2 Ja netebira Saúlnin, jatíbitian jan akinti bia iki, jatianra jawen papan xobonko moa raanyamaa iki.

3 Jonatánmanra janbix noikaata keskáakin David noia iká iki, jaskákinra jatíbitian raenanai iti shinanbekona iki.

4 Jaskákinra, ja sawea jawen perakooti betan jawen tari jopétaanan menia iki, jainxonra jawen espada, jawen kanóti, itan jawen cinturónribi menia iki.

5 Jatíbi ja Saúlnin ati yoia jawékibo senenhaxonra, Davidkan jan atipana jawéki jato oinmaa iki, jaskara iketianra Saúlnin jawen sontárobaon koshi jikimaa iki. Jatianra Saúlnin sontárobaon, itan jatíbi sontárobaon keenshaman, ja David iká iki.

6 Sontárobora baneti bekana iki, Davidkan Goliat retea pekáo, Israelhainoa jatíbi jemankonia ainbobora, jaskara jaton axé iketian panderoyaxon itan platilloyaxon raroshamankin bewananbi itan danzaananbi, apo Saúl bii jokonkana iki.

7 Ja biira bewaananbi danzani, bewá banebaneshamani ainbobo neskákana iki:

8 Jaskaraton tsokásmaara, ikonbiresi sinati Saúl yoyo ika iki: —Ja Davidkan chonka waranka reteara yoikanai, ikaxbi en warankares reteara yoikanai. ¡Ramara nokon toan moa apo imakantires maxkáke! —iki.

9 Jatianshamanra Saúl, moa Davidki notsii jakonmaata iki.

10 Saúlnin ebé banéwe akin David aká pekáora, Diossen raana joxon yoshiman shinanman Saúl iboa iki, jaskáara ja apo ikax jain iká xobo meranoaxbi, westíora shinan ramita joni keska iká iki. Ikaxbi jaskaai axea ixonra, Davidkan jawen arpa ten axona iki, jatianra Saúl jawen yami taxo nenké kensho tsomaa iká iki.

11 Ishtonbiresa Saúlnin, yami taxo kensho wakeinabainxon, David chikékibi kataxbainki chachiti shinanna iki, ikaxbira Davidkan Saúl, rabéakin winonna iki.

12 Jatian moa já akinhamakin Ibon, David akinnai oinnax, Saúl jaki raketa iki.

13 Jaskákinra pikoxon, westíora tsamá waranka sontárobaon koshi jikimaa iki, jaskatira reteanani kaax itan joáx ikátiai.

14 Jaskáakin Ibon akinnara, Davidkan akaibo jatíbi jakonbires ikátiai.

15 Jaskati bebonkaresaitian oinnaxa, Saúl Davidki raketa iki.

16 Ikaxbira Israelhainxon, David jatíxonbi noikana iká iki, jankaya ja reteanani katinko, itan moa banétiainko jato ikinnai iketian.

17 Wetsa netera Saúlnin David yoia iki: —Ninkáwe, enra nokon reken bake ainbo Merab, min awinhanon ixon meniai, ikaxbi en mia yoiai riki, miara nokon reteanankas koshi shinanya iti iki, jaskatira mia Ibon janenkobo reteananti iki —akin. Saúlnin shinannara iká iki, enbira reteti yamake, filisteobora en amati jake ixon.

18 Ikaxbi Davidkan yoia iki: —Ea apon rayos iti ikaxbira, ea jawemabi iki, nokon rarebo Israelhain ikábora jawemabobi iki —akin.

19 Jaskáakin yoixonbira Saúlnin aká iki, ja David moa jawen bake Merab meniti nete nokóketian, já meniamakin Meholainoa joni Adrielres menikin.

20 Ikaxbi Saúlnin wetsa ainbo bake Micalra iká iki Davidkan keenai. Jaskáakin Saúl yoikanara, jawen keenshaman iká iki,

21 filisteobaon retenon ixon jan beparankinra awinhanon ixon David meniti shinanna iki. Jaskara shinanxonra, Saúlnin, jawen rabé itin David yoia iki: —Ramakayara ikon, mia nokon rayos ikai —akin.

22 Japekáora Saúlnin jawen yonotibo yoia iki: —Matobicho ixonra, David betan yoyo ikin maton neskáati iki, ikonbiresira apo mion keenai wetsa jawen yonotibo bebonbires, já nokon rayos ikára jakonhira iti iki, ikira ikai, akinra maton ati iki —akin jato aká iki.

23 Saúlnin yonotibaonra boxon, David jatíbi joibo jaskáakinribi yoikana iki, ikaxbi Davidkan jato yoia iki: —¿Matonki shinanai apon rayos iti, ea keska jawebioma itan kikínmashoko joni ikax itibires iti iki ixon? —akin.

24 Davidkan jato yoia keskáribira kaxon jawen yonotibaon Saúl yoikana iki.

25 Jatianra Saúl, filisteobo David retemakasai ixon, jato yoia iki: —Ja David yoikanwe, ja wanoti kopí noa axea keskáakin, ea apo kopíatitianbi, ea jan menitinin keenai riki, pacha filisteobaon jakina rebichi, ea nokon rawíbaon kopikaatinin keenai kopí —akin jato aká iki.

26 Jatianra jaiba boxon, ja Saúlnin yonotibaon David jaskáakin yoikana iki, jainxonra moa Davidkan onanshamana iki, eara moa apon rayos iki nokoti kaai ixon. Ja iti nete senenamatianbira,

27 Davidkan jawen jonibo bia iki, jatoya kaxonra rabé pacha filisteo retea iki, japekáora jaton jakinna rebichi, jawen rayos inoxon apo boxona iki. Jatianra Saúlnin jawen bake ainbo Mical, moa awinhanon ixon menia iki.

28 Ikaxbi Saúlra David Ibon akinnaitian itan Micalnin noia oinnax.

29 Jaskara ikenra moa ikátiai bebonbires raketa iki, itan jatíbitian jawen rawí baneta iki.

30 Jainoax wetsa jawékiribi, ja filisteo joni koshibo jaton sontároboya beax israelitabo betan reteananaitiibira, ja Saúlnin wetsa sontárobaon koshibaon akai bebonbires, Davidkan jato keyokatitai, jaskákinra akonbireskin jatixonbi jakonhakanai iká iki.