2 “Nato netemeax jatikaxbi jaskákanai keskatira kaaibi ea kaai. Koshi shinanwe, koshi joni keskati iwé.

3 Min Ibo Diossen mia ati yoiabo senenhawe, jawen shinan itan jawen esébo senenhawe, ja senenhati esébo, koshi joibo, ja ati yoia joibo, ja Moiséssen esekan yoiai keskábo senenhawe, jawerano mia kanonbi, jatíbi jawéki min akábo bebonon ixon.

4 Jainxonribi Ibon ea axonti yoini senenhanon ixon, nokon bakebaon jaton ikábo jakonhakin koiranti iki, já bebonra ikon jakon jakanti iki, jatíbi jaton shinanyanixbi, itan jaton kayayanixbira, jakon jakanti iki, jatianra Israelnin ani yakátinin yakati, jawetianbi nokon rarebobo jenétima iki.

5 Ramara, min kikinhakin onanke, ja Sarvianin bake, Joabnin ea jaskara aká, ja israelitabaon sontárobaon koshibo jaskara aká: Nernin bake, Abner betan Jeternin bake, Amasá, jabora jan jato retea iki, moa reteanantima ikenbi, ja reteanantiainoax mawatabaon kopikaakinra jato aká iki, jato retexonra ea apo iketian ea iboamaa iki.

6 Jaskara iketian, jaskáaxon jawéki ati onan ixon, jakonhaxon mawámayamawe.

7 Ja Galaadhinoa, Barzilainin bakebo jato jakonhakin noibawe, jábo min piairibi jato pimawe, min wetsa Absalónman ea jabáma kaitianra koiranxon ea akinkana iki.

8 Simei, ja Gerakan bake, Bahurimhainoa benjaminita, ja miibetan ikáribi oinwe. Janra Mahanaimhain ea kaai nete, jakonmakinbires ea shinanxona iki. Japekáora, ea jaskáa ikaxbi, Jordán paronkoxon ea bii kaa iki, jatianra Ibo kopíresa en mia reteyamai ixon en yoia iki.

9 Miara enra shinanxonyamai iki iti yamake. Miara shinanya iki, jáki jaweati iki ixonra min onanke. Ikaxbira basiamakin akonbireskin masá tenemaxon min reteti iki”, akin.

10 David mawáketianra, jawen anibo ikainribi, jawen janeya jemanko miinkana iki.

11 Kanchis baritiara Hebrónhain apo iká iki, jainoaxa kimisha chonka kimisha baritia Jerusalénhain iká iki. Jatibianixa Chosko chonka baritiara, Israelbaon apo iká iki.

12 Japekáora Salomón jawen papa Davidkan toan apo iká iki, ja apo ixon jato ikinnara kikin koshi iká iki.