2 westíora mai mató pasenenain granado jiwi naman jainxon trigo xemekanainko tsamákana iká iki, jabetan iká sontarobora sokota pacha joni iká iki.

3 Janbiribi iresama tari boti imakanara Ahías iká iki, Ahitobnin bake, Icabodnin noxa, ja Icabodra Fineesnin bake iká iki, Silonkonia sacerdote Elikan baba. Jonatán moa jainoax kaara jonibaon onanyamaa iki.

4 Ja kamanra, Jonatán filisteobo tsamatainko nokókasa iki. Jan katira rabé ani shanka oken ibékona naxaran kati iká iki, jawen janera Boses itan Sene iká iki,

5 westíorara norteori Micmas bekeiba iká iki, jainoax wetsabiribira surkiri Gabaa jema bekeiba iká iki.

6 Jatianra Jonatánman jan akinnai joni yoia iki: —Kawé, keiba kanon, ja ikon Dios ikonhaismabo tsamákanainko kaman. Non Ibon noa jawe axontitian riki, icha joniaxon iamax ichama joniaxon non jatoaresnon ixon jan noa akintira jawena jawebi atikoma yamake —akin.

7 —Jatíbi ja min shinanabo areswe, enra ja min akasaibo mia akinti jawemabi iki —akinra ja akinaitonin aká iki.

8 Jatianra Jonatánman yoia iki: —Oinwe, abákanon noa merareskin, oa jonibo ikainko moa oke shitánon kawé.

9 Mato ikain noa ipakei kabánon jainxonbi noa manakanwe akin noa akanara, noa jainbi iti iki, jatianra jato ikain noa mapétima iki.

10 Ikaxbi mapéwe akin noa akanara, noa kati iki, jara iti iki jakopi non onanti, Ibon akinnara non akai jatoareskin, iki noa iti —akin.

11 Jaskáxonra, ja filisteo tsamatabaon oinnon ixon ja rabékan jato meramaa iki. Jatianra jabo, jato oinnax neskákana iki: “Oinkanwe, ja kini meran joneta iká israelitabora moa jokonai”, iki.

12 Jatianbira Jonatán betan jan akinnai joni akí, saí ikana iki: —¡Nato noa ikain mapékanwe, westíora jawéki non mato yoinon! —iki. Jatianra Jonatánman ja akinnai joni yoia iki: —Ea chibanwe, Ibonra israelitabaon mekenman moa jato imai —akin.

13 Jonatánra mapeti kaai tae betan mekenman wemeinata iki, ja akinnai jonira já pekáo kaa iki. Jonatánman filisteobo betan reteanankin jato maiki potaabora ja akinnai jonin namepakea iki.

14 Ja rekeni reteanankinra, Jonatán itan ja akinnai jonin ochókainamabi rabé chonka joni retea iki.

15 Jatíbi ja carpa peota meran ikábo itan ja jeman ikábora ikonbiresi rakékana iki. Ja ichama tsamá sontárobo itan ja reteananai tsamáboribira ikonbiresi rakékana iki. Jatianribira mai ninwana iki, jaskáketianra ikonbiresi anii ratékana iki.

16 Ja Saúlnin, jan jato koiranti imaa sontárobaon, Benjamínhain iká Gabaa jemankoxon oinkanara filisteo jonibo jabati boí janbisbaini wetsaoribiresbo bokana iki.

17 Jatianra jabé boai sontárobo Saúlnin yoia iki: —Nobé ikáboki tsoa maxkata non onannon jaton jane kenakanwe —akin. Ja jane kenakin oinkanara, Jonatán betan jan akinnai joni yama iká iki.

18 Ja nete Ibon esé jain iká ani bonanti israelitaboiba iketianra, Saúlnin Ahías yoia iki: —Neri ja Diossen esé jain iká ani bonanti bewé —akin.

19 Ikaxbi Saúl sacerdote betan yoyo ikai kamanra, ja carpa peotainko tsamata filisteobaon shinan onantimati bebonkaresa iki. Jatianra Saúlnin sacerdote yoia iki: —Moa Diossen esé jain iká ani bonanti neri beyamawe —akin.

