2 Jatianribira Saúl itan jawen sontárobo, Elá mai teshanpain tsinkitax, jainoax filisteobo betan reteananox benxokakana iki.

3 Wetsa mai mató maxkaten filisteobo iketianra, ja bekeiba wetsa mai matokan israelitabo ikana iki, ja naponra mai teshanpa iká iki.

4 Jatianbira filisteobo xarameax, kimisha metroya westíora reteanankas joni pikókawana iki, jawen jane Goliat, ja iká iki Gat jemamea.

5 Jawen maponko bronce maitia, jawen yoranko bronce xopanantia, bronce aká jawen iwe pichika chonka pichika kiloya.

6 Jan witax panati, itan tsatsitaxo iaxon boaira iká iki bronce akanaribi.

7 Jawen tsatsitaxo kikin ani, jawen rebonko kensho iká yami iká iki sokota kilo winoa. Jan Goliat akinnaira já bebon kaa iki.

8 Jatianra Goliat, israelita sontárobo bebon chankatax saí ika iki: —¿Jawekopí reteanani mato joarin? Ea riki filisteo, jatian mato riki ja Saúl akinnaibo, jaskara ixon mato xaranmea joni katokanwe ebé reteanani jonon.

9 Ebé reteanankin eaaresti ikaxa joti iki, jatianra noabo maton kikinhakin yanka yonoaibo iti iki; ikaxbi já enharesketianra mato non kikinhakin yanka yonoaibo iti iki.

10 Rama netera en mato yoiai, Israel sontárobo betan reteanankaskin. ¡Ea westíora joni raanxonkanwe ea jabé reteanannon! —akin.

11 Jaskati filisteo joni yoyo ikai ninkataxa, Saúl itan jatíbi jawen sontárobo jaton shinan yosmabainax ikonbiresi rakékana iki.

12 Matonra moa onanke westíora jonira Belénhain jaa iki, jawen jane Isaí, jara Saúl apo inontian moa bebon yosiora iká iki. Jara posaka benbo bakeya iká iki, westíora jawen baken janera David iká iki.

13 Jatian ja Isaínin kimisha reken bakera, ja Saúl reteanani kaaitian chibani bokana iká iki. Ja kimisha bake reteanani kaabaon janera iká iki: Ja reken Eliab, ja rabé itin iká Abinadab, itan kimisha itin iká Sama;

14 jainoax David iká iki ja senenainoa bake,

15 jara Saúlbiribi akinnai ikáx, ja ikana chopa xobonko kaax, itan Belénhain jawen papan carnerobo koirani kaax ikai iká iki.

16 Jaskákanai kamanra Goliat filisteo joni, yamékiritiibi itan yantántiibi israelitabo sinái pikota iki, chosko chonka nete senenra jato jaskáa iki.

17 Wetsa netera Isaínin jawen bake David, yoia iki: —Nato trigo tobán rabé chonka litro biwé, jainxon chonka pan, jaskáaxon min wetsabo ishton jato ikana chopa xobonko boxontanwe.

18 Ja sontárobaon koshiribira, min chonka queso boxonti iki. Jainxonra min wetsabo min ointi iki, jawekeskaki ikanai ixon, jakon ikanaitianra ja oinxon en onanti wetsa jawékibires min ea bexonti iki —akin.

19 Jaskatai kamanra, Saúl itan Davidkan wetsabo, itan wetsa israelita sontárobo, Elá mai teshanpainoax filisteobo betan reteanani ikana iki.

20 Ja nete xabataitianra, David carnerobo wetsa joni koiramataanan; jawen papan menia jawékiati jawéki jato boxoni kaa iki. Jatian ja ikana peotainko David nokóketianra, sontárobo moa reteanani boí jokonkana iki, ja boira reteanantikiri iki saí ibainkana iki.

21 Israelitabo betan filisteobora, reteananox beibanani joyókana iki.

22 Ja reteananti jawéki betan ja jawékiati jawéki koirannai joniki, ja boai jawékiatibo jenebaini ishtoi kaaxa, David jatoiba nokota iki; matoki jawekeska iki akinra jawen wetsabo yokata iki.

