9 Jatianra ja ainbaon jawen bene yoia iki: —Oinwe, nato jonira neno winotaitiibi noa oinni noiba nokotai, jara Diossen jakon profeta iki.

10 Jaskara iken xobo pekaten jawenabiribi iti, westíora chité axonon awé. Jaskáaxon jan oxati axonon awe, westíora mesa, westíora silla, westíora lámparara non jain axonti iki. Jatianra noiba merati joaxtiibi, jain iti iki —akin. Jaskara shinanxonra axonkana iki.

11 Jatian jain nokotax ja chitéain oxai banéxonra,

12 jawen yonoti Giezi yoia iki: —Ja sunamita ainbo kenawe —akin. Jatianra ja yonotinin ja ainbo kenaa iki, moa já bebon iketianra, Eliseonin jawen yonoti yoia iki:

13 —Akonkin noibaxon noa akinira ikoni mia noa kopí teeke, jaweki mia non axonti iki; mia akinnon ikax apo betan iamax sontárobaon koshi betan noa yoyo itinki mia keenti iki, akin awé —aka iki. Jatianra ja ainbaon yoia iki: —Eara, neno nokon kaibo betan jakonbires iki —akin.

14 Jatianra Eliseon Giezi yokata iki: —Jaskara ikenki ¿Ja ainbo kopí, non jawe ati iki? —akin. Jaskáketianra Giezin aká iki: —Enra onanyamake, jara bakeoma iki, itan jawen benera yosishoko iki —akin.

15 Jatianra Eliseon yoia iki: —Ja ainbo kenatanwe —akin. Jaskáa kaxonra ja yonotinin ainbo kenaa iki, jatianra joax ja ainbo xepotiain chankatina iki.

16 Jatianra Eliseonin yoia iki: —Wetsa baritia joaitonra, nato neteboribi mia westíora benbo bake ikoya inoxiki —akin. Jatian ainbaon neskáa iki: —Iamarake, nokon ibó, westíora Diossen joninra jawen yonoti ainbo paranti yamake —akin.

17 Jatianra Eliseon yoia keskati, ja ainbo tootax, ja wetsa baritia itin benbo bake pikota iki.

18 Jatianra ja bake ania iki. Wetsa netera jawen papa bimi tsekaibo betan iketian onni kaax,

19 sion iki peokoota iki: —¡Jawe iresaipanon, nokon mapo! ¡Nokon maponra ea chexai! —iki. Jatianra jawen papan westíora yonoti yoia iki: —Nato bake jawen titaiba botanwe —akin.

20 Ja yonotininra bake bixon, jawen titaiba boá iki, jara jawen titan bariapan kaman toaa iki. Jatianra ja bake mawata iki.

21 Jaskáketianra ja ainbaon ja profeta Eliseonin chité bochiki ikain boxon ja oxainko rakantaanan, pikókin xepoti xepobaina iki.

22 Jainxonra jawen bene kenamaa joketian, yoia iki: —Min yonoti westíora burro awinya ea raanxonwe, ea profeta Eliseo betan yoyo iki kanon. Ea ishton joríbatira jake —akin.

23 Jaskáketianra jawen benen yoia iki: —¿Jawe kopíki min ramabi oinni kaai? Oxe pikota benáma riki, itan sábado netemaribi riki —akin. Jaskáara ainbaon yoia iki: —Jara jawemabi iki, jaskara shinanyamawe —akin.

24 Jaskáaxonra ja burro awinin peyakati jato benxoamaxon, jawen yonoti yoia iki: —Moa kanonkawé. En mia yoiamabi, ea tsasikinyamawe —akin aká iki.

25 Jaskataxa ja ainbo, profeta Eliseo ikainko carmelo mananman nokota iki. Ochokeabi joai oinxonra, jawen yonoti Giezi yoia iki: —Oinwe, sunemhainoa ainbo riki.

26 Ishto kaxon jowé atanwe, jáki jawekeska iki, yokátanwe, jawen bene betan jawen bakeki jawekeska iki ixonribi yokátanwe —akin. Ja yonotinin kaxon yokatara, eara jakon iki, iká iki.

27 Jatianra Eliseo jain iká mananman nokóxon, jawen taenko ikota iki. Jaskáaketian moa jenemaira Giezi kaa iki, ikaxbira Eliseonin yoia iki: —Nato ainbo oinreswe, akonbireskin masá shinanni riki, ramakamanbira Ibon, jaweki winotai ixon ea yoiama iki —akin.

28 Jatianra ainbaon yoia iki: —Ibó, ¿Benbo bakeya ikaskinki en mia yokata iki? ¿Ea paranyamawe, akinki en min yokatama iki? —akin.

29 Jatianra Eliseonin, Giezi yoia iki: —Benxokaawe, nokon bastón biwé, moa jawen xobon katanwe. Kakin tsoa inonbi nokoxon, yoyo ayamawe, tson inonbi mia yoyo aka kewinyamatanwe. Jain nokoxonra nokon bastón ja baken bemanain min rakanti iki —akin. Jaskaara ja bastón biax moa ishto kaa iki.

30 Jatianra ja baken titan Eliseo yoia iki: —Ibon janenko itan mia kopira en ikon yoiai, nenoaxa miaoma ea kayamai —akin. Jatianra Eliseo ja ainbo betan kaa iki.

31 Jabo kaai kamanra Giezi, japari rekenkainxon, ja bake bastón berakana iki, ikaxbira ja bake jawekeskataxbi jiriamaa iki; jaskara iketianra Eliseo bechixon Giezinin yoia iki: —Ja jaskáati min ea yoia en akábira, ja bake jawebi koshiamai —akin.

32 Jatianra Eliseonin ja xobon jikixon oinna ja bake moa mawata iká iki, jawen oxatiain rakatara iká iki.

33 Jatianra ja chité chichó jikixon, xepoti xepoxon Ibo orana iki. Jainra ja bake betanbicho chichó iká iki.

34 Jatianra oxatiain mapetax ja baken perakaa iki, jawen kexa, jawen bero, jawen mekenra, ja bake ponte aká iki, ja baken yorara jawenaki kataxa iki. Jatianra ja baken yora xanai peokoota iki.

35 Jatianra Eliseo wenitax ja xobo napo oken kawanbekona iki; japekáora jakiribi ja oxatiain mapéxon ja baken yora jawen yoraki bitaxibia iki. Jatianbira kanchisi jatishan ixon, ja baken jawen bero chopea iki.

36 Eliseoninra, Giezi kenaxon yoia iki: —Ja baken tita kenawe —akin. Jatianra ja ainbo Eliseoiba joketian, yoia iki: —Natora min bake iki —akin.

37 Jaskáara ochómakainax ja ainbo, Eliseo naman menkota iki; jaskata pekáora jawen bake biax ja xobomeax pikókaina iki.