2 Jaskáketianra ja apo, jatíbi Judáinoa jonibo, Jerusalénhainoa jonibo, ikon sacerdotebo, profetabo, jainoax jatíbi ja mainmea jonibo, bakeshokoboyabi bebon yosibo Ibon xobonko bokana iki. Jainxonra Ibon xobonkonia bikana, jato betan senenhabekonti joi kirikanin yoiaibo, koshinshaman apon jato yoyo axona iki.

3 Jatianra xobo witá patax nia iki, jainoaxa Ibo bebonmeax enra yoiti ixonai ika iki, ja yoiabora kikinhakin en senenhai, jawen esébora en akonkin chibanai, jaskara ati yoiabo itan jawen esébo, jato betan senenhabekonti joi kirikanin, jaskara ati wishaabora en senenhati iki, iki iká iki. Jatianra jatíbi jonibo nonribira senenhati iki, ikana iki.

4 Aponra, ikon sacerdotebaon koshi Hilcías, itan wetsa ikon sacerdotebo, jainoax ja xepoti koiranaiboribi jaskara ati jato yoia iki, Ibon xobonko iká ja rabikanai dios Baal betan diossa Asera, jainoax jatíbi naikanmea wishtinbo rabikin akanai jawékibo, pikoti jato yoia iki. Jatianra Jerusalénhainoa boxon, Cedrón weanhinxon menokana iki, ja aká pekáora jawen chiimapobo, Betel jemanko bokana iki.

5 Japekáora Judáinoa apobaon ikonma sacerdote janeabo jaton teeainoa jato pikoa iki, manan matóain ikábo jainxon ikonma dios rabiti xobonkobo incienso ininti menotibo jato janeara iká iki, Judá jemanko ikábo itan Jerusalén patax ikainbo atira iká iki, jainoax dios Baal, bari, oxe, penéma wishtínbo itan jatíbi pené wishtínbo incienso ininti menoxonaibora jato potaa iki.

6 Ja Ibon xobonko iká diossa Asera jisaakin akana, Jerusalénhainoa pikobainxon, Cedrón weanmanxon chiimapo banétiakin menokana iki, japekáora mawá miinbo ikainko janbisakin potakana iki.

7 Jainxonribira, jonibaon jainxon yorankanai chitébo ras akana iki, ja Ibon xobo meranoaxa jaton dios rabii jaskákana iki, jainxon ainbobaon Asera rakoti chopaaxonkanaira ras akana iki.

8 Japekáora Josíasnin, Judáin iká jemabaon ikana jatíbi ikon sacerdotebo, Jerusalénhain bekanti jato yoia iki, jatianra Gebainxon peoxon Beerseba jema kaman ikonma dios rabiti maxko xobobo moa jaskara atima apon yoia iki, ja ikon sacerdotebaon jainxon incienso ininti menokanaibora iká iki, ja jemamea joni koshi, Josuékan xobo xepoti ochóma ikábo, jainxon yoshinbo yoina menoxonkanaibora moa ras akana iki, Jerusalén jeman jikiti xepóti mexkao ikábora iká iki.

9 Jatianra ja manan maxkaten iká ikonma dios rabiti maxko xobonkonia ikonma sacerdotebo, Jerusalénhain iká jainxon Ibo yoina menoxontinko boyamakana iki, ikaxbira levaduraoma aká pan, jabé sacerdotebo betan pikana iki.

10 Josíasninra keyoa iki, ja Benhinom teshanpain iká jainxon jato menoti akana, ja Moloc dios menikin, jato benbo bake iamax jaton ainbo bake moa jainxon menowetsayamakanon ixon.

11 Ja Bari dios rabititian ja Judá apobo jan bokanai kabayobora pikoa iki, jabo iká iki ja Ibon xobonko jikitiain akana, ja chitébo koiranai Natán-melecnin xobo chité pataxbi, jainxonribira carrobo menoa iki.

12 Jaskáribiaxonbira ja Acazsen xobo pekaten jawen chité manaon, jainxon yoina menoti Judáinoa apobaon aká, moa ras akana iki, jainxonra Ibon xobo chichó jemanko, Manaséssen jainxon yoina menoti akáboribi ras akana iki; beshéakin roroxonra Cedrón weanman potakana iki.

13 Ja Jerusalénhainoax bari pikotaiori iká, ikonma diosbaon xobobora moa ras aribakana iki, ja Olivos mananhainoax surhori iká, jabora iká iki ja Israel apo Salomónman jato amaabo, ja omistibires sidoniobaon diossa Astarté axonkin; Quemós jisá ja rabiti akana, ja omistibires moabitabaon dios axonkin, Milcom jisá ja rabiti akana, ja amonitabaon omistibires dios axonkin akábo.

