2 Jordán paronko noa raanwe, jainoa westíorabaon non westíora jiwi bibatanon, noa jain jati non anon —akin. Jatianra Eliseon jato aká iki: —Botankanwe —akin.

3 Jaskáketianra wetsan aká iki: —Nobé kawépanon —akin. Jatianra jan jato aká iki: —Kikin jakon riki, ea mato betan kabánon —akin.

4 Jaskatax Eliseo, jato betan Jordán paro kaman kaa iki, jainoara jiwibo xatekana iki.

5 Ikaxbira neskara winota iki, wetsanra jiwi xatekin, yami jene meran raana iki. Jatianra saí ika iki: —¡Jawe ireskiai, maestró! ¡Ja yamira wetsabaona en bea iki! —iki.

6 Jaskataitianra Eliseon yokata iki: —¿Jawerato pontéki paketa? —akin. Jatianra wetsan, nenora kake ixon metoxona iki. Jaskáara Eliseonin jiwi xatexon ja kaainko potaa, ja yami toxbata iki.

7 Jatianra Eliseonin yoia iki: —Ja yami biwé —akin. Jatianra wetsan ja yami bia iki.

8 Ja Siriainoa apora iká iki jawen sontároboya, Israel sontárobo betan reteanani, jatianra jawen sontárobaon koshibo betan tsinkíxon jato yoia iki, jainpari boax ikanti jan shinanaibo.

9 Ikaxbi ja Israelbaon apora Eliseon joi bomaa iki, ja sirio jonibo tsamákana ikáori katima.

10 Jaskáxonra ja Israelbaon apon, ja profetanin jain kati yoiainko jawen sontárobo jato raana iki, jaskáaxa ichai koiramekatikanai.

11 Jaskara ikenra Siriainoa apo sinata iki, jaskákinra jawen sontárobaon koshibo kenaxon, jato yoia iki: —¡Ea yoikanwe tsoa noibakeaki ja Israelbaon apo betan rabetai! —akin.

12 Jaskákenra westíoratonin yoia iki: —Tsoabira yamake, non apó. Ikaxbi Eliseo, ja Israelhainoa ikon profetaninra, jatíbi mia yoyo ikaibo, Israel apo onanmai, ja min oxatiainoax mia yoyo ikabobira ninkámai —akin.

13 Jatianra Siriainoa apon jato yoia iki: —Jaweranorin oinkanwe, yatankanon ixon en jonibo raannon —akin. Jatian Dotánhin riki akin akanara,

14 kabáyonin, itan carrobaon kikin icha sontárobo jato raana boax, yamé Dotánhin jokonxon ja jema katekana iki.

15 Nete xabáketianra, Eliseonin yonotinin pikóxon ratéreskin oinna iki, sontárobo kabáyonin ikábaon, reteananti carron ikábaon ja jema katea; jatianra kaxon Eliseo yoia iki: —Jatian ramakan, maestró, ¿Nonki jaweati iki? —akin.

16 Jatianra Eliseonin yoia iki: —Rakéyamawe, ja nobé ikábora bebonbires icha ikanai, jato betan iká winoabires —akin.

17 Jatianra Eliseonin Ibo orana iki, neskáakin: “Enra mia yokatai Ibó, oinnon ixon jawen bero chopewe”, akin. Jatianra Ibon ja yonoti oinmaa, jan oinna iki, kabayobo sontáro peyakayabo, itan ja reteananti carro chiibiresbo, ja manan bochobires Eliseo kateaketana.

18 Siriobaon moa Dotán jemameabo akí bekanaitianra, Eliseonin Ibo yokákin orana iki: “Enra mia yokatai, nato jonibo jato bencheawe”, akin. Jatianra Ibon ja Eliseonin yokata keskáakin, jato benchea iki.

19 Jatianra Eliseonin ja sirio sontárobo yoia iki: —Natora ja baima iki, natora ja jemamaribi iki. Ea chibankanwe, ja maton benai joniiba en mato bonon —akin. Jaskáaxonra jato Samariain boá iki.

