David Judáin apo iti janekana
2
Nato jaskara iká pekáora, onankaskin Davidkan Ibo yokata iki: —¿Jawerato Judá jemabo ikain inonbires kabatan? —akin. Jatianra Ibon yoia iki: —Jenjen, katanwe —akin. Jainxonra Davidkan yokáribia iki: —¿Jawerato jemanki ea kati iki? —akin. Jatian Ibonra yoia iki: —Hebrónhain katanwe —akin.2 Jawen rabé awinhara David jain kaa iki: Jezreel jemamea jawen awinin janera Ahinoam iká iki, jainoax wetsan janera Abigail iká iki, jara Nabalnin kachiana, Carmel jemamea iká iki.
3 Jainxonribira jabé ikábo jaton rareboyabi jato ioa iki, jabo boaxa Hebrón jema ochómaboribi jakana iki.
4 Jaskata pekáora, judáinoa jonibo nokoxon, judáinoa apo imakin onantiakin David xeni machíkana iki. Jatianra ja Galaad main iká Jabes jemamea jonibaon Saúl miinkana, David yoikana iki,
5 jatianra jaweti joi boai joni, jato yoiti Davidkan raana iki: “Ibonbi mato jakonhabanon, maton ibo Saúl, akonkin jakon shinanxon maton miinna iketian.
6 Ibonbi, jakon ixon itan akonkin senenhai ixon mato noibabanon. Jaskáribiakinra mato enribi jakonhakin akinti iki.
7 Jaskara iken rama bebonhakin koshi shinankanwe, ja maton ibo Saúl mawáketianra, judá jonibaon ea jaton apo inon ixon, imakin onantiakin ea xeni machíkanke”, akin jato yoiti.