2 Yamékirishoko wenitaxa, ja jemanko jikitiain bai kexá yakákatitai, jatianra jatíbi jain nokotaibo, atikeskabiakin joi benxoanon ikax, ja join ianananax apoiba joaibo, jawerato jemameaxki joai ixon jato yokákatitai. Eara Israel joni iki akin ja jonin akára,

3 Absalónman yoikatitai: “Ikon riki ja min yokatara jaskara ati keskábi iki, itan jaskarakon iki, ikaxbira jan mia akinti apon imaa tsoabi yamake”, akin.

4 Jainxonribi jato yoikatitai: “¡Ea nato mainmea jato joi benxoai joni koshi ixonra, ja join ikábo eki bekanketian esekan yoiai keskáakin atikeskabiakin en joi benxoaxonkeanke!” akin.

5 Jainxoribira, já bebon chirankookin pataxkanketian, Absalónman jato meken menikatitai, itan ikóxonbo jato betsó akatiai.

6 Jatíbi israelitabo jakonhakin jato joi benxoaxonon ixon, apo benai boabora jato jaskáakatitai, jaskáaxonra israelitabo jaonbichoshaman keenkanon ixon jato biboa iki.

7 Ja chosko baritia senenketianra, Absalónman ja apo yoia iki: —Enra mia yokatai, ea Hebrónhain kaaitian ea min bake raanon ixon, ja moabi Ibo axonti yoia ixon, senenhai kakasi riki ea.

8 Nato min yonoti Siriain iká Gesurhain, janontianra, en Ibo yoia iki, ea jakiribi Jerusalénhain banémaketian, en já rabikin jakon jawéki meniti —akin.

9 Jatianra apon yoia iki: —Jakonnax katanwe —akin. Jatianra Absalón Hebrónhain kaa iki.

10 Ja kaai pikotamapari ixonra, jaweti ja joi boai jonibo, jatíbi Israel jonibo yoiti jato raana iki, jawetianki trompeta xoon ikai ninkákanai, Absalónra Hebrónhainoa apo ike iki saí ikanti.

11 Jainxonribira Jerusalénhainoa rabé pacha joni jato kenaa, jabora jakonshaman shinanya jabé bokana iki, ixonbira jaskara jawéki akí kaai onanyamakana iki.

12 Jaskaribiakinra Absalónman, ja David jan shinankiinai Gilo jemanko jaa joni Ahitofel kenamaa iki, yoina retexon Dios menoxonaitian akini jonon ixon. Jaskatira ja apoki jakonma shinanaibo bebon koshikaresa iki, jatianra Absalón chibanaibo kaikaresa iki.

13 Westíora jan joi boai jonira David yoii kaa iki, israelitabora Absalón akini ikanai ixon.

14 Jatianra Jerusalénhain jabé iká jatíbi joni koshibo Davidkan jato yoia iki: —¡Ramabi jabánon akanwe, iamakenbira Absalónman nokoa noa kenekaatima iki! ¡Bokanwe, ishtonkanwe, nokoxonra noa kikin jakonma anake, nato jemameara espadanin jatíbi noa reteti iki! —akin.

15 Jatianra apo yoikana iki: —Noara min yoia mia axontires iki —akin.

16 Jaskataxa jatíbi jawen xobonko ikaboyabi apo pikota iki, chonka jawen awinkomara, jainbi apon xobo koiranti jato potabainna iki.

17 Jatianra apo jatíbi jabé boaibo betan pikotax boax, ja jema senenain iká xobonkoniax, bonox jakonshamani benxokakana iki.

18 Jatíbi jawen joni koshibo, já pataxbi bokanaitianra, jatíbi ja apo koirannai cereteobo betan peleteobo, itan ja Gathainxon chibani bea sokota pacha geteobo, apo bebon joyotax bokana iki.

19 Jatianbira apon Gathainoa Itai, yoia iki: —¿Jaweakiki miaribi nobetan joá? Jakonra iti iki mia jakiribi kaa, ja bená apo betan itanwe, miara min mainmea wetsanko bekana iki.

