2 Jainshamanxon ati yamakenbira, jonibaon manan bochikixon ikonma diosbo rabiainxon Ibo yoina menoxonkana iki, jatianra jainxon Ibo rabiti xobo akanamapari iká iki.

3 Salomónmanra Ibo noia ixon, jawen papa Davidkan aká eséboribi senenhaa iki, janribira ja manan bochikixon yoina itan incienso ininti menoxona iki,

4 jainshamanxon ati keyá ikax jakon iketianra jainxon yoinabo menoxoni, Gabaónhain kakátiai; jainxonra waranka yoina keyokin menoxona iki.

5 Westsa yaméra, Gabaónhainxon, namá meran oinmaxon, Ibon, Salomón yoia iki: “Mia keenai ea yokáwe, en mia meninon”, akin.

6 Jatianra Salomónman yoia iki: “Minra nokon papa, min yonoti David akonbireskin noiba iki, jara jawetianbi mia jenetima shinanya, itan atikeskabiakin jaskara ikábo benxoai iká iki, miibetan ixonra pontéres shinanna iki. Jaskákinra min akonbireskin noibaa iki, jainxonra ea jawen bake, jawen ani yakátinin min yasana iki, ramara jaskara winóke.

7 Mia, Ibo itan nokon Diossé, nokon papa Davidkan toánra jato ikinti min ea apo imake, bakeranonshokopari ikax ea jawebi tanatamapari ikenbira min ea imake.

8 Ikaxbira ea, min katota jonibaon koshi iki: Kikinbires icha jonira ikanai, icha ikaxa, topóntikoma iki, jati icha onannoxon topóntira atikoma iki.

9 Min jonibo en jato ikinnon onan shinan ea meniwe, natora jakon iki itan natora jakonma iki ixon en onannon; jaskara ikenki ¿Tsoa iti iki, jan min jonibo kikínbires icha jato ikinti atipana?” akinra aká iki.

10 Salomónman jaskáakin yokatara, Ibon keenshaman iká iki,

11 jatianra yoia iki: “Basi jati, icha jawékia iti, min rawíbo mawáti yokáyamakin, koshi ixon jato ikinti jaskáaxon jawéki ati onan shinan min ea yokáketianra,

12 min yokata en akai: Enra mia meniai onan shinan, itan jaskáaxon jawéki ati onan shinan, tsoabira mia ikámatian jayá ikama iki, itan tsoabira mipekáo jayá itima iki.

13 Jainxonribira, ja min yokatama ikenbi icha jawéki en mia meniai, itan iresama jakon ninkakataira en mia imai, jaskara ikaxa mia jaai kaman wetsa apo mia keska yamati iki.

14 Jainxon nokon keena keská min akaitian, jainxon ja nokon esébo itan jaskara ati en yoia joibo, min papa Davidkan akátiai keskáakin min senenhaitianra, en mia basi jamati iki”, akin.

15 Jatian oxá jishtenxonra, namáketian ítai Salomónman onanna iki. Jatianra Jerusalénhain jakiribi kaax nokóxon, ja senenhabekonti joi jain iká ani bonanti bebonxon, Ibo yoinabo jatiobi keyokin menoxona iki, itan jabé raeananti kopíribira yoinabo menoxona iki. Japekáora jatíbi jawen joni koshibo aniakin jawékiati jato axona iki.

16 Jaskara inontianra rabé tsini ainbo apo oinni kaa iki. Jaiba ixonra,

17 wetsan yoia iki: —¡Jawe iresaipanon, Apó! Nato ainbo betanra noa ja xobonbicho jake, já ebé xobon iketianra ea benbo bake bakenna iki.

18 Ea moa bakena kimisha nete iketianra, nato ainboribi benbo bakena iki. Noa rabébichora jain iká iki. Wetsa jonibora ja xobon yamaa iki.

19 Ikaxbi wetsa yaméra, nato ainbaon bake mawata iki, en shinanara jawen baken perakaa iká iki.

20 Jatianra ea oxaa iketian, yamé pochinikon wenixon, ja nokon benbo bake epataxkea boxon, já patax rakana iki, jaskáaxonra ja jawen benbo bake mawata epatax rakana iki.

21 Yamékiri wenixon, xoma amanoxon en oinnara iká iki moa mawá. Ikaxbi moa neteketian en oinnara, ja en pikoa benbo bakema iká iki —akin.

22 Ja wetsa ainbaonra yoia iki: —Jaskarama riki, ja jiriara nokon benbo bake iki, ja mawatara mina iki —akin. Ikaxbi ja rekenaton yoia iki: —Jaskarama riki, ja mawára min benbo bake iki, ja jiriara nokon benbo bake iki —akin. Jaskatira apo bebonmeax join ibékona iki.

23 Jatianra apon shinanna iki: “Naton yoiai nokon benbo bakera jiria iki ixon, jatian ja mawára wetsana iki ixon; ¡Ikaxbi wetsan yoiai jaskarama riki!” ixon.

24 Jatianra jato yoia iki: —¡Ea espada bexonkanwe! —akin. Jatian moa espada apo boxonkanara,

25 jato yoia iki: —Ja jiria bake, rabé kaxke akanwe, jaskáaxon westíora kaxkebo jato menikanwe —akin.

26 Ikaxbira ja bake jiriaton tita, ikonbiresi oniskin apo yokata iki: —¡Jaskáayamawe! ¡Min ja jiria bake reteyamawé! ¡Nato ainbo min meniara jakon iti iki! —akin. Ikaxbira wetsan yoia iki: —Nokonama, nin minamabira iti jake. ¡Kaxkebakanon! —akin.

27 Jaskáketianra apon jato yoia iki: —Ja jiria bake westíoraxon ja ainbo meniwe. Reteyamakanwe, jara ikon jawen tita iki —akin.

28 Jatíbi Israel jonibaonra, join ikanaitian jakonhakin apon jato joi benxoaxona ninkákana iki, jatianra jaon rakékana iki, atikeskabiakin jato joi benxoaxonti Diossen onan shinan meniara oinkana iki.