Saúl Diossen omisa
15
Wetsa netera Samuelnin, Saúl yoia iki: —Ibon raanara ea joke, jawen jema Israelhain mia apo imakin xenin machinon ixon. Jaskara ixon rama ja mia Diossen yoiai ninkáwe.2 Neskárai ja jatíbi atipana Ibo: ‘Ja Egiptonkoniax pikotax Israelbo bekanaitian jato betan reteanankana iketianra, mii meranxon amalecitabo en jato masá tenemai.
3 Jaskara iketian kaxon min sontároboyaxon jato reteanankin peoxon, jatíbi jaton jayata jawékiabi jato keyotankanwe, jawekeskaxonbira maton jato noibatima iki. Benbobo, ainbobo, bakebo, itan bená pikota bakebo, jainoaxibi waka benebo, carnerobo, camellobo, itan burrobo, maton keyokin reteti iki’ —akin.
4 Jatianra Saúlnin, jonibo kenamaxon, Telaimhainxon jawen sontárobo jaton jane kenapakea iki. Rabé pacha waranka jonira ja reteanantiain main boaibo iká iki, jainoax chonka waranka jonira Judáinoabo iká iki.
5 Japekáora Saúl jawen sontároboya, Amalec jema ochóma kaa iki, westíora wean patax, jainxon jato akin peonoxa jain joneta iki,
6 jatianra Saúlnin joi boaibo quenitaboiba raana jato yoia iki: —¡Oke, bokanwe! ¡Ja Amalecitaboibakeax pikókanwe, mato non jatoyabi keyoamabi; matonra ja non rekenbo Egiptonkoniax pikotax bekanaitian jakonhaa iki! —akin. Jatianra quenitabo, moa Amalecitaboibakeax pikókana iki.
7 Jatianra Saúlnin jawen sontárobayaxon amalecitabo betan reteanankin Havilainxon peoxon, Shurhain kaai jikitiain kaman jatoareskin jato chibankana iki, jara Egipto mai senenainko iká iki;
8 jainxonra jaton apo Agag, yatankana iki, jaskáxonra jatíbi jawen sontárobo, reteanantiainxon jato retekana iki.
9 Jaskara ikenbira Saúlnin, jawen sontároboyaxon Agag, jaweayamakin jamakana iki, jainxonra kikin jakonshaman carnero awinboribi reteyamakana iki, waka benebo, jainxon waka bene bake xoashamanbo, carnerobo, itan ja kopí jawékibo keyoyamaxonbira, jatíbi kopíma jawékibo betan ichama kopía jawékibores keyokana iki.
10 Japekáora Ibon Samuel yoyo aka iki:
11 —Saúl apo imayamapainonbira en imaa riki, eibakeax ochótaanan en ati yoiabo senenhayamaa iketian —akin. Jatianra Samuelnin jawen shinan kikin tsokas banéxon, Ibon ja Saúl jaweayamanon ixon, ja yamé yokáxonshina iki.
12 Ja moa nete xabataitianra, Saúl bechinox kaa iki, ikaxbi Carmelhainra Saúl kake akin yoikana iki, jain westíora monomento nichinxonra, westíoraakin mayataanan moa Gilgalhori kaa iki.
13 Jatianra Saúlnin, jaiba kaketian Samuel yoia iki: —Mia Ibon jakonhabanon. Ea Ibon ati yoiara, en moa senenhake —akin.
14 Jatianra Samuelnin yoia iki: —¿Jatíbi yoinaboki min retea, jatian ja carnerobo itan waka benebo man ikai en ninkatai jawe iki? —akin.
15 Jatianra Saúlnin yoia iki: —Jabora Amalec ikainoa kikin jakon carnerobo betan kikin jakon waka benebo iki, min Ibo Dios meninoxon nokon sontárobaon bexonkana riki. Ikaxbi jatíribi jawékibora moa non keyoa iki —akin.
16 Jatianra Samuelnin yoyo imayamakin neskaa iki: —¡Netewe, Ibon yamé ea yoiwana en mia yoibanon! —akin. Jatianra Saúlnin aká iki: —Yoireswe —akin.
17 Jainxonra Samuelnin yoia iki: —¿Apo ikámatianki eara kikinmashoko iki, ikax mia shinanmeeyamaa iki? Jaskara ikaxbira, mia israelita jonibaon rarebobaon koshi iká iki, jaskara ikenra já min yoiti ixonti iki.
