2 Jawen reken baken janera iká iki Joel, jatian ja rabé itin iká bake iká iki Abías, jabora Beersebain jaton koshi iká iki.

3 Jaskara ikenbira, ja bakebo jaton papa ikai keskati jakon iamakana iki, jatobicho jayátinin kenaibores ikana iki, jato jaweayamanon ixon kopíakana biaibora ikana iki, itan ati keskabiakinra jato ayamakana iki.

4 Jaskara iketianra jatíbi Israel joni koshibo tsinkikana iki, jainoaxa Samuel betan yoyo iki, Ramáin bokana iki,

5 boxonra yoikana iki: “Moa mia yosi ikenbira, min bakebo mia keskati iamakanai, jaskara iketian noa jan ikinti westíora apo noa janexonwe, jatíbi wetsa mainmea jemabo jaskati axeax jakana keskáribiakin”, akin.

6 Westíora apo jan jato ikinti janexonti Samuel yoikanara, jawen keenma iketian Ibo yoia iki;

7 ikaxbira Ibon yoia iki: “Jawe jawéki inonbires, jonibaon mia yokáketian jato axonreswe, miama riki ja mion keenyamakanai, ea riki, ea jaton koshi ixon moa jato ikinyamanon ikax.

8 Ja en jato Egiptonkonia pikonontianbira, ramakamanbi ebé jaskara ikanai, ja mia rama akanai keskáribiakinra, wetsa diosbo rabikin ea jeneyonkana iká iki.

9 Jaskara iken ja yokákana jato axonreswe, ikaxbi jato akonkin yoiwe ja apo jikixon jatíbi jaskara jato betan ati jawékibo”, akin aka iki.

10 Jatianra Samuelnin, ja yokákana jawéki Ibon yoia jato yoia iki.

11 Jato yoia iki: —Neskáakinra ja maton apo ikaitonin, mato ikinti iki: Maton bakebo kenaxonra, jatíribi ja reteananti carron jato imati iki, wetsabora kabáyonin kaai jato imati iki, jatian wetsabora já koiranai itiakinbiribi jato imati iki.

12 Jatíribibora waranka sontárobaon koshi iti, itan pichika chonka sontárobaon koshi itibo jato janenoxiki. Ja mato jatíribibora mai karanbeaibo iti iki, jainoax jatíribibora bimi tsekaibo iti iki, iamax jan reteananti jawéki akaibo, itan ja reteananti carro benxoati xao akaibobiribi iti iki.

13 Jainxonribira maton bake ainbobo, jawen tee anon ixon mato bichinti iki, ininti akai ainbobo iti, yoa akai ainbobo iti, jainoax panhai ainbobo iti.

14 Jainxonra maton jakon maibo, jainoax ja uva waiyabi olivo wai jakonhirabo mato iboakananxon, jabé teetaibo mato meninanti iki.

15 Ja maton bimi beroboyabi uvabora chonkankoniabo westíorabo mato bichinxon, jabé teetaiboyabi, jawen sontárobaon koshibo mato meninanti iki.

16 Jainxonribira maton yonoti benboboyabi ainbobo mato bichinti iki, jaskáribiakinra maton jakonhira waka beneboyabi burrobo bichinxon, jawen tee axonaibobiribi imati iki.

17 Jaskáaribaxonbira maton yoina chité meranoa, chonkankoniabo westíorabo mato iboakananti iki, jainoax matobobira jawen yonotibo iti iki.

18 Ikaxbi jaweatibira non apo imakaskin katóyantana, iki mato ikainbira Ibon mato ninkáxontima iki —akin jato aká iki.

19 Samuelninra jonibaon ninkákanon ixon jato yoia iki, ikaxbira ninkáyamai neskákana iki: —Jara jawemabi iki. Noakayara apoya ikasai, ikires ikana iki,

20 wetsa mainmea jonibo keskáribi, itan koshi jikitaanan noa jan ikinti kopí, jainoax noa reteanantiain ioti kopíribi —ikibores ikana iki.

21 Ja jonibo yoyo iketian ninkata pekáora, Samuelnin, ja joiboribi Ibo yoia iki,

22 jatianra Ibon neskáa iki: —Ja mia yokákanabo ninkáxon, jato westíora apo janexonreswe —akin. Jaskáxonra moa jainoax bekana jemabaon moa botankanon ixon, Samuelnin israelitabo jato yoia iki.