1 Josíassa apo Amónman bake iká iki, jawen titan janera iká iki Jedidá, ja Jedidánin papara Adaía iká iki, jara Boscathainoa iká iki, posaka baritiayanix Judáin apo iki peokoota iki; Jerusalénhainra kimisha chonka westíora baritia apo iká iki.

2 Ja Josíasnin akai jawékibora Ibon oinna ponté ikáx, jawen reken papa David ikátiai chibanira já keskáribi jatíbi jawen ikábo jakon iká iki, jawekeskataxbira wetsaori kayamaa iki.

3 Chonka posaka baritia Josías apo ixonra, Ibo rabiti xobonko jawen secretario Safán, Azalíanin bake, Mesulamman baba raanamatianbi yoia iki:

4 —Kaax ja ikon sacerdotebaon koshi Hilcías betan yoyo itanwe, yoitanwe ja Ibo rabiti xobonko bokana koríki tsinkinon ixon, jara xepóti koirannai joniboibakea biabo iki.

5 Jatian abanon ja Ibo rabiti xobo benáai teetai joni koshibo menikin. Janra xobo benáai teetaibo kopíakanti iki.

6 Jabo iki, carpinterobo, ja tee ati onan jonibo, makan xoboati onanbo, jainoaxa jiwi itan makan chaxaabo marokanti iki, itan jainxon rabiti xobo jabaon benáatira bikanti iki.

7 Jainxonribira min yoiribiti iki, ja koriki jato menia jaskáakin keyokana mia yoikantima, jabora jawéki akin atikeskabiakin akaibo iki —akin.

8 Jatianra Hilquíasnin Safán yoia iki, ja Dios rabiti xobo meranoa esé kirika meraa, ja kirika meniara, Safánman yoyo aka iki.

9 Japekáora jaskara ikábo apo yoii Safán kaa iki, jatianra yoia iki: —Mia, apon yonotibaonra, ja rabiti xobonko iká platabo chakaxon, ja Ibon rabiti xobo benáaibaon koshibo moa menikanke —akin aká iki.

10 Jainxonribira ikon sacerdote Hilcíasnin westíora kirika menia Safánman apo yoia iki, jatianra Safánman apo yoyo axona iki.

11 Ja esé kirikanin yoiai ninkáxonra, masá shinankin apon jawen chopa noshixon,

12 jatianbi apon, ja Hilcías itan ja Safánman bake Ahicam, itan Micaíasnin bake Acbor, jainoax apon joni koshi Asaías, jato neskara yoia iki:

13 —Ea kopí, jonibo kopí itan jatíbi Judá jonibo kopí, Ibo yokátankanwe, ja kirika merakanaki jawe yoii iká iki ixon; Ibora ikonbiresi noki sinábirai, non rekenbaonra ja kirikanin yoia ninkáyamakana iki, ja wishakan yoiaira ayamakana iki —akin.

14 Jatian ja ikon profetisa Huldara iká iki, Jerusalén wetsa teki ikain jaa, jawen bene iká iki Salum, ja Salumman papara iká iki Tivac, jawen papashoko iká iki Harhás, ja Salumra iká iki rabiti xobonkonia sacerdotebaon chopa koirannai. Jatianra ja Hilcías, Safán, Ahicam, Acbor itan Asaías, ja Hulda yokati bokana iki,

15 ja ainbaonra jato yoia iki: —Neskarara Israelnin Ibo Diossen yoiai: ‘Ea yokáti jan mato raana joni neskáakin yoitankanwe,

16 ea, Ibonra yoiai: Ja jain jaa jonibora en masá tenemai, jatíbi ja kirikanin jaskara iti yoiaibo, ja Judáinoa apon yoyo axon ninkata keskáakin.

17 Ea jenexonra, wetsa diosbo rabikin incienso inintibo menoxonkana iki, jatíbi jaskarabo akinra ea sinámakana iki; jaskatira jain ikanaboki ikonbiresi ea sináke, jara moa ea tantiamai.

18 Onankaskin, Ibo yokáti jan mato raana Judáinoa apo yoikanwe: Neskararibira Israelnin Ibo Diossen yoiai: Ja joi akonkin min ninkata kopí,

19 itan jain ikana betan jain jaa joniboki jakonmakin, onantiakin en yoiketian, kikinni keyókanti iketian itan jakonmabires ikanti iketian, masá shinankinra chopa noshiax, ebebonmeax winiax, mia ikoni shinanmeetax, mia eki yoiti iká iketianra, min yokata enribi ninkata iki. Ea, Ibonbira jaskara yoiai.

20 Jaskara ikenra jakonshamanres en mia mawámati iki, jainoaxa min rekenbo betan ikí mia kati iki, jain ikanainko jakonmabires jawéki en jatoki raanaira min ointima iki’ —akin. Jatianra ja apon raanabo jaskara joi yoii moa jakiribi bokana iki.