18 Jakon riki, Ibonbira mia raana iki, ayamama ja ochaya amalecita jonibo jato reteanankinxon, jatíbi jato jayatayabi keyonon ixon,
19 ¿Jawekopíki ja ati yoiabo, min ninkáxonyamaa iki, itan ja maton rawibo bichinabo bixonki, jakonma jawéki min Ibo bebon ayamaa iki? —akin.
20 Saúlninra yoia iki: —Enra moa Ibon jaskáti yoiabo ninkáxona iki, itan jan ati yoiabora en moa senenhaxona iki: enra Amalecbaon apo yatanxon, moa bea iki, itan wetsa amalecitabora en moa jato keyoa iki.
21 Ikaxbi ja sontárobaonra, ja kikin jawékibo keyoti ikenbi, jakon carnerobo itan jakon waka benebo bikana iki, Gilgalhainxon min Ibo Dios ja kikin shinanxon menixon menoxonti kopí —akin.
22 Jatianra Samuelnin yoia iki:
“Ja Ibon keen riki, jan yoia keskábo ninkáxonai iti,
yoina keyokin menoxona itan yoina keyokin menoxonama bebonbiresiki yoiti ixona itan netékainxon ninkáxonai iti,
ja jawékibo menixon menoxonai itan ja carnerobaon xenibo menititianbi.
23 Jakonmabires ocha riki ja jaki yoitimati,
ja onanmisai inox axei tanáti keskáribi;
jaskáribi riki ja rabiti aká rabiaibo,
itan Dioski yoitimati.
Jawen esébaon mia keenyamaa keskatira,
rama jábiribi mia apo iti keenyamai”, akin.
24 Jatianra Saúlnin, Samuel yoia iki: —Ikon riki eara ochaa iki, joniboki raketai kopí, jaton yoiabores axonai kopíra ja Ibon jaskara ati yoiabo itan ja min jaskara ati axeabaon ea shinanbenota iki.
25 Ikaxbi en mia yokatai riki, nokon ocha min ea shinanxontima, ebé baneti kaxon Ibo rabii kawé —akin.
26 Jatianra Samuelnin aká iki: —Eara kayamai mibé baneti, minra jaskara Ibon ati yoiabo senenhayamake, jaskara ikaxa rama jaribi, moa mia Israelbaon apo itin keenyamai —akin.
27 Samuel kaai ranbeakekainaitianra Saúlnin jawen perakooti kebí yatanxon noshinana iki.
28 Jatianra Samuelnin, Saúl yoia iki: —Neskáribiakinra, mia Israelbaon koshi itimaakin Ibon mia ake. Jaskáaxonra westíora ja min kaibo, mia winoa bebon jakon iketian koshi imake.
29 Ja Diossa Israelbo jan jatoareskinai iki, jara wetsa jonibires keskáma iki, jansotira atipanyamake, jawen shinanra wetsaati atipanyamake —akin.
30 Jatianra Saúl iríbaa iki: —Eara ochaa iki, ikaxbira en mia yokatai, Israelbaon joni koshibaon, itan jatíbi jonibo bebon, apo keskáakin shinankin ea jeneyamawe. Jaskara iken ebé Gilgalhain kawe ja Ibo min Dios min rabinon —akin.
31 Jatianra Samuel, Saúl betan baneti kaxon Ibo rabia iki.
32 Japekáora Samuelnin ati yoia iki:
—Ramara Amalecbaon apo Agag min ebebon beti iki —akin.
Jatianra jakonshaman shinanyanix Agag, Samuel bebon joá iki,
ja kikínbires jakonma mawáti onsára moa winóbirake iki ikax.
33 Ikaxbi Samuelnin yoia iki: —Icha ainbobora sontárobo retenanxon, min bakeoma banémaa iki. Ramara jabo ikana keskáribi min tita banetai —akin.
Jainxon moa oribo yoiboyamakinra,
Samuelnin Gilgalhainxon Ibon amaara retexon Agag xatepakea iki.
34 Japekáora Samuel Ramáin jawen xobonko kaa iki,
jatian Saúlbiribira ja moa jakátiainko Gabaain jawen xobonko moa baneti kaa iki.
35 Jainxonra Samuelnin, jawetianbi moa Saúl oinyosma iká iki,
Saúl Ibon moa Israelbaon apo imayamaketianra masá shinanna iki.