23 Jaskati jato betan yoyo ikaitianra, ja reteanankas filisteo joni, Gat jemamea jawen jane Goliat, ja filisteobo tsamatainoax pikókirana iki, jainxonra jato abea keskábiakin sináatoshia iki. Jatianra Davidkan ninkata iki.

24 Ja joni jaskataitian oinnaxa, israelitabo ikonbiresi raketi já bebonmeaxbi jabákana iki,

25 jaskatira neskákana iki: “¿Oa joni pikotaki, moa maton oinna? ¡Jara Israelboki sinati joá iki! Tsonki já ayonnai jara apon icha kopí jawéki meniti iki, itan jawen bake ainboribi awinhanon ixon meniti iki, jainxonribira jawen rarebobaon moa apo jawebi kopíatima iki”, ikibo.

26 Jatianra ja patax ikábo Davidkan yokata iki: —¿Ja nato Goliat reteketianmein itan jan Israelbo ramiaresaibo keyóketianmein jawe ja joni menikanti iki? Jaskara iken ¿Tsoa ixonmein ati iki nato Dios ikonhaismaton, ja jiria Diossen sontárobo jaskáakin? —akin jato aká iki.

27 Jaskáara jabaon moa aibata keskáribiakin yoikana iki, Goliat, reteketian ja menitibo.

28 Ikaxbi Eliab, ja Davidkan wetsa rekenra, jonibo betan jaskati yoyo ikai ninkatax, jaki sinákin neskáa iki: —¿Jaweaki mia neno joárin? ¿Tsokikayaki ja tsoa jonibi jain jayamainko, ja ichama carnerobo min jenebeirana? Jawe akasi mia neno joarin ixonra en onanke, miara jakonma shinanya iki, mia neno joá riki reteanankanaitian jato oinkasires —akin.

29 Jatianra Davidkan yoia iki: —¿Ja ramabi yoyo ixonki, jawe jakonma en aka? —akin.

30 Jaskati moa jawen wetsaibakeax kaxon, Davidkan wetsa joni yokatabira, jaskáribiakin yoia iki.

31 Ja Davidkan yokataitain ninkábaini boxonra jatíribibaon, Saúl yoikana iki. Jatianra Saúlnin David kenamaa iki.

32 David joketianra Saúlnin yoia iki: —Mato Goliatnin jaskáabira tsoabi shinan namanti yamake, ea min yonoti kaaxa, jabetan ea reteananti iki —akin.

33 Saúlninra yoia iki: —Ja Goliat betan reteanani kaira, miabicho katima iki, ikaxbi miara bebon bakeranonhira iki; jara jawen bakeranontianbi reteananai joni iki —akin.

34 Jatianra Davidkan yoia iki: —Ea min yonoti, nokon papan carnerobo koirannai inontianra, westíora leónman iamaxon westíora oson, kenenko joxon carnero boaitian,

35 japekáobi kaxon, jawen rekinhainoabi en carnerobo bichinkatitai; en jaskáa ea bikasaitianra, jawen koinbi yatanxon en retenon kaman rishkikatitai.

36 Jaskáxonra, min yonotinin, león betan oso retekatitai. Jaskáribiakinra nato Ibo Dios ikonhaisma filisteo jonibo en jato akai, jiria Diossen sontárobo betan reteanantinin keenkana iketian.

37 Ja león betan oson mentsisainoa ea xabaa Ibonribira, ja Goliatnin mekenmamea ea xabaati iki —akin. Jatianra Saúlnin yoia iki: —Jaskara ikax katanwe, Ibora mibé iki —akin.

38 Saúlninra jawen chopa David sawemati jato yoia iki, bronce maitira maimakana iki, itan bronce xopanantiribira sawemakana iki.

39 Ja senenainbira Davidkan jawen chopakibi jawen cintora ikain ja espada panina iki, jatíbi jabo jaskátaananra axeama ikax, nii tanata iki. Ikaxbi jainxonbira Saúl neskáakin yoia iki: —Axeama ikaxa, ea neskaraboya nitikoma iki —akin. Jatianra moa jatíbi jopémaa iki,

40 jawen bastón bixonra, pichika makan jakonshokobo ja weanmamea katóxon ja boai pishan napota iki, jainoaxa David jawen baladora tsomaya, Goliat nokoi kaa iki.