20 Bakishbira mia nokoibake, ¿Jaweatiki rama ebé kawé akin en mia ati iki? Enbira jain kaai onanyamake, mia nobébi mawánaketian, jakiribi mia kaara jakon iti iki, min kaibobo jato botanwe. ¡Ibo jatíbitian mibé ixon, mia jakonhabanon! —akin.

21 Jatianra Itainin apo yoia iki: —Ibon janenko, itan min janenkora en ikon yoiai, mia jawerano inonbi, mawátimain iamax mawátiain inonbira, ja min yonoti jain iti iki —akin.

22 Jatianra Davidkan yoia iki: —Nobé jowé —akin. Jaskataxa Itai David betan kaa iki, jatíbi jawen jonibo, itan jabé boai jonibo betanbi.

23 Jatíbi jonibora ikonbiresi jaton apo kopi winikana iki. Cedrón weanra jatixonbi shitakana iki; jato pekáora apo David kaa iki, jatianra jatíbi jonibo já kaai bebon, tsoa jonibi jain jaama mananhori bai kaatonin bokana iki.

24 Jatianra ja senenhabekonti joi jain iká ani bonanti boai jatíbi israelitabo betan, Sadoc-ribi kaa iki, jatíbi jonibo ja jemameax pikókanai kamanra, ja ani bonanti sacerdote Abiatar patax akana iki.

25 Ikaxbira apon Sadoc yoia iki: —Ja Diossen esé jain iká ani bonanti, jakiribi ja jeman botanwe, Diossen oinna ea jakon iketianra, ea jakiribi jain kamati iki, jatianra ja ani bonanti, itan jain akanaribi en ointi iki.

26 Ikaxbi ea neno ikenbi, jawen keenma iketian ea yoiara jakon iti iki; itan jan oinna ea jawekeska akáki jakon iti iki, abánon ea jaskáakin —akin.

27 Jatianra sacerdote Sadoc apon yoiribia iki: —Mia, itan ja min bake Ahimaas jainoax Abiatar, jawen bake Jonatán, jabo betan jakonshamanres Jerusalén jeman katanwe.

28 Tsoa jonibi jain jayamainko iká paro benes shitabaintiainra, ea banéti iki, maton joi eki raana nokotai kaman —akin.

29 Ja Sadoc itan Abiatarninra, ja Diossen esé jain iká ani bonanti jakiribi Jerusalénhain boá iki, jaskataxa jain banékana iki.

30 Jatianra David olivos manan mapeti, onisai onanti inon ikax, sandaliaoma itan chopan mapotax wini wini kaini kaa iki. Jainoax jatíbi jonibo jabé mapeti boaibora chopan mapotax wini winibainiribi bokana iki.

31 Jatian ja Ahitofelribira, jakonma shinanai kopí Absalón betan rabéke, akin David yoikanara, ja Ahitofelnin ati shinanna keská iamanon ixon, Ibo Dios yokákin Davikan orana iki.

32 Jainoaxa David, jainxon Dios rabiti manan maxkaten nokotax, Husai arquita joni betan nokoanana iki, jara chopa waxábires itan mapo maibires iká iki.

33 Jatianra Davidkan yoia iki: —Mia ebé kaabira, nokona mia tee iti iki;

34 ikaxbi Jerusalénhain jakiribi kaxonra, Absalón neskáakin min yoiti iki: ‘Ea min yonotira, min papan yonoti ikátiai keskáribi min yonoti iti iki’ akin, jaskáxonra min ea akinti iki, jatianra ja Ahitofelnin ati shinanna jawéki min ras ati iki,

35 jaskataxa sacerdote Sadoc itan Abiatar betan mia rabéti iki. Jaskara ixon jatíbi jain apo iká xobonkoniax ikanai min ninkatabo min jato yoiti iki.

36 Jaton bakebo Ahimaas itan Jonatánribira jain iki, jaskara ixonra jabo meranxon, jatíbi jaskara jain winotaibo min ea yoiti iki —akin.

37 Ja David betan raenanai Husai, Jerusalénhain nokotaitianra, bená apo Absalónribi jikitoshita iki.