20 Jain nokóxonra Eliseonin, neskáakin orana iki. “Ibó, rama jato bero chopexonwe, moa oinkanon ixon”, akin. Jatian jabaon oinnara moa Samaria chichóbi ikana iki.

21 Jatianra Israelhainoa apon jato oinxon, Eliseo yokata iki: —¿Maestró, jato retepan? —akin.

22 Ikaxbi Eliseonin yoia iki: —Akáma, jato reteyamawe. ¿Miaki min espada betan min pian axon jato yatanxon jato retei axea iki? Jato pimawe itan jato xeamawe, jaskáaxon jaton apoiba moa jakiribi jato raanwe —akin.

23 Jaskáara jato ani fiestaaxona iki, jatianra pikana iki, jainxonra xeakana iki, jaskatax raeanankana iki. Japekáora apon moa jato raana iki. Jatianra jaton apoiba moa jakiribi bokana iki. Jatian jainxon peoxonra, Siriobo ja israelitabo mai jato bichinox moa reteanani beyamakana iki.

24 Jawetio basi winota pekáora, Ben-adad, Siriainoa apon jatíbi jawen sontárobo tsinkia iki, jaskáax kaxonra, jato betan reteanankin Samaria katekana iki.

25 Jatianribira Samariain ikonbiresi jawékiatinin iti iká iki, jaskara ikenra westíora burro mapón kopí posaka chonka plata koríki iká iki, jatian litro pochinikonhainoax naponbekonra, xotó poibaon kopí pichika plata koríkiribi iká iki. Ja chiké kikin xepó iketianra jaskara iká iki.

26 Wetsa netera, Israelbaon apo Samaria chiké maxkaten winotaitian ainbaon jóo aka iki: —¡Ea akinwe, apó! —akin.

27 Aponra yoia iki: —Ibon mia akinyamainbiki, ¿En jawe ati iki? ¿Trigo iamaxon uvaki en mia meniti iki?

28 ¿Jaweki mia winota? —akin. Jatianra ainbaon yoia iki: —Nato ainbaonra ea yoike, rama nete ja non piti nokon benbo bake en meniti, jatianra bakish nete jawenabiribi non piti iki, akinra ea ake —akin.

29 Jatianra nokon benbo bake, non yoá axon pike. Wetsa nete xabáketianra ja ainbo en yoia iki, min benbo bake bewé non pinón akin, ikaxbira ja ainbaon jawen bake moa jonea iká iki.

30 Ja ainbaon yoia ninkataxa, sinata onanti inon ixon, apon jawen chopabo waxaa iki. Chiké maxkaten iketian jonibaon oinnara xaxa chopa sawéyabi iká iki.

31 Jatianra apo neskati yoyo ika iki: “¡Abánon ea akonbireskin Diossen masá tenemakin, nato netebi Safatnin bake Eliseo en texteyamaketian!” iki.

32 Ja netera iká iki israelita joni koshibo betan Eliseo jawen xobonko yoyo iki yakata. Jain jaskákanai kamanra, apon westíora jawen joni jaiba raana iki. Ikaxbi ja apon raana joni nokotamatianbira, Eliseonin ja koshibo yoia iki: —Oinkanwe, retemis ixonra apon westíora joni ea textenon ixon raanke. Ikaxbi netéxon ninkakanwe, jawetianki ja raana joni nokotai ixon, ja nokoketianra xepóti maton xepoti iki, itan já jikinaketian maton tewanti iki, japekáo jawen koshi jokin jamata taróx ikaira moa ninkátibires iki —akin.

33 Jaskati Eliseo jato betan yoyo iitainbira, ja joi beai joni nokótoshixon yoia iki: —Ja neskara jan kikinbiresi rabinti jawéki noki Ibon raanketianki, ¿Jaweaki ea jan akintinin manáti iki? —akin.