20 Jatianbira Saúl itan jatíbi jawen sontárobo tsinkitax, moa reteanani bokana iki. Ikonbiresi jaton shinan onantimatax, filisteobo jatonbinix reteanani keyókana iki.

21 Jainoaxa, moatianbi filisteobo betan iká israelitabo, jaton sontárobo reteanantiain akini pikotaxbi, Saúl betan Jonatán akinnai israelitabo tsamataori winókana iki.

22 Jatian ja Efraín mananman joneti boyantana israelitabaonra, filisteobo jabati bokanaitian onanax, jato chibani boax jato betan reteanankana iki.

23 Jaskati reteananboi boaxa, Bet-avén kaman nokókana iki, jaskáxonra Ibon Israelbo jatian jato xabáa iki.

24 Jaskara ikaxa, ja nete jawebi piama ikax israelitabo ikonbiresi paxkinkana iki, Saúlninra akonkin senehanoxon neskara yoia iki: “Ja yametamatianbi, itan ja nokon rawibo en jato kopitamatianbi piábora moa jakonma iti iki”, akin.

25 Jatianra sontárobo, jain mainbi mishkin tsamata nii ikainko nokókana iki.

26 Ja jonibo nii meran jikixon oinkanara onpax ikai keskati mishkin baita iki; ikaxbira tsonbi ja akonkin senenhati joiki rakékin tanayamakana iki.

27 Ikaxbi Jonatánmanra, jawen papan jaskara atima akonkin senenhakanti jawen sontárobo yoiaitian ninkatama iká iki, jaskákinra jawen kekoti beai rebon, bonan naa chachia jain mishkín seróketian kokoax, jatianbi jawen shinan jakiribi koshiinakaina iki.

28 Jatianra westíora israelita sontaronin yoia iki: —Min papanra akonkin senenhanoxon noa sontárobo yoia iki, jaweratobaonki wetsa jawékibires piai, jabora moa jakonma iti iki, ixon. Jaskara kopíra jonibo ikonbiresi paxkinabo iki —akin aká iki.

29 Jainxonra Jonatánman yoia iki: —Jaskáxonra nokon papan icha joni jato jakonma imake. Oinwe, eara nato ichamashoko mishkin tanax jatianbi koshiinakainke,

30 jainoax ja non rawibo piti bichinabo piaxkayara, noa bebon jakonhira ikeanke. ¡Jatianra ja filisteobo non jatoaresa, ani jawéki nona ikeanke! —akin aká iki.

31 Ja netera, israelitabaon filisteobo reteanankin jatoareskana iki, Micmas ikainxon peoxonra, jato Ajalón kaman akana iki. Ikaxbi israelita sontarobora, moa ikonbiresi paxkinkanabo iká iki,

32 jaskákinra ja senentiainbi jaton rawí bichina yoinabo, carnerobo, waka awinbo, waka bene bakebo, mainbi rakantaanan texteanan jatíbi jimiabi pikana iki.

33 Ikaxbi jatíribibaonra, boxon Saúl yoikana iki: —Jonibora nami jimiabi pii, Iboki ochai ikanai —akin. Jatianra Saúlnin yoia iki: —¡Matora jakonhamisimabi jakonhamis keskábo iki! Westíora ani makan taranbekin, ea neno bexonkanwe.

34 Jainoaxribi jonibo betan yoyo ikanwe, westíorabaon jaton waka bene iamaxon jaton carnero ea neno bexonkanon, maton textexon pinon, jatianra jimioma nami pii mato Iboki ochatima iki —akin. Ja yamébira westíorabaon, jatonbi jaton waka bene boxon, jainxon textekana iki.

35 Saúlninra, janbiribi, Ibo Dios axonkin jainxon yoina menoti makan tsamana iki, japari menikin akára iká iki.

36 Japekáora Saúlnin neskara ati shinanna iki: —Nato yamé filisteobo chibani tenaman bonon bokanwe, jato keyokin retexon, neteai kaman jatíbi jaton jawéki binon bokanwe —akin. Jatianra jatíxonbi yoikana iki: —Min oinna jakon iketian, jaskara awé —akin. Ikaxbira sacerdotenin yoia iki: —Jawe akamatianbira, Diospari non yokáti jake —akin.

