Ocha keshaketian moa noa ja shinanxontima
32
Jakonma akátonin ibo ikenbi,itan ochabo aká ikenbi, moa
jatíbi jabo shinanxonyamaa jonira, raroshaman iki.
2 Jonira raroshaman iti iki,
jakonma ati shinanhoma ikax,
itan ja atima aká Ibon
yoixonti jawebi yama ikax.
3 Nokon ocha ea miki keshayamaitianra,
nokon yora yosmapaketa iki,
jaskatira neten ea ishi ibaita iki,
4 jaskara ikenra jatíbitian
min ea masá tenemaa iki.
Bari xanan aká joa choshiai keskatira ea yosmapaketa iki.
5 Ikaxbi jawebi joneyamakinra nokon ocha, itan nokon jakonmabo en mia keshana iki;
nokon ochabo mia keshantira en shinanna iki,
jatianra jabo moa min ea shinanxonyamaa iki Ibó.
6 Jakopíra, akonkin
senenhaibaon masá tenekin mia yokákanti iki,
jatianra ani jenetiaxonbi jato nokotima iki.
7 Miki chipoti ea jain jonetara mia iki,
onsá jakonmanin anaketianra min ea panake,
xabakaatax raroi saí ikaitonbiresa ea kateke.
8 Jatianra Ibon yoia iki:
“Mia oinnira ea iitai.
Jaskara atira en mia onanmati iki,
enra mia eseti iki,
jaskati janon ixonra en mia axeati iki.
9 Burro, itan kabayo keská iamawe,
jabora onanti atipanyamaabo iki,
jawen koshi bechitekinra,
jan tsasiatinin itan risbikan
axonparira chankamati iki,
wetsa keskáaxonra
mii patax imati min atipantima iki” akin.
10 Jakonmabora ichabires chexakaati iki,
ikaxbi Iboki koshiaibora
jatíbitian jan noiabo iki.
11 Iboki rarokanwe,
jakon, itan ponté jonibo;
¡Rarokanwe itan benei saí ikanwe!