2 jatianra profeta Natán, yoia iki: —Min oinke, eara konxán aká metsá xobo meran jake, jaskara ikenbira ja Diossen esé jain iká ani bonantibiribi carpa pepan meranshoko iki. Jawen xobo akára jakon iti iki —akin.

3 Jatianra Natánman yoia iki: —Jatíbi jaskara ati min shinanna keská awé, jan mia akinnai Ibora mii betan iki —akin.

4 Ikaxbira ja yamébi, Natán Ibon yoia iki:

5 “Kaxon nokon yonoti David yoiwe, eara Ibon yoike: ‘Miama riki ea jain jati jan xoboaxonti.

6 Ja Egiptonkonia israelitabo en pikonontianbira, ramakamanbi, jawetianbi ani xobobaon ea jayamaa iki, jaskáyamaira carpa xoboshokobaonres ea jaa iki.

7 Jatíbitian ea jato betan inontianra, ja nokon joni Israelbo ikinnon ixon en jato imaa koshibo, tsoabi jawetianbi konxán jiwi ani xoboaxonti en jato yokáyamaa iki’.

8 Jaskara iketian, nokon yonoti David yoiwe, jatíbi atipana Ibo ixonra, en yoiai: ‘Chiké meranoara en mia bia iki, carnero tsamabo pekáo kawantanaitian, ja nokon Israel jonibaon koshi iti imanoxon;

9 jawerano mia kanonbira ea miibetan iká iki, jan mia akai jatíbi min rawíbora en jato keyoa iki, jaskáaxonra ja nato netemea kikin jonibo ikai keskáakin anibiresakin en mia ninkakamaa iki.

10 Jainxoribira nokon joni Israelbo jain iti moa en jato benxoaxona iki, jatianra jain en jato imaa iki, jaton jatinkobiribi ikannon ixon, jainoa tsonbi jato jakonmatimainko, moabi akátiai keskáakin jato masá tenematinkoma,

11 ja nokon Israel jonibo ikinti joni koshibo en jato imanontianra jaskara iká iki. Jatíbi min rawíbaon mia jaweatimara en mia imati iki. Jainxonra en mia onanmai, mia chiní bakeboya iti,

12 jain senenres jatínko nokotax mia mawáketianra, westíora min bake en apo imati iki.

13 Janra ea ani xoboaxonti iki, jatian ja en apo imaara jatíbitian iti iki.

14 Eara jawen papa iti iki, jatian jara nokon bake iti iki. Jatian jakonma jaweki aketianra, en masá tenemati iki, jainxonra en rishkiti iki, jatíbi bakebo jawen papan akai keskáakin,

15 Saúlra en akinkin jenea iki, ikaxbi miara en akinkin jeneyamai, jawen toan mia imati kopíra en pikoa iki.

16 Mia koshi iketianra min chiní bakeboribi, jatíbitian koshi iikaresti iki, nokon koshi shinanman koiranara mia ikoni iká iti iki. Jainoax ja min ani yakáti akanara jatíbitian mina iti iki’ ”, akinra aká iki.

17 Ja profeta Natánmanra, ja Ibon namá keska meran oinma, itan ninkámaa jawékibo jatíbi David yoia iki.

18 Japekáora Ibo yoyo aki apo David carpa xobo meran jikia iki, jainxonra yoia iki: “Ibó, ea itan nokon rarebobora, noa jawemabi iki, noa jaskairaakin min neno kaman nokómati.

19 ¡Ibó, jaskarabicho ipanankan ja nato min yonotinin chiní bakebo koshi iikaresti min yoia iki! ¡Ibó, tsoa joninbira min akai keskáakin ayamai!

20 Ibó, ¿Jamanyake ja min onanama en mia yoiti? Nato ja min yonotira min kikinhakin onanke.

21 Jatíbi ja nato ratétibiresbo min akára, jaskara ati yoia itan keena ixon min aká jawékibo iki, jaskarabo ionxon en onanti kopí;

22 nokon Ibó, jaskara ikaxa, ¡Mia kikinbires koshi iki! Tsoabira mia keska yamake, mia keskara wetsa dios yamake, jaskáakinra nonbishamanbo ninkata iki.

23 Min joni Israelbo keskára wetsabo yamake, ¡Jatobichoresiki nato mainmea wetsa jonibo keskáma! Mia, Diossé, min jonibo inon ixonra min jato pikoa iki, ani jawékibo itan ratéti jawékibo min jato axonara anibires ninkakataibo ikana iki. Ja Egiptonkonia kopíaxon min jato bia min jonibo bebonbira, ja wetsa mainmea jonibo, jaton diosboyabiakin min jato potaa iki,

24 jaskáaxonra Israel jonibo jatíbitian minna iti min shinanna iki, jainoax mia, jaton Ibo Dios iti iká iki.

25 Jaskara iketian, Ibo itan Diossé, min yonoti itan jawen kikin rarebo joni koshi ixon jato ikinti imati min yoia shinanbenoyamawe, ja min yoia senen awé.

26 ¡Min jane kikin ani rabikin jatíbitian shinankanai ibanon, jatíbi atipana Ibora Israel jonibaon Dios iki, iki ibakanon! ¡Min yonoti Davidkan, rarebo joni koshi ixon jato ikinaira min koirana jainbi taponax jenétima iki!

27 Mia, jatíbi atipana Ibó, minra ea onanmake nokon rarebobo jenéyamai jato ikinnai joni koshibo iikaresti; jaskara ikenra, min yonoti ixonbi, nato jawéki en mia yokatai.

28 Miara, Ibo Dios iki, min joibora ikonshaman iki, ea min yonoti akonbireskin noibatira min yoia iki;

29 jakon ixonra, min yonotinin rarebo jato ikinnai joni koshi ikaibo, min koirana jatíbitian ikanon ixon jakonhakin min jato shinanxonti iki. Mia, Ibo Dios ixonra, jaskara axonti min yoia iki, jatianra min jakon shinanxonatonin, ja min yonotinin rarebo joni koshi ikaibo, jatíbitian jakon ikanti iki”.