. Jainribira jainxon Ibo yoina menixon menoxonti, westíora makan tsamá aká iká iki.