Israelbo kopí Diossen aká
105
¡Ibo irake akanwe!¡Jawen jane jatíxonbi ninkátiakin yoikanwe!
Jan aká jawékibo, jatíbi jonibo yoikanwe.
2 Kikin shinanni jaki bewakanwe.
¡Jan koshi jawéki akábo jato yoikanwe!
3 Jawen jane jakon iketian jan shinanmeeti rabíkanwe.
¡Ja Ibo noiabo maton jointiain raroshaman ikanwe!
4 Ibo yokakanwe mato akinnon ixon, itan jara koshi iki;
jatíbitian já benakanwe mato akinnon ixon.
5 Anibires ratéti jawéki akábo,
itan jaskara ati yoia koshi joibo shinankanwe;
6 mato, ja jawen yonoti Abrahamman chiní bakebo;
mato, ja Jacobnin chiní bakebo jawen katotabo.
7 Jara non Ibo, Dios iki;
¡Janra jatíbiain nato main jato ikinnai!
8 Tekibokin warankaakin bakeakanabo winókenbira,
ja axonti jato betan senenhabekonti yoini joi shinanbenoyamai,
9 Abraham betan ja senenhabekonti joi aní,
itan akinkin ja senenhabekonti ixon Isaac yoiniribi,
10 jatianra ja esé akonkin senenhati Jacob yoia iki,
ja Israel betan senenhabekonti joi aníra jatíbitian iti iki,
11 jaskákinra yoia iki:
“Ja eibakea min biti iká iketianra, Canaán mai en mia meniti iki”, akin.
12 Jabora ichama ikana iki, wetsankoniabo ikaxa ja main ikana iki,
13 wetsa main ikax, wetsa main ikax iibainnira bokana iki,
itan apobaon main wetsa apobaon main iibainnira bokana iki,
14 Diossen jato amayamaara tsonbi jato ramiayamaa iki,
jato jaweayamakanon ixon moa apobo yoiara iká iki:
15 “En katota jonibo meeyamakanwe,
itan nokon ikon profetabobi”.
16 Jatíbi jawékiatira jato bichinna iki,
ja mainra jato jawékiatinin imaa iki.
17 Ikaxbira japari rekenkainti José raana iki,
jara jaton yonoti keskati jaon marokana iki.
18 Jawen taebora cadenabo bishkomayonkana iki;
¡Yami kene meranra xepokana iki!
19 Ibon yoia join tanakaatira José jaskarabo iká iki,
ja namá jaskara iti moabi Josekan yoia senenhai kamanra jaskara iká iki.
20 Ja icha jonibaon Egipto aponra,
moa José pikoti jato yoia iki;
21 jawen xobonko koshi iti itan
jawéki jatíbi koiranxonti koshiribira imaa iki,
22 jaskáaxon ja joni koshibo, itan já eseaibo jato axeati kopí.
23 Japekáora Israel joá iki, jaribi iki Jacob,
jatianra wetsankonia joni ikaxbi Egiptonko kaax,
Cam main jaa iki.
24 Diossen jawen jonibo kaimara icha ikana iki,
Egipto jonibo xewinna koshira ikana iki.
25 Ixonbira egipcio jonibo jawen joniboki, jato sináma iki,
jaskáxon Diossen yonotibo parankantira iká iki.
26 Jatianra Diossen jawen yonoti Moisés raana iki,
jainoax janbi katota joni Aarónribi raana iki.
27 Jatianra tsoa jonibi jain jaama mananmanxon,
ja oinxon onanti jawékibo Diossen jato amaa iki:
¡Kikin ratéti jawékibora Cam mainxon akana iki!
28 Diossen imaara jatíbiain yameta iki,
ikaxbira egipciobaon jawen joi onankashamakana iki.
29 Jaton paro jenebo jimi banémaxonra,
ja paronmea yapabo keyoa iki;
30 ja mainra jatíbiain tokoro bochoax,
ja apo oxainkobobi weita iki.
31 Dios yoyo iketianra, nai koin keskábires bexon,
chepayabi shion ja egipcio mai bochoa iki.
32 Oi bematitianbira, Diossen oi xewares bemaa iki,
jainxon chii raanara ja main tirita iki.
33 Jaton uva waibo itan jaton higo waibora, Diossen xatekin keyoa iki,
¡Jainxon Egiptonkonia jiwiboribira beshéakin xatea iki!
34 Dios yoyo iketianra, tson
¡Topontimati chanpoya iki nokota iki!
35 ¡Ja mainmea xobibora pikin keyoa iki,
jainoax jatíbi ja mainmea yoaboribira keyoa iki!
36 ¡Diossenra Egiptonkonia jatíbi jaton,
reken bakebo retea iki!
37 Japekáora icha oro itan icha plataya
Diossen jawen jonibo jainoa pikoa iki,
tsonbira jato chiteyamaa iki.
38 Ja moa bokanai oinnaxa egipciobo rarokana iki,
kikinni rakékinra jakonma mekana iki.
39 Diossenra nai koin jato otamaa iki,
jatian yaméra chii joé jato tenamaa iki.
40 Piti yokákanara, codorniz isábo jato raanxona iki,
itan naikanmea pitínra jato potóaa iki,
41 itan shanka toeara, jainoax jene jokona iki,
ja tsoa jonibi jain jaama mainra paro keskati jene baita iki.
42 Jawen yonoti Abraham jakon axonti yoinira Diossen shinanna iki.
43 Jaskáxonra Diossen jawen katota jonibo,
raroi saa ikanai meranbi jato pikoa iki,
44 jainxonra wetsa mainmea jonibaon maibo jato menia iki,
jainxonra wetsa jonibaon teexon aká yoabo jawékiakana iki,
45 ja Ibon jato axea esébo ninkáxon senenhakanti kopí.
¡Non Ibo rabinon akanwe!