Jawen sontárobaon koshiboyabi Joaquín Babiloniain bokana
(2 Crónicas 36.9-10)
24
[Josías mawata pekáora, jawen bake Joacaz moa kimisha oxebicho Judáin apo iken, Necaonin yatanxon Egiptonko boá iki. Jatianra jawen wetsa chiní, Joacim, Judáin chonka westíora baritia kaman apo iká iki. Jawen bake Joaquín mawáketianra jawen toan apo iká iki.]8 Joaquínra chonka posaka baritiayanix, apo jikii peokoota iki, kimisha oxera Jerusalénhain apo iká iki. Jawen titan janera iká iki Nehusta, ja Jerusalénhainoa Elnatánman bake ainbo.
9 Ikaxbi Ibon oinnara, jawen papan aká keskáshamanribi, jakonma jawéki aká iki.
10 Jaskara inontianra, Babiloniainoa apo Nabucodonosornin sontárobo, Jerusalén jemamea jonibo betan reteanani bokana iki, ja boxonra jema katekana iki.
11 Ja moa reteanankanaitianra, Nabucodonosor nokota iki.
12 Jatianra Joaquín Judáinoa apo jawen tita betanbi, jawen sontárobaon koshibo, jawen joni koshibo jaki koshiabo itan jawen esemisboyabi, Babilonia apon moa jatoarestaanan yatanxon jato boá iki. Moa posaka baritia Nabucodonosor apo iká ikenra jaskara jawéki winota iki.
13 Japekáora Nabucodonosornin, jatíbi kopí jawékibo, Ibon rabiti xobonkonia itan apon xobonkoniabo, jokonhaxon Babiloniain boá iki, ikaxbira Ibon yoini keskata iki, jatíbi jawéki ja Israelbaon apo Salomónman, jato amaara Ibon xobonkonia oro jawékibo toekin keyokana iki.
14 Japekáora jatíbi Jerusalénhainoa jonibo, jainoax jatíbi koshibo betan jakon sontárobo, jainxon jatíbi jawéki atin menín jonibo itan yami jawékinin teetaibo, jabora chonka waranka joni iká iki. Kikin jawebioma joniboresa jain baneta iki.
15 Nabucodonosorninra, Joaquín, jawen tita betanbi, jainoax jawen awinboyabi, jawen sontárobaon koshibo, itan ja mainmea kikin jonibo, jabora Jerusalénhainxon, Babiloniain jato yatanxon bokana iki.
16 Jaskáaxon Babilonia apon jawen sontároboyaxon, ja koshi sontárobo yatanxon boara, kanchis waranka iká iki; jatíbi jabora reteananti atipana koshi jonibo iká iki, jatianra jawéki atin meninbo itan yamin teetaibo jato boá, westíora waranka iká iki.
17 Japekáora Babilonia apon, Judáin Matanías apo iti janea iki, jawen noxa Joaquínman toan, jatianra wetsa jane menikin, Sedequías akin janea iki.
Sedequías Judáin apo iká
(2 Crónicas 36.11-16; Jeremías 52.1-3)
18 Sedequíassa rabé chonka westíora baritiayanix apo iki peokoota iki, chonka westíora baritiara Jerusalénhain apo iká iki. Jawen titara iká iki Libnainoa Jeremíasnin bake ainbo, itan jawen janera Hamutal iká iki.
19 Ikaxbi Joacimman aká keskaribira, Ibon oinna jawen akábo jakonma iká iki.
20 Jaskara kopíra Jerusalén betan Judá joniboki sináxon, Ibon jato jenea iki. Jatin moa jawetio basi ikax Sedequías, Babilonia apoki ramita iki.