37 Jatianra Saúlnin Ibo yokata iki: —¿Enki filisteobo chibanti iki? ¿Israelitabaonki, jatoaresti iki? —akin. Ikaxbi ja netera Ibon jawebi jato yoiamaa iki.

38 Jaskara iketianra Saúlnin yoia iki: —Jatíbi sontárobaon koshibo neri bekanwe, jainxon oinkanwe, tsonki rama nato ocha aká iki ixon.

39 ¡Akonkin senenhanoxonra Israelbaon Ibon janenko en yoiai, nokon bake Jonatán inonbira, mawáti iki! —akin. Jatianra sontárobaon jawebi yoiamaa iki;

40 jakopira Saúlnin jatíbi israelitabo jato yoia iki: —Mato neke tsamákanwe, jatian oke wetsa tsamaori nokon bake Jonatán betan ea ibanon —akin. Jatianra sontárobaon yoia iki: —Min oinna jakon iketian jaskara awé —akin.

41 Jatianra Saúl saí ika iki: —Israelbaon Ibo Diossé, ¿Jawekopíki rama ja min tee axonai joni jawebi min yoiamaa? En jakonma aká iketian, iamax nokon bake Jonatánman jakonma aká ikaxa, suerte akana (Urim) makanshoko onanti pikóti iki. Ikaxbi ja min joni Israelbaon jakonma aká ikaxa, suerte akana (Tumin) makanshoko onanti pikóti iki —akin. Ja suerte akanara Jonatán betan Saúlki paketa iki, jatianra ja jonibo jakonma akáma ikax moa xabakaakana.

42 Japekáora Saúlnin yoia iki: —Nokon bake Jonatánki, itan eki suerte akanwe —akin. Jatianra suerte akana Jonatánki paketa iki,

43 jaskáketianra Saúlnin Jonatán yoia iki: —Ja min aká ea keshanwe —akin. Jatianra Jonatán keshaa iki: —Ikon riki, nokon kekoti rebonra bona mishkin tii axon, ichamashoko en tanaa iki. Ikaxbi eara neno iki, ea mawátira jawemabi iki —iki.

44 Jatianra Saúl saí ika iki: —¡Jonatán, mia mawáyamaketian ea abanon Diossen akonbireskin masá tenemakin! —iki.

45 Ikaxbira jonibaon Saúl yoia iki: —¡Jawekopíki Jonatán mawáti iki, jatoaresxon akonbireskin Israelbo akinnaxbi! ¡Jaskarara itima iki! ¡Ibo jaketianra, westíora boobi jawen maponkoniax pakétima iki! Ja rama akára, Diossen akinna aká iki —akin. Jaskáaxonra Jonatán mawáti ikenbi, jonibaon imayamaa iki.

46 Jatianribira Saúlnin filisteobo moa jato chibankin jenea iki, jainoaxa jaton mainbiribi moa baneti bokana iki.

47 Jaskataxa Saúl Israelhain moa apo jikia iki, jainoaxa jatíbi ja patax iká, jawen rawibo betan reteanana iki, jabora iká iki, Moab, Amón, Edom, Sobáinoa apo jainoax filisteobo. Jatian ja ikanainkobo kaxonra, reteanankin jatoaresa iki.

48 Jainoax sontárobo tsinkiax reteanankinra, Amalecbo jatoareskana iki, jaskáxonra Israelbo, ja jawéki yometsoamisbaon mekenmamea jato xabáakana iki.

49 Saúlnin benbo bakebora iká iki: Jonatán, Isúi, jainoax Malquisúa. Jatian jawen ainbo bake iká iki rabé: Merab, ja reken, jainoax Mical, ja jawen chiní.

50 Ja Saúlnin awinin janera Ahinoam iká iki, jara Ahimaasnin bake ainbo iká iki. Jawen sontárobaon koshin janera, Abner iká iki, jara Nernin benbo bake, itan Saúlnin epa iká iki.

51 Cissa Saúlnin papa iká iki, jainoax Ner, iká iki, Abnernin papa, jabora Abielnin bakebo iká iki.

52 Ja Saúl janontianra, jatíbitian ikonbiresi filisteobo betan reteanankana iki, jaskákinra Saúlnin jatíbi jawen sontárobo koshi, itan rakéma jonibo jato benxokaamakatiai.