Diossen ja senenhabekonti joi David betan aká
89
Ibó, minra ea noikin jeneyamai ikira ea miki bewati iki;min akonkin senenhai yoikinra en jenetima iki.
2 Min noimisti shinanra keyoisma iki ixonra en yoiti iki;
min akonkin senenhaira wetsayamai,
nai wetsayamai keskáribi riki.
3 David betanra ja senenhabekonti joi min aká iki;
ja min katota min yonotira, min axonti yoia iki:
4 “Min chiní bakebaonra
min toan apo ixon, jatíbitian jato ikinti iki”, akin.
5 Non Ibó,
jatíbi naikan ikábaonra,
mia ikon senen iketian itan min ratéti jawékibo aká iketian mia rabikanai.
6 ¡Wetsa diosbira yamake, itan tsoabira
naikan mibé senenti yamake, Ibó!
7 Mia riki atipana Dios itan onsá,
naikan ikábaon kateaketana.
8 Ibó, jatíbi atipana Diossé,
jatíbi atipana koshira mina iki itan miara jatíbitian ikon yoiai iki,
¡Tsoabira mibé senen yamake!
9 Ja aniparo bechonaibora minharesai,
itan ja bechon kextotara min jenémai;
10 minra aniparomea onsá yoina retea iki;
mawá yora ati keskáakinra min akai;
min koshinra, min rawibo jato janbisaa iki.
11 Ja nai itan maira mina iki;
minra nato nete jonia iki itan jatíbi jain jaboyabi.
12 Minra norte itan sur jonia iki;
Joni ikai keskatira, Tabor itan Hermón manánbo raroi min janeki bewai.
13 Min ponyanra kikinbires koshi iki;
min mekayaokea meken koshi ixonra jatoaresai.
14 Min yakátinin yakáxonra, atikeskabiakin jaton akábo min yoixonai;
min noimis, itan min akonkin senenhaira mii bebon pikotai.
15 Non Ibó,
raroshamnra ikanti iki, ja jakonshamaakin mia rabiti onana jonibo, ja mia keenai kesti jaabo,
16 ja jatíbitian min janen raroaibo,
itan mia ponté iketian raroshaman ikaibo.
17 Ikon riki, mia riki jan jato koshiai, itan jato metsá ninkákaamai;
min keen jakon iketianra, non atipana koshi shinan kaiai.
18 ¡Ibora, noa jan panaa iki!
¡Ja Israelhainoa Jakonra non apo iki!
19 Wetsatianbora namá keska meranoax yoyo ikin,
ja min senen yonotibo min jato yoia iki:
“Nokon jonibo xarameara, westíora koshi shinanya joni en katota iki,
enra kikin bebon imaa iki, itan enra akinna iki.
20 ¡Enra nokoa iki ja nokon yonoti David!
Nokon iresama xenin sikaxonra en apo imaa iki,
21 jatianra jawetianbi akinkin en maxkámatima iki.
Nokon atipana koshínra en koshiati iki,
22 jatianra jawen rawibaon atima iki,
jakonma jonibaonra jaarestima iki.
23 Jawen rawíbora en jato keyoti iki;
¡Moa oinwetsatimaakin!
¡Jan omisaibora en jato beshéati iki!
24 Ja en noia keskáakinbira, jeneyamakin en noiti iki,
itan jawen atipana koshira en kaiaxonti iki.
25 Enra ati iki, atipana koshia itan iboaxon jato ikinnai iti,
Mediterráneoainoax peokotax Éufrates kamanra iti iki.
26 Janra ea yoiti iki: ‘Miara nokon papa iki;
mia riki nokon Dios, ea xabaai, itan ea koirannai’, akin.
27 Jatianra ja reken bake ixon, bitibo en meniti iki,
nato netemea apobo xewina koshira en mia imati iki.
28 Jara en jatíbitian noiti iki,
jatian ja senenhabekonti joi en jabé akára jatíbitian koshi iti iki.
29 Jawen chiní bakebaonra,
jawen toan apo ixon jatíbitian jato ikinti iki,
nato nai japariai kamanra iti iki.
30 Ikaxbi jabaon en axea joi jeneketian,
itan en ja ati yoia joibaon yoiai keskati jayamakanaitian,
31 nokon esébo senenhayamakanaitian,
itan en ati yoia joibo ayamai yoitimakanketianra,
32 jaton yoitima kopí itan jaton jakonma kopí,
masá tenemakinra en jato jiwi taxon isinhati iki;
33 ikaxbira David noikin en jenetima iki,
já akonkin maxkámayamakin en senenhati iki.
34 Ja senenhabekonti nokon joi akára en seketima iki,
nokon joira en senenhati iki.
35 Westíoraakinbicho senenhati ixonra,
eabi jakon ixon en yoia iki,
jatianra en paranyamai:
36 jawen chiní bakebaonra, jawen toan apo ixon, jatíbitian jato ikinti iki,
nato neten bari japariai kaman.
37 ¡Oxe keskara, jatíbitian iti iki!
¡Nai japariai kamanra, jatíbitian jati iki!”
38 Jaskara ikenbira, ja min katota apo,
min noiamaa iki, itan min jenea iki;
¡Miara jaki sinata iki!
39 Min yonoti betan aká ja senenhabekonti joira min sekea iki;
jawen kikin maitira main min potanaana iki.
40 Jawen jeman chikébora jatíbiain min pekayona iki;
¡Jawen jemabora min ras aka iki!
41 Jatíbi jonira jain winotai, jatianra jaton keena jawékibo yometsokanai;
já patax ikábora jaki shirokanai.
42 Min amaara jawen rawibaon, nonra ake ixon
rarokin, bochiki jaton meken sanankanai.
43 Min imaara jawen espada moa kenshoma iká iki,
reteananaitianra min jato akinyamaa iki.
44 Jawen penéra min keyoa iki;
jawen yakátira min main pakea iki;
45 ichama baritia jatiakinra min imaa iki,
itan kikinhakinra min rabinmaa iki.
46 Non Ibó,
¿Jawetio basiki mia jonetai?
¿Miaki jatíbiki kikinni sináti iki?
47 Ibó, minra onanke nokon jati netera nenkema iki;
ja min joniani jonira, basima jaai.
48 ¡Tsoabira jaax, jawetianbi mawáyamai yamake!
¡Tsoabira mawakan koshin ayamanon ikax, xabakaati atipanyamake!
49 Ibó,
ja peokootiainra David min noia iki itan
akonkin senenhaxonti min yoia iki, ¿Jaweki min rama akai, noa noia onanmakin?
50 Ibó, onanwe ja min yonotibora
icha jonibaon ramiai;
ja ramiakanabira en teneresai.
51 Non Ibó,
¡Jaskáakinra min rawibaon noa ramiai!
¡Jaskáakinra ja min katota, jatíbinin jakonmanin yoinkanai!
52 Jatíbitian Ibo jakon ibanon.
¡Jaskara ibanon!