7
Jatianra Eliseonin yoia iki: —Ibon joi ninkawe. Ibonra yoiai: ‘Bakish nato horaribira Samariain jikitiainko, kanchis litro trigo harina, westíora plata koriki kopíres maton marokin biti iki, jainoax westíora plata koríkininribira chonka pichika litro cebada harina maton biti iki’ —akin.2 Jatianra ja apobiribishaman tee axonai jonin, ja profeta yoia iki: —Ja nai ventanabo Ibonbi kepenkenbira, ja min yoia jawékibo, jawekeskataxbi jaskara itima iki —akin. Ikaxbira Eliseoninbiribi yoia iki: —Min beronbira min ointi iki, ikaxbira min jabo jawebi pitima iki —akin.
3 Jaskákanai kamanra, ja jeman jikitiain iká, chosko joni lepra isinyabo, jatobires yoyo iki neskákana iki: —¿Jaweaki mawá manai noa neno yakatarin?
4 Jeman jikiaxbira noa mawáti iki, jainra ikonbiresi jawékiatinin iti iki; nenobi yakataxbira noa mawáribiti iki. Siriobaon carpa peotain bonon bokanwe; noa jaweayamakanara noa jati iki; noa retekanara noa mawáti iki —iki ikana iki.
5 Jaskatax moa yametaitian wenitax siriobaon carpa peotaori bokana iki; jatian moa ochómakin oinkanara, tsoabi yama iká iki.
6 Jara iká iki, Ibonbi amaa sirio sontárobaon ninkata, reteananti carrobo, kabáyonin iká sontárobo itan ichabires sontárobo riri ikai keská ninkákana; jatianra siriobaon shinanna iki, Israel aponra, hitita apobo itan egipcio apobo jato kopiáke, noa ati kopi, iki ixon.
7 Jaskatira yametainbi wenitax jabati bokin, jaton carpa peotashokobo, jainoax jaton kabayobo, itan jaton burrobo potabainkana iki, ja jain iti akanabora mawákashamakin jaskábi potabainkana iki.
8 Siriobaon campamentonko nokotaxa ja lepra isinya jonibo, westíora jaton carpa peotain jikixon, pixón itan xeaxon akana iki; jainxonra jaton koríki, jaton oro, itan jaton chopabo bixon, wetsanko boxon jonekana iki. Ja aká pekáo jakiribi boaxa, wetsa carpa peotain jikiribikana iki, jainoara jawékibo biríbakana iki, jaskáaxon boxonra joneribikana iki.
9 Ikaxbi japekáora jatobires yoyo ikana iki: —Nonra jakon jawéki ayamai. Ramara non jakon joi boti nete iki, jaskara ikenbira noa netéreskanke. Bakish kaman noa manatabira, non jakonma aká noa iboamakanti iki. Ja apon xobonko kaxon siriobo jabata non apo keshanara jakon iti iki —iki ikana iki.
10 Jatian boxonra jato koirannai sontárobo kenaxon yoikana iki: —Siriobaon carpa xobobo ikainkora noa katanke, jainra kikinshaman tsoabi yama ike; tsoabi yoyo ikaira non ninkáyamake. Kabayobo betan burrobo nexakanaboresa ike, jainoax jaton carpa peotabora ja akanakeskabi ike —akin.
11 Ja jeman jikitiain koiranaibaonra, jatianbi ja apon xobonko ikábo kenaxon jato yoikana iki.
12 Jatianra yamé ikenbi apon wenixon, jawen sontarobaon koshibo jato yoia iki: —Siriobaon noa akasai jawéki onantiakin en mato yoibanon. Non jawékiatinin ikín masá teneai onanaxa, jaton carpa peotainkoniax boax wetsanko jonékanke, jaton shinan riki nato jemameax noa pikóketian, noa jiriabi yatanax, nato jeman weíkanti —akin.
13 Jatianra wetsa jawen sontárobaon koshin yoia iki: —Jaweti sontáro ja pichika kabayo texeaton jato raanti riki, jatianra jaweki winotai ixon non ointi iki. Jatíbi ja neno baneta israelitabo jaskáshokoti ikaxa, jabo kaax mawákanabi jawemabi iti iki —akin.
14 Jaskáaxonra rabé carro kabáyonin niniaitonin, apon jato raana iki, ja siriobaon carpa peotaboki jawekeska iki ixon ointi.
15 Jabora jan sirio jonibo boá chibanboi kaax Jordán kaman nokókana iki, jatianra jatíbi jan bokana bain oinkana, chopa itan wetsa jawékibo bochobires iká iki, siriobaon jabati boí ishtonkin saa akana. Japekaóra jakiribi banéxon apon raanabaon jaskara oinnabo yoikana iki.
16 Jatianbira jonibaon ja siriobaon carpa peotain boxon, jatíbi ja jenekana jawékibo bikana iki. Jatianra ja Ibon yoia keskáshaman, ja kanchis litro trigo harinanin kopí westíora plata koríki senen iká iki; jainoax chonka pichika litro cebada harinara westíora plata koríki seneribi jawen kopí iká iki.
17 Aponra janbiribishaman tee axonai joni yoia iki, ja jemanko jikitiain koirantira yoia iki, ikaxbira ja joni xepótiainoa bitaxkana mawata iki, ja apo ikon profeta betan yoyo iki kaketian yoia keskáshamanra iká iki.
18 Ja profetanin apo yoia keskáshamanra, ja Samariain jikitiain kanchis litro trigo harina betan chonka pichika litro cebada harina, westíora plata koríkininres marokin biti iká iki.
19 Jatianra sontárobaon koshín, ja ikon profeta yoia iká iki, ja Ibon nai ventanabo kepenkenbira, jaskara winótima iki akin. Jaskáabira Eliseoninbi yoia iká iki, min beronbira min oinnoxiki, ikaxbira min jabo piamanoxiki akin.
20 Jatianra jaskarashaman winota iki, ja jeman jikiti xepótiainoara bitaxkana mawata iki.