2 Jatianra Jonatánman yoia iki: —¡Diossa keenyamai! ¡Nokon papanra mia reteyamai! Minra onanti jake, nokon papanra ea yoiamaxonbi jawebi ayamai, iresa jawéki akinbira ea yoiai. ¿Jawekopíki nokon papan mia retekasai ea yoiamakin joneti iki? ¡Jaskarara itima iki! —akin.

3 Ikaxbira Davidkan yokáboresa iki: —Min papanra kikinhakin onanke ea min jakonhai, jaskákinra mia keenyamanaketian, min onantinin keentima iki. ¡Ikaxbi miabi itan Ibon janenkora en mia yoiai, eara moa wetsatianbires mawatibi iki! —akin.

4 Jatianra Jonatánman yokata iki: —¿Mia kopí en jawe atinki mia keenai? —akin.

5 Jatianra Davidkan yoia iki: —Ninkáwe, bakish iki bená oxen fiesta, jatianra ea apo betan pii yakáti nete iki. Ikaxbira min ea imaresti iki, rama peokootax wetsa bakish yantan kaman ja mainko ea joneta iti,

6 min papan ea manoaitianra, min yoiti iki, ishtonres nokon jema Belénhain kanoxon en mia yokata, nokon rarebobaon baritiatiibi yoina menikin menokanai iketian, jato betan akí kanoxon.

7 Jatian jakon riki iki ixon mia yoiketianra, ea jakonbires iti iki; ikaxbi min jaskáa sináketianra, ea jakonmakasi iká riki ixon, min onanti iki.

8 Jaskara iken ea akinpariwe, ea riki min yonoti, mibé raenani jatíbitian janoxonra, Ibo bebonxon non akonkin shinanbekona iki. Jatian en jakonma akona iketian minbi ea retewe. Ea min papaiba botira mia maxkáyamake —akin.

9 Ikaxbi Jonatánman yoia iki: —¡Jaskara jawékibo shinanyamawe! Nokon papan mia retekasai ninkáxonra, en mia yoiti iki —akin.

10 Jatianra Davidkan yokata iki: —¿Tsonki ea yoiti iki, min papa min jaskara yoia sináketian? —akin.

11 Jonatánmanra yoia iki: —Ja tsoa yama xabáshaman ikainko kanonkawé —akin. Jatianra ja xabá ikainko kabékona iki,

12 jainxonra Jonatánman yoia iki: —Israelbaon Ibo Diossen janenkora, akonkin senenhati shinanxon en mia yoiai, bakish nato horaribi iamax wetsa bakish nato horaribira, jawekeskamein nokon papan shinanai ixon en onanti iki. Jawen iká miki jakon iketian oinxonra, mia yoiti en jato raanti iki,

13 ikaxbi nokon papan mia jakonmakasaitian, abánon ea Ibon akonbireskin masá tenemakin, mia yoiamaketian itan jakonax jabáti ikenbi en mia akinyamaketian. ¡Nokon papa akinni keskáribiakin, mia Ibon akinbanon!

14 Jakon riki, rama ea japariketian, Ibon mia jakonha keskáribiakin, earibi jakonhawe. Jatian ea mawákenbira,

15 nokon rarebo jatíbitian min jakonhakin jenetima iki. ¡Min rawibo Ibon kikinhakin retekin keyoa pekáobi! —akin.

16 Jaskáaxonra Jonatánman ja senenhabekonti joi David betan aká iki,

17 noibamis ixonra Jonatánman, akonkin senehanoxon jakiribi yoia iki, itan janbix noikaata keskákinra David noia iki.

18 Japekáora yoia iki: —Bakisha bená oxen fiesta iki, ikaxbi min yakátiain mia yamaketianra, jawekeskatiki yamaa ixon mia rotokanti iki.

19 Ikaxbi jawen kimisha iti neten mia yamaketianra, bebonbires mia yamaa rotokanti iki. Jaskara ikenra ja moa mia jonéibatainkoribi mia kati iki, kaaxa ja makan tsamábo ikainko mia iti iki.

20 Jatianra, mecha tanakin ja joxo toróain tsakakin ati keskaakin, kimisha pia en jao potati iki,

21 jaskáxonra nokon yonoti en yoiti iki: ‘Piabo benatanwe’, akin. ‘Ja piabora mia ikainoax neri iki, kaxon jabo bitanwe’, akin, en aketianra, jawebira ea winoyamai ikax, mia jakonbires pikoti iki. Akonkinra, Diossen janenko en mia yoiai.

