2 kimisha waranka israelita sontárobo katota iki. Micmas ikain Betel mananmanra rabé waranka sontáro jabé baneta iki, jainoax wetsa waranka sontárora Jonatán betan Benjamínhainoa Gabaain baneta iki. Ja texea jonibora, moa jaton xobonko botankanon ixon, Saúlnin jato yoia iki.

3 Jonatánmanra, Gabaain iká jaton xobonkonia filisteo sontárobo jato keyoa iki, jatian jara filisteobaon nikákana iki. Jatianra jaskara winota israelitabaon onankanon ixon, jatíbiainxon trompeta xoon akanon ixon Saúlnin jato yoia iki.

4 Jatíbi israelitabaonra Saúlnin, filisteo sontárobo jaton itinkonia moa keyoa ninkakana iki, jakopíra filisteobaon, israelitabo omisa iki, jaskara ikenra israelita sontárobo Gilgalhain Saúl betan tsinkikana iki.

5 Jatianribira filisteobo, israelitabo betan reteanani bonox tsinkikana iki. Irákana iki, kimisha chonka waranka reteananti carroya, sokota waranka kabáyonin ikai sontarobo, jainoax ja aniparo kexakea mashitii kikinshaman icha sontaroboya. Japekáora, Micmas ikain bokana iki, jainparira ikana iki, Bet-avénhainoax, bari pikotaiori.

6 Israelitabora jakonmabires atikomanko ikax, filisteobaon jato aká kini meranbo, itan chawá xankenhainbo jonékana iki, shanka xaranbo, mai chaká meranbo, jainoax pozo jeneoma meranbora jonékana iki.

7 Ichaxonra, Jordán shitax, Gad itan Galaad maiori bokana iki; ikaxbi Saúlra Gilgalhainbipari baneta iki, jatianra jatíbi jawen sontárobaon kikinbiresi rakeananbi chibankana iki.

8 Jainxonra Saúlnin, kanchis nete senen, jan jatio basi manati yoia keskáakin Samuel manaa iki; ikaxbira Samuel Gilgalhain nokóyamaa iki, itan joniboribi moa boi peokoota iki.

9 Jatianra Saúlnin jato yoia iki: —Jatiobi keyokin Ibo menoxonti yoinabo ea bexonkanwe, itan jabé raenoxon ja meniti yoinaboribi bekanwe —akin. Jatianra janbi menikin yoina keyokin menoa iki.

10 Saúlnin ja yoina menikin senenhai betanribi Samuel nokóketianra Saúlnin ja bechii pikóxon jowé aka iki,

11 ikaxbira Samuelnin yoia iki: —¿Jaweati min ja jawékibo min akárin? —akin aká iki. Jatianra Saúlnin yoia iki: —Moa jonibo boí peokootaitian oinxon, en aká riki, itan ja min yoia nete moa mia nokóyamaketian, jainoax filisteoboribi Micmas ikain tsinkita iketian,

12 ea Iboki menikaatamatianbira ipakebeiranxon Gilgalhainoa ea akanti en shinanna iki; jaskara ikenra enbi yoina jatiobi keyokin menoxonti iká iki —akin.

13 Samuelninra yoia iki: —¡Ja min aká jawékira, min aresbiresa iki! Ja Ibon yoia keskáakin ninkáxon min aketianra, ja Israelhain jatíbitian akonkin apo mia jan imakeana iki.

14 Ikaxbi ramara mia jatíbitian apo itima iki. Ibonra jawen keenshaman joni westíora benati iki, jaskáxonra jawen jemamea koshi iti janeti iki, minra jan ati yoiabo ninkáxonyamaa iki —akin.

15 Jatianbira Samuel moa Gilgalhainoax kaai, tekikaina iki. Ja texea sontárobora reteanantiain Saúl chibani bokana iki, ja Gilgalhainoax boaxa Benjamínhain iká jema Gabaain nokókana iki. Jainxon Saúlnin jabé boa sontárobo toponara, sokota pacha iká iki.

16 Saúlra jawen bake Jonatán betan, jainoax jato betan boai sontároboya, Benjamínhain iká Gabaa jemanko banékana iki, jatianra filisteoboribi Micmasain ikana iki,

17 kimisha tsamá reteananai filisteo sontárobo jaton ikainoax pikotaxbira; westíora tsamá Ofraori bokana iki, jara Sual main iká iki,

18 wetsa tsamára Bet-horón jemaori kaa iki, jainoax ja kimisha itin iká tsamára, Zeboím teshanpa iká mananhon mai matoori tsoa jonibi jain jaama maiori bokana iki.

19 Jatíbiain Israelbaon mainra, westíora jonibi yamin teetai yamaa iki, jaskákinra filisteobaon shinanna iki, jaskara ixonra hebreo jonibaon espadabo, yami kenshobi jan chachimistibo akantima iki ixon.

20 Jatíbi israelitabora filisteoboiba kati iká iki, jaton mai karanbetibo kenshoi, jaton lampabo kenshoi, jaton yamibo kenshoi, itan jaton picobo kenshoi.

21 Ja mai karanbeti betan lampa kenshotira icha kopíaxonbo ati iká iki, jainoax yamibo betan ja yami taxo kenshobo ramíketian benxoatira, icha kopíribi ikaxbi namantanibo iká iki.

22 Ja reteanankanai netera, Saúl itan Jonatán betan boaibo tsoabi espada betan lanzaoma iká iki. Saúl betan Jonatánbichora jayá iká iki.

23 Jaskakanai kamanra, westíora tsamá filisteo sontárobo, Micmas ochómashoko nokókana iki.