Ibo riki jainoa tsonbi noa jaweatima
91
Koshibires itan jatíbi Atipanatonin otan koiranna jaara,2 Ibo akí neskatai:
“¡Mia riki jainoa ea tsonbi jaweatima jain
joneti, nokon koshi xobo, nokon Dios, ea ikoni jaki koshia!” iki.
3 Janbichoresa mia xabaati iki,
joné trampabo ikainoa itan retemis
isinhainoara, mia xabaati iki,
4 jawen peinra mia mapoti iki,
jatianra jain onsá yamaa jakon itinko mia iti iki.
¡Jawen akonkin senenhaitoninra,
panatinin akai keskáakin, mia panati iki!
5 Yamé onsábo ikenbi rakéyamawe,
netén pia potakanaikibi rakéyamawe,
6 keyomis isinbo yamé nokotaiki rakéyamawe,
itan neten keyomis isinboki rakéyamawe;
7 min mexkaokeaxa
waranka mawá pakékanti iki,
jatian min mekayaokeaxa, chonka waranka mawá pakékanti iki,
ikaxbi miara jawe winótima iki.
8 Wetsabo ikairesa min ointi iki:
jakonmabaon atibi, jaton kopí biaira min ointi iki.
9 Ja Ibo mia jain jonéti moa min imaa ikax, itan
ja Ani koshin panaa ikaxa,
10 jawe jakonmabi miki jotima iki,
jawe isinbira min xobon nokótima iki;
11 jaskara kopíra, jawerano kakenbi,
mia koiranon ixon jawen ángelbo mia raanxonti iki.
12 Jawen mekenmanbira mia waketi iki,
mia jawe makankibi tati iamanon ixon.
13 Miara leónbo napo, niti iki,
ani onsá yoinabo, itan ronobo napora mia niti iki.
14 “Enra xabaati iki,
jawenbi nokotimankora en imati iki,
jaskara kopíra jan ea noike itan ea onanke.
15 Ea kenaitianra, en jen ati iki;
¡Eabira jabé iti iki!
Masá tenetiainoara en pikoti iki,
jatianra jakon jawékibo en meniti iki;
16 basibiresa raroshaman en jamati iki:
¡En akinxon xabaara raroshaman iti iki!” ikira Ibo iká iki.