2 Nato riki ja apo jan mato ikinti. Eara moa yosi iki, eara boxbires iki, nokon bakebora mato betan iki. Eara iká iki bake ranontianbi peoxon rama kamanbi jan mato ikinna,

3 jaskara ikaxa ea neno iki: Jaton waka bene iamax jaton burro en bichina iketian, iamax yatanxon yonokin, masá tenemaxon en jato jakonmaa iken, itan jato jaweayamanon ixon ea kopiákana iketianbo, Ibo bebonxon itan janbi katota apo bebonxon en jakonma aká maton ea yoixonti iki, jatianra jatíbi ribinabo en kopiáti iki —akin.

4 Jatianra jabaon aká iki: —Jawetianbira yatanxon yonokin min noa masá tenemama iki, jawe jakonmabira min noa akáma iki, jawetianbira noa jaweayamanon ixon non mia kopíama iki —akin.

5 Jatianra Samuelnin jato yoiribia iki: —Ibo itan jan katota aponra onanke, ea jan yointi en jakonma aká maton nokoyamaa —akin. Jatian ikana iki: —Jaskara riki —iki.

6 Jaskáaribaxonbira Samuelnin jato yoia iki: —Ibonbi amaara maton rekenbo Moisés betan Aarónman Egiptonkonia jato pikoa iká iki.

7 Jaskara iketian benxokakanwe, Ibo bebonxonra mato betan en joi benxoati jake, mato betan itan maton rekenbo betan jatíbi jakon jawéki jan akábora en yoiti jake.

8 Jatian Jacob jawen bakeboya, Egiptonko bokannontianra egipciobaon, akonbireskin yonokin jato masá tenemakana iki, jainoaxa maton rekenbo Ibo akí noa akinwe iki ikana iki, jatianra Ibon, Moisés betan Aarón Egiptonko raana iki, jabaonra maton rekenbo jainoa pikoxon, jato neno imaa iki.

9 Ikaxbira israelitabo jaton Ibo Diossen shinanbenokana iki, jaskáketianra jan Hazorhainoa apo Jabínman, sontárobaon koshi Sísarana iti jato menia iki, jainoax filisteobaona iti, itan Moabhainoa apona iti, ikaxbi jabora jato betan reteanana iki.

10 Ikaxbira jaskata pekáopari, ja dios Baal betan dios Astarté jisáakin akanabo rabinoxon Ibo jeneax jaki ochaabo yoii noa ikona riki iki ikana iki, jaskáxonra jaton rawibaon iboa ikenbi jato xabáanon ixon yokákana iki, jaskáxonra ramara miabichores non rabiti iki, akin Ibo yoikana iki.

11 Jatianra, Ibon Jerobaal, Barac, Jefté jainoax ea Samuel, maton rawiboibakea xabánon ixon, mato raanxona iki. Jaskatiresa mato jakon jake.

12 Ikaxbi amonitabaon apo Nahas, mato keyoi joaitian oinxonra, jan mato ikinti westíora apo maton ea yokata iki, ja Ibo Dioskaya maton apo ikenbi.

13 Ikaxbi neno riki ja maton apo iti katota. Ja riki maton yokáketian, Diossen mato menia.

14 Ramara ja Ibo maton kikin shinanxon ja maton rabiti iki, jainxonra ja senenhati eséboki yoitimayamakin maton ninkáxonti iki, jaskatax jan mato ikinai apo betanbi, ja maton Ibo Dios keenai keskáres akí mato jati iki. Jaskataxesa mato jakonbires kati iki.

15 Ikaxbi yoiti ixonyamakin, jawen esébo biamakin maton omisketianra, mato itan maton apo betanbi mato masá tenemati iki.

16 Jaskara iketian ja mato ikainoaxbopari wetsanko boyamakanwe, Ibon ja ani rateti jawéki akaitian matonbi oinnon.

17 Rama riki trigo tsekatitian ikax, oi beyamai, ¿Ikonmarin? Ikaxbi en Ibo yokáketianra, tirin imaananbi ea oi bemaxonti iki, jatianparira ninkáxon maton onanti iki, ja Ibon oinna maton westíora apo yokáxon kikinbires jakonma jawéki aká —akin.

18 Jaskátaananra Samuelnin Ibo yokata iki, jatianbira tirin imaananbi oi bemaa iki; jainoaxa jatíbi jonibo Iboki itan Samuelki ikonbiresi rakékana iki.

19 Jaskákinra Samuel jatíxonbi neskáakana iki: —Nato min yonotibo kopí min Ibo noa yoixonwe, noa mawámayamanon ixon; nonbira ja westíora apo imakaskin yokáxon, non ochabo kaiayona iki —akin.

20 Jatianra Samuelnin jato yoia iki: —Rakéyamakanwe. Ikon riki maton kikin jakonma aká; ikaxbi Iboibakeaxkaya rama ochóyamakanwe, jaskáyamakinkaya jatíbi maton shinanyaxonbi rabikanwe.

21 Ja ikonma diosbo chibanyamakanwe, matora akinti atipanyamake, ikonma ixonra jakonmainoa mato tsekati atipanyamake.

22 Ikon jakon Ibo ixonra, mato potatima iki; mato jawen jonibo itinra já keenai.

23 Mato kopi yokákin jeneax ochanaketian ea Ibon koiranbanon. Jaskáyamakinra jakon itan Ibo keenai keskati jati en mato axeati iki.

24 Ibora maton yoiti ixonti iki, akonkin shinanxonra jatíbi maton jointiaxonbi maton rabiti iki, ichabires jan mato akinabora maton shinanti iki.

25 Ikaxbi jakonma akin maton jeneyamaitianra, maton apo betanbi mato keyoti iki —akin.