22 Ikaxbi en yoiti iki: ‘Ja piabora oribires iki’, akin. Jatianra min onanti iki, Ibo mia jabátinin keenai.

23 Ja non anoxon shinanna jawéki, jatíbitian onanara Ibo iki —akin.

24 Jatianra David ja mainko moa joneta iki, jatian ja oxe benakan fiesta ati moa nokóketianra, apo moa pinox mesanko yakata iki.

25 Jaskati axea ikaxa, chiké patax yakata iki. Jonatánra ja bebon yakata iki, jatian Abner, Saúl patax yakata iki. Ja Davidkan yakátiainra jawebi yamaa iki.

26 Ja netera Saúlnin jawebi yoiamaa iki, jakonma aká Dios bebon benxoama ikaxa ibirai ixonra shinanna iki.

27 Ikaxbi jawen rabé itin fiesta iti nete xabáketianra, jakiribi Davidkan yakátiain jawebi yamaa iki. Jatianra Saúlnin, jawen bake Jonatán yokata iki: —¿Jawekopíki bakish itan rama Isaínin bake pii joyamaa? —akin aká iki.

28 Jatian Jonatánman yoia iki: —Davidkanra ea ishton Belénhain kanoxon yokata iki.

29 En katanwe anon ixonra ea yokata iki, jawen rarebobaonra jaton jemanxon, Dios jawéki menoxonai, jatianra jawen wetsan kati yoia iki. Jaskákinra jawen wetsabo betan fiesta akí kaai ea yoia iki, jatianra en kati yoia iki. Jaskatira neno nobé pii joyamake —akin.

30 Jatianra Saúl ikonbiresi Jonatánki sináxon yoia iki: —¡Jakonma titan baké! ¿Min jisáki en onanyamaa ja Isaínin bake mibé kikini raenanai, jaki minna itan min titana rabinma iki?

31 David japariketianra, mia koshi itimabobi iki. ¡Jaskara iken, já benati jato raannxon, ea neno bexonkanwe, jara mawáti jake! —akin.

32 Ikaxbi Jonatánman yoia iki: —¿Jawekopiki já mawáti iki? ¿Jawe akárin? —akin.

33 Jatianra Saúlnin jawebi yoiamakin, Jonatán chachinoxon jawen yami taxo bia iki, jaskáketianra jan onanna iki, jawen papan David reteti shinana.

34 Jatianra Jonatán ikonbiresi sinátax, moa mesankoniax wenita iki, jawen rabé iti fiesta netenra moa piamaa iki, jawen papan David jakonmaaketian, akonbireskin jaon masá shinanai kopí.

35 Ja wetsa nete xabata yamékirira, jatian David betan nokoananti yoia ikax, ja jonetainko Jonatán jawen westíora yonoti bakeranon betan ja mainko kaa iki,

36 jara neskaati yoia iki: —Ishtoi kaxon en pia potaibo benatanwe —akin. Jatianbira ja yonoti ishtoi kaa iki, Jonatánman pia potai kaman, ikaxbi ja yonoti ochóbires paketa iki.

37 Jatian ja pia paketainko moa yonoti nokóketianra, jatíbi jawen koshianixbi, Jonatán saí ika iki: —¡Ja piara mia ikainoax, ochóbires iki! —ikira iká iki.

38 Jainxonra Jonatánman jakiribi jawen yonoti saí aka iki: —¡Tsasiamai ishtoi, ishtontani katanwe! —iki. Ja Jonatánman yonotininra moa pia bia iki, jaskáxonra jawen koshi boxona iki,

39 ikaxbira jan jawebi onanyamaa iki, Jonatán betan Davidkanresa onanna iká iki jawe yoii ikárin ixon.

40 Japekáora Jonatánman jawen reteananti jawékibo, jawen yonoti menia iki, jainxonra jakiribi moa jemanko boxonti yoia iki.

41 Jatian ja yonoti moa kaketianra, David ja makan tsamá pekáokeax pikota iki, jainoaxa Jonatán bebon kimishai mai tii anon kaman beota iki. Japekáora bexekananax winibekona iki, jatianra ikonbiresi David winia iki.

42 Ja senentiainbira Jonatánman, David yoia iki: —Jakonbires katanwe, ja non senenhanoxon akonkin rabéxonbi shinannara Ibon janenko iká iki, jainxonra non yokata iki; jatíbitian já noobetan inon ixon, jainoax min chiní bakebo betan, itan nokon chiní bakebo betan inon ixon —akin. Japekáora moa David kaaitian, Jonatánribi moa jemanko kaa iki.