Keyóisma Dios itan jonin yosma
90
Ibó, miara iká iki, jainoa tsonbi noa jaweatima,ja kaikaikirana jonibo jatíbitian jain jonétai,
2 Mananbo joniamatianbi,
itan mai betan nato nete yamaatianbi,
jainoax moatianbi, itan ja ori ikí kati kamanbira,
mia Dios iki.
3 Min jaskati yoiara joni mai poto banetai:
“Mai poto iwé, akin min akára ikai”.
4 Ikon riki, mina riki, waranka baritia,
bakish winóibata, nete keskares.
¡Jabora yamé jawetio basires iká keskares iki!
5 Namá winotai keskáakinra sináxon
ishtonbires jonibo min keyoai;
6 yamékiri xobi ikai keskára ikanai, jara xoxoai itan joái,
ikaxbi yantanpakera moa choshiai itan mawatai.
7 Ikon riki, min kikin sinakanra noa keyoai,
¡Moa benotara noa banetai!
8 Non ochabo itan non jakonmabora,
mii bebon jishtibires iki.
9 Ikon riki, jatíbi non jati netera mia sináketian moa keyotai;
non joinnai keskáresa non baritiabo winotai.
10 Kanchis chonka baritiaresa noa jaai;
ja bebon koshibora posaka chonka baritia kaman nokotai;
ikaxbi ja basi jatin rabítininra,
tsokas itan teeres beai.
¡Baritiabora noa keskáribi, ishton winotai iki!
11 ¿Tsonki min sinára koshi iki ixon onanna?
¿Tsonki onanna mia kikinbiresi sinatai?
12 Ja noa jaai netebo jakonhakin ati noa axeawe,
shinan meran non onan shinan binon.
13 ¡Ibó, moa noki banéwe!
¿Jawe akiki mia basiai?
¡Nato min yonotibo noibawe!
14 Nete xabataitiibi min noiaton noa raromawe,
itan jatíbitian noa jaai kamanra raroshaman noa bewati iki.
15 Ja non masá tenea baritiatiiribi,
raroshaman noa imawe,
16 ¡Ja min yonotibo, itan jaton chiní bakebo,
min aká jawékibo, itan min koshi jato oinmawe!
17 Ja non Ibo Diossen,
jatíbitian noa jakonhabanon.
¡Ibó, non tee noa jakonhaxonwe!
¡Jaskara riki, non tee noa jakonhawe!