2 keshana iki: —Nokon papanra jaskáaxon mia reteti benai. Jaskara iketian bakish yamékirishoko koiramewe, jaskara iken wetsabaon onanamainko ja enbicho onanainko jonéwe.

3 Jain mia joneta mainko, mia ochómara ea nokon papa betan kaai. Jainoaxa mia yoii ea jabé yoyo iti iki, jaweki ea yoitiki ixon oinnox, japekáora en mia onanmati iki —akin.

4 Jatianra Jonatán, David akinkasi jawen papa betan yoyo ika iki: —Janra jawe jakonmabi akáma iki, jaresa ichabires jakon mia aká iki, jaskara ikenra min yonoti David min retetima iki, itan;

5 mawá meranbi onitsapikainxonra Goliat retea iki, jaskáaxonra jatíbi Israel jonibo akonbireskin jato xabáa iki. Minra oinna iki, jatianra mia raroa iki. ¿Jawekopiki, jawe jakonma akáma ikenbi yankabires min David retekasai? —akin.

6 Jatianra Jonatánman yoia ninkata Saúl koshin saí ika iki: —Diossen janenkora en yoiai David mawátima —iki.

7 Jatianra Saúl jain iikanai mainmeax moa kaa iki, japekáora Jonatánman, David kenaxon jatíbi jaskati jawen papa betan yoyo ika keshana iki. Jaskaa pekáora Saúlhiba boá iki, jatianra Davidkan moa akatiai keskáribiakin Saúl teexona iki.

8 Reteanantira peokooribia iki, jatianra filisteobo betan reteanani jawen sontároboya David kaa iki, jaskáxonra jatoareskana iki, akonbireskin jato akanara jabákana iki.

9 David-ra moa apon xobonko iká iki, wetsa netera Saúl, Ibon amaa jakiribi jakonma shinan yoshinman aká iki; jatianra Davidkan arpa akaitian, jawen xobo chiké meran yami taxo kensho tsomáya yakata iká iki,

10 jainxonra jawen yami taxo kensho David chikéki kataxkin chachikaskin tanaa iki. Ikaxbira ja aká, Davidkan winona iki, jatianra jawen yami taxo kensho chiketen chankata iki. Ja yamébira David jainoax jabati kaa iki.

11 Jatianbira Saúlnin, jawen jonibo yoia iki, Davidkan xobonko kaxon koiranxon wetsa nete xabáketian reteti. Ikaxbira jawen awin Micalnin, David keshankin yoia iki: —Nato yamé jabáyamaxa, bakish mia moa mawá iti iki —akin.

12 Jatianbira Micalnin ja David, westíora ventananin paninxon pakémaa, jabati kaa iki.

13 Japekáora Micalnin westíora jaton ja rabiti bixon, Davidkan oxatiain jikimaa iki, jara cabra boo xewaa maimaxon chopan mapoa iki.

14 Jatian ja Saúlnin raana jonibaon yatannoxon xepótiainxon David kenakanatianra, Micalnin jato yoia iki isiniriki, akin.

15 Ikaxbira jakiribi Saúlnin jawen jonibo David benati raankin, neskara ati jato yoia iki: —¡Jawen oxatiain ikenbira, jainoa maton pikoti iki, jaskáaxonra en retenon ixon maton ea bexonti iki! —akin.

16 Jatianra ja Saúlnin jonibo ja Davidkan xobonko jikikana iki, ixonbira jawen oxatiain westíora jaton ja rabiti jawékibicho nokokana iki, cabra boo xewá maia.

17 Jatianra Mical kenamaa joketian Saúlnin yoia iki: —¿Jaweatiki nokon rawí jabámaxon min ea neskáakin parana? —akin. Jatianra Micalnin yoia iki: —En jabámayamaketian, ea retetira yoia iki —akin.

18 Jaskati jabataxa David, Samuel oinni Ramáin kaa iki, jatíbi Saúlnin jaskára akábora yoia iki. Japekáora David betan Samuel Naiot jeman jaai kaa iki.

19 Jatianra David Naiot Ramáin iketian onanxon Saúlnin,

20 yatanxon nexati jawen jonibo raana iki. Ja Saúlnin jonibo nokóxon oinnara, westíora tsamá profetabo rama iti joi bii ikana iki, ja iká iki Samuelnin jato ikinaibo. Jatianbira Diossen shinan Saúlnin jonibo meran jikixon jato iboa iki, jatianra jaboribi rama iti jawéki yoiai iká iki.

21 Jaskata ninkáxonra Saúlnin, wetsa jonibo raana iki, ikaxbi jabaonribira rama iti jawéki yoikana iki. Jawen kimisha itinra Saúlnin jaweti jonibo raanribia iki, jatianra jabaonribi rama iti jawéki yoikana iki.

22 Jatianra Saúl Ramáin jabi kaax, Secúhain iká jain onpax akanainko nokoxon, jaweranoki Samuel betan David iki ixon jato yokata iki. Jatianra Naiothain riki ixon yoikana iki,

23 jatianra Saúl jain kaa iki. Ikaxbira Diossen shinan já meran jikixon iboaa, Saúlninribi rama iti jawéki yoia iki, jaskáaxa Naiot Ramáin kaman yoiboi kaa iki;

24 jaskáribixonbira jawen chopa jopeta iki, jatianra jaskáabi, rama iti jawéki yoii, Samuel bebon ja nete iibaitax itan ja yamé ishinribia iki. Jaskatira ikanai: “¿Saúlribikayaki, profeta iki?” iki.