Ibo rabiti itan irake ati
33
Ibo rabii raroi bewakanwe, jakon jonibó;jakon jonibaon kexakan rabiara, metsáshaman iki.
2 Arpa ten ikai chibankin,
Ibo irake akanwe,
salterio ten ikai chibankin
bewábo bewaxonkanwe,
3 bená bewa bewaxonkanwe,
¡Onanshamanxon jakonshamanhakin ja ayanan itibaon tén ayanan rabikanwe!
4 Ibon joira ikon iki;
jan aká jawékibaonra noa oinmai jan moa senenhaa.
5 Ibonra atikeskabiakin ati itan ponté ati noike;
¡Nato mainmea jonibora jatíbitian jato noike!
6 Jawen joinra Ibon naibo aká iki,
jawen kexakan xoon akatoninra
jatíbi jain ikábo aká iki.
7 Janra aniparo nemin jenebo
jainbicho tsinkixon jain itinkobiribi aká iki.
8 Nato mainxon jatíxonbi Ibo rabikanwe.
¡Jatíbi nato netemeabaon akonkin Ibo rabikanwe!
9 Jaskara ikenra já yoyo ikatonin, jatíbi jawékibo iká iki;
jan jaskara iti yoiara, taxkétimai jaskara baneta iki.
10 Ibonra ja ikon Dios ikonhayamaibo jatíbi
ja tee ati shinannabo akonbireskin jato amayamai,
11 ikaxbi Ibon tee ati shinannabora jatíbitian
keyóyamai.
12 Ja Ibo jaton Dios iketianra,
jonibo raroshaman ikanti iki,
jawenabo iti jato katota jonibo ikax.
13 Naikanxonbira Ibon oinnai,
jatíbi jonibora jato oinnai;
14 jawen jatinkoxonbira
nato main jaa jonibo jato oinnai;
15 janra jaton jointibo aká iki,
jaskákinra jatíbi akanaibo jan oinkin jeneyamai.
16 Tsoa apobira jawen icha
sontaroninbi jakonmainoa kenekaamayamai,
ja koshi shinanyabobira, jaton kikin koshinbi xabakaayamai;
17 kabayobaonra tsoabi jato xabaati atipanyamake;
kikínbires koshi ixonbira jato akinti atipanyamake.
18 Ikaxbi Ibonra jatíbitian koirannai,
ikoni jaki raketaibo, itan jawen noimisti shinanki koshiaibo,
19 mawátiainoabi jato xabaati kopi,
itan jawékiatinin ikaitianbo jato jamati kopi.
20 Ibokira noa ikoni koshiai.
¡Janra noa akinnai itan noa panai!
21 Non jointira Iboki raroai;
jawen jakon janekira noa koshiai.
22 ¡Ibó, min noimisti shinan, nobé imawe,
min jaskaatinra noa manata iki!