Apo iti Ibon David katota
16
Ibonra Samuel yoia iki: —¿Jawetio basikayaki min Saúl kopí masá shinankin jeneti iki? Eara moa já Israelbaon apo iikarestinin, keenyamai. Min jain xeni akai machaman xeni bochoawe, jaskátaanan mia Isaíkan xobonko, Belénhain mia katinra ea keenai jawen bakeboainoara, apo imanoxon en westíora katota iki —akin.2 Jatianra Samuelnin yoia iki: —¿Jawe akíki ea kati iki? ¡Apo iti wetsa en xeni machita onanxonra Saúlnin ea reteti iki! —akin. Jatianra Ibon yoia iki: —Westíora waka bake awin bibaini kaxon yoitanwe, Ibo, nato menixon menoxonira ea joke akin.
3 Japekáora ja menotiainxon min Isaí kenati iki, jainxonra min jaskara atibo en mia yoiti iki. Jaweratoki ja apo imati en mia yoiai, jara min xeni machíti iki —akin.
4 Ja Ibon jaskaati yoiara, Samuelnin aká iki. Jatian moa Belénhain nokóketianra, ja jemamea koshibaon rakeananbi bii jokonxon yokákana iki: —¿Jakon joi beiki mia joá? —akin.
5 Jatianr Samuelnin yoia iki: —Jenjén jaskara riki. Eara joke nato waka awin bake Ibo menixon menoxoni. Dios bebon jakon inox chokikanwe, itan ja waka en menikin menoai ebé pii bekanwe —akin. Japekáora Samuelnin Isaí jawen bakeboyabi Ibo bebon jakon iti jato imaa iki, jaskámaxonra ja Dios jawéki meniainko kati jato kenaa iki.
6 Jatian jabo nokóketianra Samuelnin, Isaíkan reken bake, Eliab oinxon shinanna iki: “Wetsama nato riki, ja Ibon apo iti katota joni”, iki ixon.
7 Ikaxbira Ibon yoia iki: “Jawen jisá itan jawetio anirin ixon ja oinyamawe, jaskarabora nokon keenma iki. Jonin oinnai keskákin oinyamawe, jonira jaton yorabores oinnai iki, ikaxbi en oinnaira jaton shinanbiribi iki”, akin aká iki.
8 Jatianra Isaínin jawen bake Abinadab kenaa iki, jaskáxonra Samuel bebon boá iki; ikaxbi Samuelnin neskáa iki: —Jama riki Ibon katota —akin.
9 Japekáora Isaínin jawen bake Sama boá iki; ikaxbi Samuelnin yoia iki: —Natomaribi riki, ja katokota —akin.
10 Jaskáabokinra Isaínin, jawen kanchis bakebo Samuel bebon boá iki, ikaxbira Samuelnin yoia iki, nenoa westíorabira jabo Ibon katotama iki akin.
11 Ja senenainbira yokáribia iki: —¿Min bakebokayaki moa yamaa? —akin. Jatianra Isaínin aká iki: —Ja benbo maxko, carnero koiranairesa maxkáke —akin. Jatian Samuelnin yoia iki: —Ja benatankanon jato ranwe, já nokotamabira non piti atipanyamake —akin.
12 Jatianra Isaínin kenati jato raana iki. Ja betan ikástishamanra iká iki, ja baken yorara joxochashaman iká iki itan metsáshaman jonira iká iki. Jatianra Ibon Samuel yoia iki: —Nato riki já. Jaskara ixon, moa apo inon onantiakin xeni machiwe —akin.
13 Jatianbira Samuelnin pomon iká xeni bixon ja bake ranon David janeya, jawen wetsabo bebonbi moa onantiakin apo imakin xeni machita iki. Jatianbira Ibon shinanman moa já iboaa iki. Moa piá pekáora Samuel jato kaai ataanan, Ramáin jawen xobonko kaa iki.
Davidkan Saúl tee axona
14 Saúlhibakeax Ibon shinan pikotax ochóketianra, jakonma shinan yoshin Ibon raana joxon Saúl masá tenemaa iki.
15 Jakopíra ja akinaibaon yoia iki: —Jawekeskaki min oinnai, ja Diossen amaa jakonma shinanman mia masá tenemaitian.
16 Jaskara iketian noa yoiwe, ja arpa ten ati onan benakanon ixon, jatianra mia jakonma shinanman akaitiibi, jan arpa ten akaitian min shinan jakonti iki —akin.
17 —Jakon riki, jakonshamanhakin arpa ati onan joni benakanwe, jaskáaxon ea bexonkanwe —akinra Saúlnin, jato yoia iki.
18 Jatianra jain iká westíoranin yoia iki: —Enra Isaíkan bake westíora Belénhain iká onanke, janra kikin jakonhakin arpa ten akai, itan jara reteanankas ikax rakéma joni iki, jainoax metsá itan jakoni yoyo iti onanribi; itan Ibon akinnairibi riki —akin.
19 Jatianra Saúlnin, joi boaibo Isaí yoiti jato raana iki: “Ja min bake David carnerobo koirannai ea raanxonwe”, akin yoiti.
20 Jatianra Isaínin jawen bake David, Saúlhiba raankin: Westíora burro, jainxon panhaxonbo, jainoax westíora bichi chomo uva xeati bochóya itan westíora cabra bake bene jabé Saúl bomaa iki.
21 Jaskati Saúl bebon kaaxa, David ja akinnai baneta iki, Saúlninra onanxon ichabires jaki jakon shinanna iki. Jaskákinra wetsa jan akinnaibo bebonbires já akinnai itiakin Saúlnin janea iki.
22 Jainxonra Saúlnin westíora joi Isaíki raana iki, David jabé banénon ixon yokákin, jan oinna jawen keen iketian.
23 Jaskákinra ja Diossen raana jakonma shinan yoshinman Saúl akaitian, oinxon Davidkan jawen arpa bixon ten axonkatitai. Jaskáaxonara Saúlnin koshi shinanhinabainxon, jakon shinankatitai, jatianribira jakonma shinan jaibakeax ochókatitai.