14 Jainxonribira ja iresama makan itan iresama jiwi xate akanabo tsekaxon beshéakin ras akana iki, jaskáaxonra kininkobo joni xao bochoakana iki.

15 Jainxonra ja Nabatnin bake Jeroboamman aká, jainxon jawéki menoti betan ja ikonma diosbo jainxon rabiti Betelhain xoboa, itan jainxon israelitabo ochamakatikanaibo, Josíasnin poto banénon kaman jato ras amaa iki, jaskáxonra ketéa iki; jainxon ja dios Asera jisaakin akanaribi ketéa iki.

16 Jatian Josíasnin ja mai keyainxon oinhaketaana, ja mawá kini meranbo xao jaketianra, jainoa jato jokonhati yoia iki, jaskáxonra natora jawemabi iki ixon, ja jainxon jawéki menotiain tsamanxon ja xaobo menoa iki. Jaskatax ikon profeta meranxon Ibon yoini joi, jainoax senena iki.

17 Japekáora yokata iki: —¿Jawe monumentoki oa onno en oinnai? —akin. Ja jemamea jonibaonra yoia iki: —Jara Judáinoax joá westíora profeta mawataton kini iki, janra moabi yoia iki, Betelhain joxon nato jainxon yoina menoti min jaskáatibo —akin.

18 Jatian Josíasnin jato neskáa iki: —Jaskábi jenekanwe. Tsonbira jawen xao meetima iki —akin. Jatianra tsonbi ja xaobo meeyamaa iki, jainoax ja Samariainoax joax, ikon profeta mawataton xaoribira meeyamakana iki.

19 Samariainra ikonma diosbo rabiti xobobo japaria iki, ja Israel apobaon xoboatoninra Ibo akonbireskin sinámaa iki, Josíasninra jato ras amaa iki, jabora Betelhainoa aká keskáribiakin jato amaa iki.

20 Japekáora jainxon yoina menotibo ikainxonbi, jatíbi ja ikonma diosbo rabiti maxko xobonkonia jatíbi ikonma sacerdotebo retekana iki, jainxonra jatokibi mawá xaobo tsamanxon menokana iki. Japekáora moa Jerusalénhain jakiribi banékana iki.

21 Jainxonra ja apo Josíasnin jato yoia iki, jaton Ibo Dios kikin shinanxon, jatíbi jonibo betan Pascua ati, ja senenhabekonti aká joi wishakaataton yoiai keskáakin.

22 Jawetianbira Israel jonibaon jaton koshi jikinontianbi, jato jaskáakin Pascua fiesta akinhosma iká iki, Israelhain itan Judáinbira apo jikixonbi jato fiesta akinhosma ikana iki.

23 Ja Josías apo jikia moa chonka posaka baritiaya inontianra, Jerusalénhainxon Ibo kikin shinankin, Egiptonkoniax pikókani Pascua fiesta akana iki.

24 Josíasninra yobébo betan onanmisbo jato keyoa iki, jainxon ja meskó jatonbi ja rabiti aká jawékibo, jainoax Judáinoa itan Jerusalénhain iká, jatíbi ja omistibires rabikanaiboribi. Jara ja ikon sacerdote Hilcíasnin, ja Ibon xobonkonia bia esé kirika meran yoiai keská senenon ixon aká iki.

25 Tsoa apobira, já ikamatianbi, itan já iká pekáobi, jatíbi jawen shinanyanixbi, jatíbi jawen kayayanixbi, itan jatíbi jawen koshianixbi, já iká keskati, ja Moisésnin esekan yoiai keskati, Iboki menikata yamaa iki.

26 Jaskarabo ikenbira, Ibo sinati jeneyamaa iki, ja Manasésnin ichairakin ramia kopíra, Judáboki sinati jenéyamaa iki.

27 Jakopíra Ibo neskatai, ja Israelbo jenea keskáribiakinra, en Judáinoabo jato jeneti iki, jainoax ja Jerusalén jema katota ikaxbira, ea moa jain itima iki, itan ea jainxon rabiti xobonkora, ea inoxiki inixbira, ea jain itima iki.

28 Josías iikiranabo yoia itan ja aníbo yoiara, Judá apobaon kirikabo ikain wishakaata iki.

29 Egipto apo Necaora, ja Josías janontian, Asiria apo akinni Éufrates paro ikaori kaa iki. Jatianra apo Josías ja bechi kaa iki; ikaxbira Meguidoainoa bechixon moa retea iki.

30 Jatianra jawen sontáro koshibaon, jawen yora westíora carron nanexon, Meguidoainxon moa Jerusalénhain bokana iki, boxonra jawen mai kininkobiribi miinkana iki. Jatianra ja jemamea jonibaon, jawen papa Josíasnin toan, jawen bake Joacaz, moa apo inon ixon onantiakin imakana iki.