Siba betan David yoyo ika
16
Manan maxka winobaini shoko orichaa kaxa, Mefibosetnin yonoti Siba betan David nokoanana iki. Ja iká iki rabé pacha pan, jainoax westiora pacha uva bimi chorisha aká bata pan, itan pacha yobín bimi joshinshaman, jainoax westíora bichi chomo uva xeati, ja rabé burron jakonshamanhakin axon boi.2 Jatianra apon yokata iki: —¿Jaweatiki nato min beai? —akin. Jatianra Siban yoia iki: —Ja burrobora apon awin jawen bakeboya jan peyakax kati iki; ja pan betan yobinra sontárabaon jawékiati iki, uva xeatira tsoabi jain jaama mananman kaai paxkinabaon xeati iki —akin.
3 Jainxonra apon yokáribia iki: —¿Min ibo Saúlnin babaki jawerano iki? —akin. Jatianra Siban yoia iki: —Jerusalénhainra baneke. Jawen papashoko ikátiai keskáribiakin, israelitabaon apo rama imakanti shinanni —akin.
Simeikan David jakonma winonon ixon shinanxona
4 Jatianra apon yoia iki: —Jakon riki, jatíbi Mifibosetkana ikátiaibora, rama moa mina iki —akin. Jatianra Siban yoia iki: —¡Jatíbitian min ea akinpainon riki! —akin.
5 Ja apo David Bahurimhain nokoketianra, westíora joni Saúlnin rarebo jaiba joá iki. Jara iká iki Guerákan bake, jawen jane Simei, janra jakonmakinbo jaki yoyo iananbi,
6 David itan jawen joni koshibo jato makanman tsakaa iki; jonibaon itan já koiranaibaon apo katea ikenbi,
7 já jakonmakin yoiira Simei neskata iki: —¡Nenoax katanwe, jakonma retemis!
8 ¡Saúlnin toan apo inoxon, jawen rarebobo jatíbi min retea kopí, Ibon mia masá tenema riki! ¡Ramara min bake Absalón Ibon apo imake, minbi jakonma aká kopíra mia neno iki, miara wetsa jawékima iki, miara retemis iki! —iki.
9 Jatianra Sarvianin bake, Abisainin apo yoia iki: —¿Jaweatiki nato ochiti mawakan mia jakonmakin yoiti iki? ¡Ramabira en texteai! —akin.
10 Ikaxbi apon jato yoia iki: —Sarvianin bakebó, jain jikiamakanwe, natora maton jawékima iki. Jan ea jakonmakin yoiti Ibon yoiara ibirai. Jaskara iketianki, ¿Jaweatiki min jaskara akai akin tson ati iki? —akin.
11 Jainxonra apon, Abisai jawen koshiboyabi jato yoia iki: —Ja nokon noi bakenbi ea retekasaitianra, ¡Ja westíora Benjamín joninkaya ea abiresti iki! ¡Oinreskanwe ea abánon jakonmakin yoikin, Ibonbi ea ati yoiara ibirai!
12 Jawekeska ixonra en rama masá teneai oinxon, Ibonbira, bebonbires jakonma raantitianbi, jakon jawékibira ea raanxonti iki —akin.
13 Jatianra David jawen joniboya moa kaa iki, Simeira manan tetani, David kaai benkex kaa iki, jakonmaakin yoiboi kakinra makanman tsakaananbi, mai potoboribi bochiki potaa iki.
14 Ja apo itan jabé boai jonibo Jordán paronko nokotara, kikinni paxkinabo ikana iki, jatianra jain tantikana iki.
Absalón Jerusalénhain jikia
15 Jaskákanai kamanra, Absalón, Ahitofel, itan jatíbi israelitabo Jerusalénhain jikikana iki.
16 Jatianra David jabé raennanai Husai arquita joni, Absalón, bechii kaax, saí ika iki: —¡Apo jabanon, apo jabanon! —iki.
17 Jatianra Absalónman yokata iki: —¿Mia neskataiki ja mibé raennanai David betan mia rabeta ikon iki? ¿Jawekopíki ja mia David betan kayamaa iki? —akin.
18 Jatianra Husaikan aká iki: —Eara kati atipanyamake. Jaweratoki Ibo Diossen, itan jatíbi israelita jonibaon katota iki, já betanra ea banéti iki.
19 Jainoaxibira, wetsa en teexonti iketian, ibanon ja ea jabé raenannaiton bake. Jaskara iketianra min papa axonkatitai keskáribiakin en mia teexonti iki —akin.
20 Japekáora Absalónman Ahitofel yokata iki: —¿Jawe non atiki maton noa eseai? —akin.
21 Jatianra Ahitofelkan Absalón yoia iki: —Min papan jain apo iká xobo koiranti potaa jawen awinkomabo yoranwe. Jatianra jatíbi Israel jonibaon min papa miki ramitai onankanti iki, jainoaxa jatíbi miibetan ikábaon bebonbires koshi shinankanti iki —akin.
22 Jatianra xobo pekaten Absalón carpa peotaxonkana iki, jainxonra jawen papan awinkomabo Absalónman jato yorana iki, jato akaitianra jatíbi israelitabaon oinna iki;
23 jaskara inontianra, Ahitofelnin jato esea, Diossenbi jato yoiai keská iká iki. Jaskáakinra ja David betan Absalónman, ja Ahitofelki shinanna iki.