2 Wetsatian israelitabo betan reteanani boxonra, Siriobaon westíora xontako yatanxon bokana iki, jara Naamánman awinin yonoti iká iki.

3 Ja xontakoninra jawen ibo ainbo yoia iki: —Ja Samariain iká, ikon profeta benxoanon ixon yokati kaaxa nokon ibo jawen lepra isin benxoti iki —akin.

4 Jaskáakin ja sontakonin yoiara, Naamánman jawen apo kaxon yoia iki.

5 Jatianra Siria apon yoia iki: —Jakon riki, katanwe, en kirika wishaxon Israelbaon apoki raanbanon —akin. Jatianra jawen yonotiboya jawen carron Naamán kaa iki. Kakinra bia iki ja bonoxon, kimisha chonka waranka plata koríki, sokota waranka oro, itan chonka chopa kexé,

6 jainxonribira boa iki, ja Israelhainoa apo bomanoxon, kirika wishá neskati iká: “Nato kirika wishá bixonra min onanti iki, nokon sontárobaon koshi Naamán en miiba raanai, jawen lepra isin min benxoanon ixon”, iki iká.

7 Ja kirika wishá bixon yoyo axonra, masá shinanai onanti ikin, Israelbaon apon jawen chopa noshia iki, jainxon yoia iki: —¿Eaki Dios iki, jato jamai itan jato mawámai, jan nato joni eki raanon, jawen lepra isin en benxoanon ixon? ¡Akonkin shinanxon, oinkanwe, jaskáaxon ebetan reteananti benai riki! —iki.

8 Ja kirika wishá bixon apon jawen chopa noshia ninkáxonra, profeta Eliseonin yoitankanon ixon jato raana iki: “¿Jaweatiki min chopa noshia? Ja joni ea oinni jobanon, jatianra westíora profetara Israelhain jake ixon onanti iki”, akin.

9 Naamánra kaa iki, jawen carroya, jawen kabayoboya kaaxa, Eliseonin xobo xepotiain nia iki.

10 Ikaxbira Eliseonin, jawen joi boai jonires raana iki neskáakin yoiti: “Jordán paron kanchisi jene meran jikiax betashitanwe, jatianra lepra isin benxoax min yora moa jakonshaman iti iki”, akin ati.

11 Naamánra sinata iki, jaskatira moa kaai neskati yoyo ika iki: —Enra shinanna iki, ea bii pikóxonra, nixon jawen Ibo Dios ea yokáxonbirai ixon, itan japekáora ja isin ikainko jawen mekenman meexon, ja lepra isin ea benxoabirai ixonribi.

12 ¿Ja Damasco parobo Abana, Farfarki, Israelhainoa parobo winoa bebonbires jakonshamama iki? ¿Jainbo kaax chokitaxki, ea benxoyamakeana iki? —iki. Jaskatira kikínbiresi sinatax moa jainoax kaa iki.

13 Ikaxbira jawen yonotibaon yoia iki: —Ibó, ja profetanin atikoma jawéki ati yoiamein ¿Min ja ayamakeana iki? Jaskara iken mia yoiai riki, jene meran jikiax mia benxotires —akin.

14 Jaskáakanara Naamán, ja Jordán jenenko kaax kanchisi jikiax pikotax ika iki, ja ikon profetanin jaskáti yoia keskati, jatianra jawen bichi baken yora keskáshoko baneta iki, jaskataxa moa benxoa iki.

15 Jatianra já jabé boaboyabi, Eliseo oinni bokana iki. Já bebon nokóxonra Naamánman yoia iki: —¡Ramara enbi kikinhakin onanke, Israelhainbichora ikon Dios jake! Jaskara iken, nato ea min yonotinin jawéki mia menia bixonwe —akin.

16 Jatianra Eliseonin yoia iki: —Ramabi ea oinna itina Ibon janenkora en ikon yoiai, enra biamai —akin. Jaskáabi menikaskin Naamánman teaabira, Eliseonin biamaa iki.

17 Jatianra Naamánman yoia iki: —Jaskara iketian nato Israel mai, rabé burron papiti senen ea bomawe, nato min yonotininra jakiribi wetsa diosbo yoinabo menikin keyokin menoxontima iki, itan yoinaboribi retexon menitima iki, Ibo bichoresa en meniti iki.

18 Westíora jawéki akaitianres ea shinanxonyamanon ixonra, Ibo Dios en yokatai: Ja nokon apo ikonma dios Rimón rabii kaax, nokon ponyanki koshiax chirankooketianra, earibi ja ani xobonko chirankooti iki, jaskatai kopí Ibon ea ja shinanxontima —akin.

19 Jatianra Eliseonin yoia iki: —Jawe iamai jakonbires katanwe —akin. Naamánra moa jainoax kaa iki. Kakinra mai boa iki. Jawetio ochó moa kaketianra,

20 ja Eliseonin yonoti Giezinin shinanna iki: “Nokon ibonra, ja sirio joni Naamánman, ja bexona jawéki jawebi bixonyamakin raanke. Ibon janenkora en ikon yoiai, ishto kaxonra en chibani kaai, jaweki jaibakea en biti iki ixonra en oinni kaai”, iki ixon.

21 Jatianra Giezi Naamán chibani kaa iki; já pekáo kaaitian oinnaxa, ja bii jawen carromeax paketa iki, jatianra yokata iki: —¿Jakonma jawékiki winota? —akin.

22 Jatianra Giezinin aká iki: —Ikama, jawebira ikáma iki. Nokon ibonra mia yoiti ea raanke, rabé bakeranon ikon profetara Efraín mananmameax joke, jaskákinra min meninon ixon mia yokatai, kimisha waranka plata koríki, jainoax rabé chopa kexé moa sawetires —akin aká iki.

23 Jatianra Naamánman yoia iki: —Nato sokota waranka plata koríki biwé —akin. Naamánmanra binon ixon teaa iki, rabé saconra rabé chopa kexé betan niaxona iki, jaskáaxonra jawen yonoti rabé menia iki, ja Giezi boxoni jabé kanon ixon.

24 Mai keyá ikain nokóxonra, ja yonotibaon boai koríki bixon Giezinin, jawen xobon benxoa iki, jainxonra moa jato raana iki.

25 Japekaora jawen ibo Eliseo bebon kaa iki, jatianra yokata iki: —¿Jaweranoaxki mia joai Giezi? —akin. —Eara jaweranobi kaama iki —akinra Giezinin aká iki.

26 Ikaxbira Eliseonin yoikin jeneyamaa iki: —Wetsa joni mia bii jawen carromeax paketaitianra shinan meran mibé ea jain iká iki. Ikaxbi ramara jatian koríki itan chopa kexébo bitima iki, olivo waibo, uva waibo, carnerobo, waka benebo, ja yonoti jonibo itan ja yonoti ainbobo marotimatian riki.

27 Jaskara ikenra, Naamánman lepra isin rama miki winotai, itan min chiní bakebora jatíbitian jayá inoxiki —akin. Jatianra Giezi, Eliseoibakeax ochotax, akonbireskin lepra isinman yatana ikax, jawen yora waxmen keská joxoshaman iká iki.