Kikin jakon iketian Ibo rabiti
34
Ibo riki jakon ikira jatíbitian ea iti iki;nokon kexakanra jatíbitian en rabiti iki.
2 Ibokira ea rabíshamanai;
¡Ninkatax ebé rarokanwe rabíosma jonibó!
3 Jainbicho tsinkixon, itan senenbires join,
ja Ibon kikin jane rabinon akanwe.
4 Ibora en yokata iki, jatianra jan ea akinna iki,
jatianra jatíbi nokon rakébo potamaxon ea xabaa iki.
5 Ibo oinnaibora kikínbires
raroshaman ikanti iki,
itan jatíbitianra jato keenai bikin nokokanti iki.
6 Nato onitsapishoko saí iketianra, Ibon ninkata iki,
jatianra jatíbi jawen masá teneaibo potamaxon xabáa iki.
7 Ja Ibo rabiaibora,
Ibon ángelnin onsáinoa
jato panai itan jato xabaai.
8 Tanakanwe, itan oinkanwe, Ibora jakon iki.
¡Jan akinnai akonkin ikonhai
jonira raroshaman iti iki!
9 Ibona ikoni ikábaon,
mato jawen jonibaon Ibo rabikanwe,
jaskara kopíra jan akonkin
jakonhaibo jawebi maxkátima iki.
10 Icha jawékiayabora jawebioma baneti kaai,
itan jawékiatinin ikin masá meeti iki,
ikaxbi Ibo benaibora jawetianbi jakon jawékinin maxkátima iki.
11 Neri bekanwe, nokon bakebó,
itan ea ninkakanwe:
jaskáxon Ibo akonkin jakonhatira en mato axeai.
12 ¿Miaki basibires jakasai?
¿Miaki rarokasai?
13 Jaskara iken jakonmai
moa yoyo iki jenéwe,
itan jawetianbi min kexakan janso yoiamawe.
14 Jakonma ochóaxon, jakon awé; jawe iamai
jakonshaman iti benawe, itan ja chibankin.
15 Ibonra ikon jakon jonibo koirannai,
itan ja yokatabo ninkáxonra jato akinnai.
16 Ibora jakonma akaiboki jakonma iki,
moa shinantimaakin itan jaton ikábo yamatiakinra, nato mainmea jato soati iki.
17 Jakon jonin yokata ninkáxonra Ibon akinnai,
itan jatíbi jan masá tenemaibora potamai.
18 Ibora jato akinti kopí,
jaton shinan yosmaabo,
itan moa jakonti shinantinin manáyamaibo patax iki.
19 Jakon jonira ichabires masá teneti meranbo winotai,
ikaxbi Ibonra jatíbi jabo potamaxon xabakamai.
20 Janra jatíbi jawen xaobo koirannai;
westíorabira tobakantima iki.
21 Jakonmabora jaton jakonmaninbi reteai;
jakon joni omisaibaonra masá teneti iki.
22 Ikaxbi Ibonra jawen yonotibo janon ixon jato xabaai,
¡Ikoni jaki koshiaibora, tsonbi masá tenematima iki!