Ibon esé jain iká ani bonanti Jerusalénhain Davidkan boti shinanna
6
Davidkanra jawen kimisha chonka waranka, Israel sontárobo, jatíbi ja katotabo jakiribi jato tsinkia iki,2 jatianra jatíbi jabé boai sontárobo betan, Judá main iká Baalá jemankoniax, Diossen esé jain iká ani bonanti boí Jerusalénhain bokana iki. Ja bonanti bebonxonra jatíbi atipana Ibo orankanai iká iki, ja iká iki ja querubin ángelbo meranxon jato jan ikinai.
3 Ja carreta benakanra Diossen esé jain iká ani bonanti nanekana iki, jaskáaxonra bokana iki, ja manan maxkaten iká Abinadabnin xobonkonia.
4 Ja Abinadabnin benbo bake Uza betan Ahioninra, ja Diossen esé jain iká ani bonanti carretanin ninibokin bokana iki, jatianra ja Ahio ja bebon kaa iki.
5 Ja boaitianra, David itan jatíbi israelitabo rekenain boí, arpabo, salteriobo, panderobo, castañuelabo, platillo akanaitian, jaton koshianixbi raroi Ibo Dios bebomeax, bewaananbi danzan danzanbainkana iki.
6 Boax nokokana iki jainxon trigo xemekanai Nacónhain iká Era akin akanainko, jainxonra wakabo tatí iketian, Diossen esé jain iká ani bonanti pakénaketian, Uzakan jawen mekenman tewanna iki.
7 Jatian jaskátima ikenbi Uzakan jaskáaketianra, Ibo Uzaki sináxon jainobi retea iki, jatianra ja Diossen esé jain iká ani bonanti pataxbi, Uza mawá paketa iki.
8 Ja Ibon Uza reteketianra, David sinata iki, jakopira Perez-uza akin jain janekana iki,a jara ramakamanbi ja janeya iki.
9 Ja netenbira Ibo bebonmeax David kikinbiresi raketi, saí ika iki: “¡Ibon esé jain iká ani bonanti, moa botira en shinanyamai!” iki.
10 Jatianra ja Ibon esé jain iká ani bonanti, Davidkan jeman moa bokashamakin, Obed-edomman xobonko boti jato yoia iki, ja joni iká iki Gathainoa.
11 Ja Ibon esé jain iká ani bonantira, kimisha oxe Obed-edomman xobonko iká iki, jatianra jatíbi jawen rareboboyabi Ibon jakonhakin shinanxona iki.
Ibon esé jain iká ani bonanti Jerusalénhain Davidkan boá
12 Jatian ja Ibon esé jain iká ani bonanti kopí, Obed-edom jawen rareboyabi, itan jawen jawékiabi Ibo Diossen jakonhakin shinanxona David yoikanara, David kaa iki ja Obed-edomman xobonko, jainoa ja Ibon esé jain iká ani bonanti, ja Davikan jemanko boira raroshaman iká iki.
13 Jatian ja Ibon esé jain iká ani bonanti bokin, sokotaakin bebon jamakanketian, Davidkan waka bene betan carnero xoashaman retexon menoa iki.
14 Lino chopa tari saweya kaaira, David jatíbi jawen koshianixbi danzana iki,
15 jatianra ja Ibon esé jain iká ani bonanti boí, jatíbi israelitabo betanbi raroi sáa ibainkana iki, itan trompeta xoon ikai meranbires bokana iki.
16 Davidkan jeman ja Ibon esé jain iká ani bonanti nokoketianra, Saúlnin bake Micalnin, ventananinxon oinna iki, ja apo David Ibo bebon ransai choronaitian oinxonra, kikinbiresakin jaki jakonma shinanna iki.
17 Ja Ibon esé jain iká ani bonanti boxonra, ja atinkobiribi akana iki, jainbiribi iti Davidkan axona carpa xobo chichó. Jatianbira Ibo betan raeanankin yoinabo jatiobi keyokin menoxona iki, itan wetsa jawékiboribi menia iki,
18 jatian moa jaskara akin seneaxonra jatíbi atipana Ibon janenko jonibo jakonhakin shinanxona iki,
19 jatian jain iká jatíbi israelitabo, benboyabi ainbobo, harina pan jato menia iki, dátiles bimi chorish aká pan jainxon uva bimi chorish aká pan. Jato jaskáa pekáora jatikaxbi jaton xobonko bokana iki.
20 Jatianra Davidkanbiribi jawen xobon kaxon, jawen rarebo jato jakonhakin shinanxona iki; ikaxbira Saúlnin bake, Micalnin ja joaitian bechii pikoxon yoia iki: —¡Israelbaon apo ikaxbira rama mia kikinbires jakonma ike, min yonoti ainbobo bebon, itan min yanka yonoti jonibo bebonra, wetsa jonibires keskati ikin chopabobi min jopéyonke! —akin.
21 Jatianra Davidkan yoia iki: —Ikon riki, eara ikonwanke ransai, ikaxbira Ibo bebon ea jaskata iki, janra min papan toan, itan jatíbi min rarebobaon toan, Israel jonibaon koshi iti ea katota iki. Jakopira já bebon ea ransai.
22 Ikaxbira rama iká bebonbires ea ikai, min oinna jakonmabires keská ikenbira, jabo yoikin min ea akai yanka yonokatai ainbobaon, ea kikin iketian jakonman rabikanti iki —akin.
23 Jatianra Mical jawetianbi bakeaisma baneta iki.