22 Jatianra Joab ja apo kikin iketian, mainbi bekepinon kaman já bebon beota iki, jainxonra neskáa iki: —Ichabires irake, ja en mia yokata, ea min ninkáxona kopí —akin.

23 Japekáora Joab Gesurhain kaa iki, Absalón Jerusalénhain beira kaa iki,

24 ikaxbi apon yoia iki; ea oinyamai min xobon katanwe. Jatianra Absalón moa apo oinyamai jawen xobonko kaa iki.

25 Jatíbiain Israel mainra, westíora jonibi Absalón keská metsá itan jan keenkanai joni yamaa iki, jara jawen taenkoniaxbi peokotax jawen mapo kaman jakon yoraya iká iki.

26 Baritia keyotaitiibira, boo nenkeirax maxkorokatitai, jakonshamankin toponara ja boo xatea rabé kilo winoa ikátiai.

27 Ja Absalónra kimisha benbo bakeya itan westíora ainbo bakeya iká iki. Ja bake ainbaon janera iká iki Tamar, jara iká iki kikinbires metsá.

28 Absalónra rabé baritia Jerusalénhain jaa iki, jatio basi jain ixonbira jawetianbi apo oinyamaa iki.

29 Westíora netera Absalónman Joab yoia iki, jawen toan apo ointanon ixon, ikaxbi Joab keenyamaa iki. Japekáora jawen rabé itin Joab, Absalónman yoiribia iki, ikaxbira katín keenyamaribia iki.

30 Jatianra Absalónman jawen yonotibo yoia iki: —Joabkan cebada waira nokon wai patax iki, kamentankanwe ja menoi —akin. Jaskáakin yoia boxonra, ja ati yoia keskáakin senenhakana iki.

31 Jatianra Joab, Absalón betan yoyo iki kaax neskata iki: —¿Jaweati ja nokon wai min yonotibo menomaarin? —iki.

32 Jatian Absalónman yoia iki: —Eara keena iki, apo oinni kaxon nato joi min yoitinin: ¿Jaweatiki min ea Gesurhainoa jomaa iki, ea ointinin keenyamakinbi? ¡Ea jainbi banetakayara jakon ikeana iki! Jaskara iken en mia yokatai riki, ea apo oinni kati, en jakonma jawéki aká iketian, abánon ea retekin —akin ati.

33 Jatianra Joabkan apo oinni kaxon, ja Absalónman yoia joibo keshana iki. Jainxonra Davidkan, Absalón kenati jato raana iki. Jatian moa nokotaxa Absalón mainbi bekepinon kaman beota iki, ikaxbira Davidkan wenintaanan bexeta iki.