2 Jatianra ja amonita Nahasnin jato yoia iki: —Ja senenhabekonti joi en mato betan atira jakon iki, ikaxbi maton mekayaokea berobo en tsekanantinin kennira mato jeen iti iki, en jaskáara jatíbi israelitabo rabinkanti iki —akin.

3 Jatianra Jabessainoa yosibaon yoia iki: —Kanchis netepari noa manawe, jatíbiain israelitabaon mainko joi botankanon ixonpari non jato raanbanon; jatian tsoabi noa akini joyamaketianra, noa miibetan iti iki —akin.

4 Ja joi boai jonibora, Gabaain nokókana iki, jain Saúl jakátiainko, jatianra ja bokana joi jonibo yoikana iki. Jatikaxbira onisi ikonbiresi winikana iki.

5 Jatianra Saúlnin wainkoniax waka beneboya baneti joxon, jato yokata iki: —¿Jaweki jonibo winota? ¿Jawekopíki winikanai? —akin. Jatianra jonibaon Jabessainoara neskara joi bekanke ixon yoikana iki.

6 Jaskara joi ninkákenbira, ja Saúl Diossen shinanman iboa iki; jainoaxa ikonbiresi Saúl sinata iki.

7 Jatianra rabé waka bene bixon, Saúlnin xatepakea iki; jainxonra ja joi boaibo betan jatíbiain israelitabaon main ja waka pakexbo jato bomaa iki. Jatianra ja joi boaibaon jato yoia iki: “Saúl betan Samuel chibankashamai jabé rabéyamaibaon wakabora neskáshamanribiakanti iki”, akin. Jatianra jonibo ikonbiresi rakékana iki, jaskataxa biananax jainbicho tsamakana iki.

8 Jatian jaskáakin Saúlnin jawen jonibo Beze ikain tsinkiara, kimisha pacha waranka Israel jonibo iká iki, jainoax Judáinoa jonibora kimisha chonka waranka tsinkita iki.

9 Japekáora, ja joi botanabo nokóketian jato neskáakin yoia iki: —Jabessainoa jonibo jato yoikanwe, bakish bariapanra non jato xabáin pikoai —akin. Jatianra ja joi boaibo boxon, Jabessainoa jonibo jaskáakin yoikana ikonbiresi rarokana iki,

10 jainxonra amonitabo yoikana iki: —Bakish netera noa miki menikaatai, min oinna jakon iketian jaskara min noa anon ikax —akin.

11 Ja nete xabáketianra, Saúlnin jawen sontárobo kimisha tsamá imaa iki, jainxonra nete xabatamatianbi, jaton rawibo tsamata napo jikixon, bariapanai kaman amonitabo jato retekana iki. Ja jiria banetabora jatíbiain janbiskana iki, ikaxbi tsoabira rabébo boyamakana iki.

12 Japekáora ja jemamea jaweti jonixon Samuel neskáakana iki: —¿Tsoabaonki, ja Saúlra non apo itima iki ixon, ikonhayamaibo iki? Ja jonibora non retenon ixon, min noa meniti iki —akin.

13 Ikaxbira, Saúlnin jato yoia iki: —Ibonbira rama Israelbo jato xabaake, jaskara ikaxa rama nete tsoabi mawátima iki —akin.

14 Jatianra Samuelnin jatíbi jato yoia iki: —Gilgalhain bonon bokanwe, jainxonra ja apo ikátonin noa ikinkin onantiakin peoti iki —akin.

15 Jaskáketianra, jatíbi jonibo Gilgalhain bokana iki, jainxonra Saúl Ibo bebonbi apo jikimakana iki. Japekáora Ibo betan raeanannoxon yoinabo menikana iki, jainoax Saúl itan jatíbi israelitabora ikonbiresi rarokana iki.