Samuelnin Israelbaon apo iti Saúl imaa
10
Jatianra Samuelnin westíora xeni pomo bia iki, jainxonra Saúlnin maponko chikokin bexéxon yoia iki: —Ramara Israel jonibaon koshi inon ixon Ibon, onantiakin mia imai. Miara jaton koshi ixon jaton rawiboibakea min jato xabáati iki. Jatian natora iti iki, Ibon jawen jonibo ikinti mia koshi imaa jaskáaxon onanti:2 Rama eibakeax kakinra, Raquel miinmeta patax, Selsain Benjamínman mainmea min rabé joni nokoti iki. Jabaonra ja min benai iitai burro awinbo moa nokokana mia yoiti iki. Jainxon min papan moa jabo shinanyamakin, matores shinani, jawekeskáaxonmein en nokon bake nokotiki, iki janbix yokakaatairibira mato yoikanti iki.
3 Ja mia orichashoko kaax Tabor jiwinko nokóketianra, kimisha jonin Betelhain Dios rabii kakin mia nokoti iki. Westíoratoninra kimisha cabra bake beneshoko boti iti iki, ja wetsanra kimisha pan boti iki, jainoax ja kimisha ikátonin boaira; westíora bichi chomon uva xeati iti iki.
4 Mia jowé ataanan jabaon rabé pan meniara, min jato bixonti iki.
5 Japekáora mia Diossen jema Gabaain nokóti iki, jainra filisteo sontárobaon xobo iki. Ja jeman jikikinra westíora tsamá profetabo, rama iti joi biaibo min jato nokoti iki, Dios rabiti xobonkoniax ipakekanaitian. Jato bebonra jonibo kati iki, panderobo, quenabo, arpabora aabainkanti iki.
6 Jatianra Ibon shinan miki joxon mia iboati iki, jato ikai keskatiribira rama iti joi bii mia iti iki, jatianra wetsa jonibiribi mia iti iki.
7 Moa jaskara jawékibo iketianra, mia Diossen akinna, mia keenai jawékibo moa min ati iki.
8 Jaskara iketian Gilgalhain, miapari rekenkaintanwe, jainra ea miibetan tsinkiti iki, yoinabora non Dios jatiobi keyokin menoxonti iki, jakopi jakonnax raeanantira yoina non meniti iki. Ea nokotai kaman kanchis nete jainxon ea manawe, jatianra jaskara min atibo en mia yoiti iki —akin.
9 Jatianra Saúl, moa Samuelhibakeax kaai ishtona iki, ja Diossen jawen shinan moa wetsaresibi imaara; ja netebi jaskara iti yoia jawékibo moa jatíbi senenna iki.
10 Jatianra Saúl jawen yonoti betan Gabaain nokóxon, westíora tsamá profetabo rama iti joi biaibo jato nokoa iki. Jatianra ja Diossen shinan Saúl meran jikia iki, jaskáketianra ja wetsabo iká keskatiribi, rama iti joibo bii jato betan jain iká iki.
11 Ikaxbi jatíbi jabaon moabi onanabora, profetabo betan rama iti joi bikanai oinnax, yoianankana iki: “¿Cisnin bakeki jawe winota? ¿Saúlribiki profeta iki?” ikibo
12 Jatianra westíora jain ikátonin tekikin yoia iki: “¿Jatian tsoarin jaton papa?” akin. Jaskara yoiira ikanai: “¿Saúlki profetaribi iki?” iki.
13 Rama iti joi bia pekáora, Saúl jawen xobonko kaa iki.
14 Jainxonra jawen epán Saúl, jawen yonoti betanbi yokata iki: —¿Jaweranoki mato katana? —akin. Jatian Saúlnin yoia iki: —Burro awinbo benaira noa katanke, ikaxbi merayamaxa, noa Samuel oinni katanke —akin.
15 Jatianra Saúlnin epán jato neskáa iki: —Eapari yoikanta, ¿Matoki Samuelnin jawekeska yoia? —akin.
16 Jatianra Saúlnin jawen epa yoia iki: —Noara jan onantishamanhakin yoike, moa burro awinbo nokokana riki —akin. Ikaxbira Saúlnin, já apo iti Samuelnin yoia joi, jawen epa jawebi yoiamaa iki.
17 Japekáora Samuelnin, Mizpánkoxon Ibo rabikanon ixon, israelitabo jato kenaa iki;
18 jainxonra jato yoia iki: —Israelbaon Ibo Diossa neskatai: ‘Mato israelitabora ja Egipto jonibaon iboa ikenbi jainoa en mato pikoa iki, itan jatíbiainoa koshibaon mato masá tenemainkoniabo en mato xabáa iki’.
19 Ikaxbi ramara, ja atikonmainoa itan masá tenetiainoa mato jan xabaa Dios, maton iresabires shinanai, jaskákinra jan mato ikinti apo yokáxon maton omisa iki. Jaskara iketian, ja jonibobires itan ja rarebobires mato Ibo bebon joti jake —akin.
20 Japekaobira Samuelnin, jatíbi Israel ja jonibobires bekanon ixon jato yoia iki, jainoa katotara Benjamínman joniboki suerte paketa iki.
21 Jainxonra Benjamín jonibo ochóma joti jato yoia iki, jainoa suerte akanara Matrednin rareboki paketa iki, ja rareboainoa suerte akanara Cisnin bake Saúlki paketa iki. Jatianra benakinbi nokoyamakana iki,
22 jatianra Ibo yokáribikana iki; Saúlki jain ikaxbi iká iki ixon onanti kopí. Jatian Ibon jato yoia iki, jainbira Saúl joneta ike, jawéki tsamata meran, akin.
23 Jatianra jonetainkonia pikoi boí ishtokana iki. Jatian jonibo bebon Saúl iketian oinkanara, tsoa israelitabi jawen keyá betan senenma ikax, jawen mapo pikotina iká iki.
24 Jainxonra Samuelnin jatíbi jato yokata iki: —¿Moaki ja apo iti Ibon katota maton oinna? ¡Westíora israelitabira já keska yamake! —akin. Jatianra, ¡Apo jabánon! akin israelitabaon aká iki.
25 Jatianbira Samuelnin ja apo ixon ati esébo jato yoia iki, jainxonra westíora kirikanin wishaxon, Ibo rabiti carpa xobonko benxoa iki. Japekáora Samuelnin, moa jaton xobónko jatíbi botankanon ixon, jato yoia iki.
26 Saúlribira jawen xobónko moa Gabaain kaa iki, jatian Diossenbi keenmaara ja chibani, ichabires koshi shinanya jonibo jabé bokana iki.
27 Ikaxbira ja jakonmai yoyo ikaibo maxkáyamai, neskákana iki: “¿Natomeinki noa jan xabaati?” ikibo. Ja iti jisáma iketianra, jaon keenyamakana iki; ikaxbi ja Saúlra onanaxbi onanyamaa keská iká iki.