41 Jatianribira já David nokoi kaai jainmashaman iikaina iki. Jan akinnaira ja bebon kaa iki.

42 Goliatnin David oinnara, bakeranon ikáx jawen yora joxochashaman, itan metsá iká iki, jaskara ikenra jan oinna iresabires iká iki,

43 jaki shirokinra yoia iki: —¿Eaki westíora ochiti iki, jaskara jiwiaxon min ea akí joti? —akin. Jaskátaananra jatianbi jawen diosen janenko, David jakonmakin shinanxona iki.

44 Jaskáaribaxonbira, Goliatnin yoia iki: —¡Neri jowé, min nami, noyai yoinabo betan pimis yoinabo, já pinon ixon en jato meninon! —akin aká iki.

45 Jatianra Davidkan yoia iki: —Ea akira mia joai, espadaya, yami taxo kenshoya, itan tsatsitaxoya ikaxbi eara mia akí kaai Ibo jatíbi atipana Israelnin sontárobaon Diossen janenko, jabo betan reteanankaskin min yoia iketian.

46 Ramara Ibon mia eki menikaamaketian retexon, en mia texteai, jaskáxonra filisteo sontárobaon mawá yorabo, en noyai yoinabo betan pimis yoinabo pinon ixon meniai. Jatianra nato netemeabaon jatíxonbi onankanti iki, Israelbo betanra westíora ikon Dios jake ixon;

47 jatíbi ja neno tsinkitabaonra, onanti iki, espadanin, itan yami taxo kenshonbicho jato Ibon jatoaresyamai. Nato reteanantira Ibona iki, jaskara ixonra non mekenman mato jan menikamai —akin.

48 Jaskáara Goliat David nokoi kaai pikota iki, jatianra jaribi ishtonbires jakikirana iki,

49 jainxonra Davidkan pisha meranoa westíora makan bixon, jawen baladoran nanetaanan jawen betonkoainshaman Goliat tsakaa iki. Ja tsakaa jawen betonkoain makan jikiketianra jawen bemananinbi maiki paketa iki.

50 Jaskáxonra Davidkan jáaresa iki. Westíora baladorayaxon itan westíora makanmanresa Davidkan Goliat retea iki. Espada boamara iká iki.

51 Jaskatira ishtoi kaax já patax nia iki, jawen xaka meranoa tsekataanan jawen espadaninbi retea iki. Jaskáaxonra textea iki. Jatianra jatíribi filisteo sontárobo, moa jaton reteananti onan joni mawáketian oinnax, jabákana iki.

52 Jatianra israelita itan ja Judá sontárobo, saí ikana iki: Jato retenon akanwe iki, jatianra ja Gathain kaai jikitiainko itan Ecrón jema xepotibo ikainko kaman jato chibankana iki. Saaraimhainoax peokootax Gat itan Ecrón jemanko kati bai kamanra, jatíbiain filisteo sontárobaon mawá yorabo tipia iká iki.

53 Ja filisteobo chibani botana pekáo Efes-damimhain banéxon, israelitabaon jaton carpa peotabo ikainoa jatíbi jaton jawéki bikana iki.

54 Jatianra Davidkan Goliatnin mapo itan jan reteananti jawékibo bixon jawen xobonko boá iki, japekáo basichaara ja mapo Jerusalénhain boá iki.

55 Saúlninra moabi jawen sontárobaon koshi Abner, yokata iki, ja Davidkan Goliat akí pikoti kaaitian: —Abner, ¿Nato baken papaki tsoa iki? —akin.

56 Abnerninra yoia iki: —Enra mia akonkin yoiai, enra onanyamake —akin. Jatianra Saúlnin yoia iki: —Jaskara ikenra, tsoarin ixon min onanti jake —akin.

57 Goliat retea pekáo, jawen mapo moa baneti jokin beaitian oinxonra, Abnernin David nokoxon Saúl bebon boá iki,

58 janra yokata iki: —Baké, ea yoiwe ¿Tson bakerin mia? —akin. Jatianra Davidkan yoia iki: —Min yonoti ja Belénhain iká Isaínin bake riki ea —akin.