2 Saúl non apo ikenbira, mia iká iki, Israelbo jan akonkin jato akinnai. Jainxonribira, Ibon mia yoia iki, mia Israelbaon koshi ixon min jato ikinti”, akinbo.

3 Jaskataxa, jatíbi Israel joni koshibo apo David betan yoyo iki Hebrónhain bokana iki, jatianra Ibo Dios bebonxon ja senenhabekonti joi jan jato betan aká iki. Jatianra jabaon, Israelbaon apo iti imakin David xeni machíkana iki.

4 Kimisha chonka baritiaya ikáxa David apo iki peokota iki, jaskataxa chosko chonka baritia apo iká iki:

5 Kanchis baritia wetsa pochínikonra, Hebrónhain Judábaon apo iká iki, japekáora Jerusalénhainoax kimisha chonka kimisha baritia, jatíbi Israel itan Judakan apo iká iki.

6 Jebuseobo betan reteananira, apo David jawen joniboya, Jerusalénhain kaa iki, ja jonibora ja main jakana iká iki. Jatianra jawekeskataxbi ja jeman jikitima shinankin jebuseobaon, David yoikana iki: “Miara neno jikiti atipanyamake, benche itan nitikomabaonbira mia jikimatima iki”, akin.

7 Jaskáakanabira, koshi jema Jerusalén Davidkan jato bichina iki, jariki ja ramara Davidkan jema, akin akanai.

8 Jaskara inontianra Davidkan jato yoia iki: “Jatíbi jebuseobo akí boaibora, ja jene beai taen boxon, benchebo itan nitikomabo retekanti iki, jabora en akonbireskin omisai”. Jaskarainoaxa joai ja yoia: “Benche, itan nitikomabora Ibon xobonko jikikantima iki”, iki iká.

9 Jaskata pekáora koshishaman jemanko David jaai kaa iki, jatianra Davidkan Jema akin janea iki, jainxonra jema katemakin chiketa iki, ja jemaori iká mai xanken bochoakanainxon peoxonra, apo jain iká xobonko kaman aká iki.

10 Davidkan atipana koshira bebonkaresa iki, jatíbi atipana Ibo, jabé iketian.

11 Jaskákinra Tironkonia apo Hiramman, jawen toan joni koshibo Davidhiba raana iki, jainxonribira raana iki carpinterobo, makan chaxaibo, jain kakinra jabaon konxán jiwi bokana iki, jaskáaxonra David apo ikax jain iti metsá xobo akana iki.

12 Jatianra Davidkan kikinshamankin onanna iki, Ibonbi Israelbaon apo imaa, Israel jawen jonibo akinnon ixonra jawékinin bebonmaa iki.

13 Hebrónhainoax Jerusalénhain kaxonra Davidkan jainoa wetsa ainbobo awinhakin jato bia iki, jainoaxa wetsa jawen awinkomabo iti bixon jato bakea, benbo itan ainbo bakebo icha iká iki.

14 Jerusalénhainoax pikota bakebaon janera iká iki: Samúa, Sobab, Natán, Salomón,

15 Ibhar, Elisúa, Néfeg, Jafía,

16 Elisama, Eliada, itan Elifélet.

17 Jatianra David, Israelbaon apo inon ixon xeni machíkana ninkatax filisteobo jatikaxbi já benai bokana iki; ikaxbira jaskara onanax David tsoabi jain jikitima koshi xobonko kaa iki.

18 Jatianra filisteobo boax Refaim teshanpa ikain ikana iki.

19 Jakopíra onankaskin Davidkan, Ibo yokata iki: —¿Filisteoboki en moa jato peoti iki? ¿Jatoaresnon ixonki min ea akinti iki? —akin. Jatianra Ibon yoia iki: —Jenjen, jato awé, en amaara min jatoaresti iki —akin.

20 Jatianra David Baal-pirazimhiain nokota iki, jainxonra jatoaresa iki. Jakopíra neskata iki: “Kikinbires bai koshikeska ixonra Ibon nokon rawíbo jatoaresnon ixon ea bai kepenxonke”, iki. Jakopíra jain janea iki, Baal-pirazim, akin.

21 Jainxonra filisteobaon jatonbi ja rabiti aká jawékibo jenebainkana iki, jatianra Davidkanbiribi jawen joniboyaxon tsinkia iki.

22 Jawetio basi pekáora, jakiribi David betan reteananox, filisteobo ja Refaim mai teshanpain beax tsamáribikana iki,

23 jaskara iketianra onankaskin Davidkan Ibo yokata iki, jatianra Ibon yoia iki: —Pontébires kaxon jato peoyamawe, jato kateaketanxon ja bálsamo jiwi ikain nokoxon jato pekáorixon jato atanwe aka iki.

24 Nii xama xaa ikaitian ninkáxon, moa jato peowe, ja min ninkatara moa onanti iti iki ea mibebon kaai, jatianra filisteo sontárobo en jato reteti iki —akin.

25 Jatianra Ibon yoia keskáakin Davidkan aká iki, ja Gabaón jema ikainxon peoxonra Gezer jema kaman filisteobo jato retebokin jatoaresa iki.