2 westíora jawen benbo bakera iká iki Saúl janeya, ranon itan metsá. Já keska metsára wetsa israelitabo yamaa iki, itan jawen keyakanra jatíbi jato winoa iká iki.

3 Jatian wetsa netera, Cisnin yoina burro awinbo manota iki. Jaskáketianra jawen bake Saúl, Cisnin neskáa iki: —Benxokaatax westíora yonoti betan burro awinbo benai katanwe —akin.

4 Jatian kakinra Saúlnin Efraín manan shitabaina iki, jainxonra Salisa mairibi winobaina iki; ixonbira burro awinbo nokoyamaa iki. Jainxonribira Saalim mai betan Benjamín mai winobaina iki, ixonbira nokoyamaribia iki.

5 Moa Zuf, main nokoti kakinra, Saúlnin jabé kaa yonoti yoia iki: —Moa banénon awé, nokon papara ja burro awinboki akai bebonbires noaakinres shinani inake —akin.

6 Jatianra ja yonotinin yoia iki: —Nato jemanra, westíora profeta jake, jara jatíxonbi jakonhakanai iki, jatíbi jan jaskara iti yoiabora, winóyamai ikai. Jawe keská ixonra jan kati bai jan noa yoiti iki —akin.

7 Jatianra Saúlnin aká iki: —Jaskara iken kanonkawé. Ikaxbi, ¿Jaweki ja joni non boxonti iki? Non pishabaonra, moa jawe panbi yamake. Noara jawebioma iki ja profeta meniti —akin.

8 Jatianra ja yonotinin kopikin yoia iki: —Eara westíora plata koríki maxkoshokoya iki. Ja meninon kawé, ja profetanin jan kati bai noa yoiti kopí —akin aká iki.

9 Jatian (Moatianra israelitabo jawéki onanoxon Dios yokati boí ikátikanai neskati: “Ja oinxon onanmispari oinnon bakanwe”, iki. Ja rama “profeta”, akin akanaira, moatian akátikanai, “oinxon onanmis”, akin janekin).

10 Jatian moa jen axonra Saúlnin yoia iki: —Kawé jain kanón —akin. Jatianra rabéxonbi, ja profeta jain iká jema pontebainkana iki,

11 ja ketó mapétiain ja jema pontebainkinra, jaweti xontako onpax bii beaibo bechixon, jato yokákana iki: —¿Nenoki ja onanmis non nokoti atipana? —akin.

12 Ja xontakobaonra yoia iki: —Neno riki, ikaxbira orichaa iki. Ishton kaxon ointankanwe, ramara nato jeman joke, ramara maxko xobonkoxon Dios yoina menoxonai.

13 Jain nokóxon, ja Dios rabiti carpa xobonko pii kaamatianbi benakanwe. Já nokotamapari iketianra jonibaon piamapariai, janra ja menoti menikana yoinabo jakonhakin shinanxonti jake, ja aká pekáoparira ja chania beabaon pikanti iki. Jaskara iketian moa botankawe, ramabira maton nokoti iki —akin.

14 Jabora ja jemanko kaai kakáreskana iki. Ja jemanko nokókanaitianbira, Samuelbiribi Dios rabiti carpa xoboori kaa iki.

15 Saúl nokóti westíora nete maxkáketianra, Ibon Samuelki pikóxon yoia iki:

16 “Bakish nato horaribira, Benjamínman mainmea westíora joni en miiba raanti iki, jara nokona inon ixon min ea imati iki, koshi jikitaanan nokon Israel jonibo jato ikinnon ixon. Janra ja filisteobaon iboa íitainbi jato xabáati iki, ea yokákanketianra nokon jonibo iketian en jato noibaa iki”, akin.

17 Jatian Samuelnin, ja Saúl oinketianra Ibon yoia iki: “Já riki ja joni, já yoikin en mia ayantana. Natonra nokon jonibo koshi jikixon jato ikinti iki”, akin.

18 Jatian moa jeman jikii kakinra, ochómakainxon Saúlnin, ja Samuel neskáa iki: —Minpari ea yoipanankan, jaweranorin ja onanmiston xobo —akin.

19 Jatianra Samuelnin aká iki: —Ea riki ja oinxon onanmis. Min rama ebé pinonpari Dios rabiti carpa xobonko mapéwe. Bakish yamékirishokora jatíbi ja ea min yokatabo en mia yoiti iki, japekáora en mia raanti iki.

20 Ja burro awinbo min manómaara moa kimisha nete iki, ayorakin shinanyamawe moara nokokanke. Jainoax jatíbi ja Israel jonibo jan keenai jawékibora, mina itan jatíbi min rarebobaona iti iki —akin.

21 Jatian Saúlnin yoia iki: —¡Ikaxbi ea riki ja Benjamínman rarebo joni, ja bebon ichama Israel jonibo! Jainoaxibi ja Benjamínman jonibo xaranra, ja ebé iká nokon rarebobo kikinmashokobobi iki. Jatian ¿Jaweatiki jatíbi jaskarabo min ea yoiai? —akin.

22 Jatianra Samuelnin, jawen yonoti betanbi Saúl bixon westíora chiteain jato boá iki, jaskáaxonra jain ikábo kimisha chonka joni xaranbi boxon, jakonshamain jato yakámaa iki.

23 Japekáora Samuelnin ja yoá akai joni yoia iki: —Ja en mia nami metex menikin, oke janbiribi awé akin aibata, bewé —akin.

24 Jatianbira ja yoá akai jonin, kishi jatiobi pikobeiranxon ja Saúl pinon ixon menia iki. Jainxonra Samuelnin yoia iki: —Ja riki minabiribi iti en mia benxoaxona. Bixon piwé, jara en miabiribi axona iki, nato jonibo betan senen min rama pinon ixon —akin. Jaskáxonra ja netebaon Saúlnin, Samuel betan piá iki.

25 Jatian Dios rabiti xobonkoniax jemanko ipakexonra, xobo bochiki Saúl jain oxati benxoaxona iki,

26 jatianra Saúl jain oxaa iki. Jatian moa nete xabáketianra, Samuelnin ja xobo bochikia Saúl kenaxon yoia iki: —Wenitax mia kainko moa katanwe —akin. Jatianra Saúl wenita iki. Japekáora Saúl betanbi Samuel callen pikota iki,

27 jatian moa jemankoniax ipakekinra, Samuelnin, Saúl yoia iki: —Ja min yonoti moa rekenkainon ixon ranwe, jainoax miapari shokores banéwe, ea Diossen yoiabora en mia yoiti jake —akin.