Jatonbi ja rabiti aká jawekiboki koirameeti jato yoia
7
“Ja maton Ibo Diossenra, ja maton iboakin biti mainko mato jikimanoxiki, jainxonra mato bebonbires icha itan koshibo ikenbi, kanchis maibotiibi iká jonibo mato bebonmeabi jato potanoxiki, jabo riki: hititabo, gergeseobo, amorreobo, cananeobo, ferezeobo, heveobo jainoax jebuseobo.2 Jawetianki maton Ibo Diossen amaa, ja maibotiibi iká jonibo maton jatoaresai, jatianra maton jato keyoti shinanti iki, jawekeskaxonbira jato betan ja senenhabekonti joi maton atima iki, matonra jato noibatimaribi iki.
3 Matonra jato rareboatimaribi iki, maton bake benbobora, jaton bake xontakobo betan maton wanomatima iki, itan maton bake ainbobora, ja jonibaon benbo bakebo betan maton benomatima iki,
4 jabaon imaara maton bakebo, Iboki ochataanan wetsa diosbo rabikanti iki, jatianra ikonbiresi matoki sináxon Ibon ishtonbires mato keyoti iki.
5 Jaton jainxon ja atimabo rabikanai makan tsamabora maton reoti iki, jaton iresama makánbora maton toeti iki, ja rabikanai jiwi xate chankanabora maton poxati iki, jainxonra jatonbi ja rabiti akábo maton menoti iki.
6 Matobiribira, jawena iti maton Ibo Diossen onantiakin bia ikax, mato jawen jonishamanbo iki; nato mainmea jatíbi jemabo xarameara Ibon mato katota iki, iresama jonibo mato inon ixon.
Jatoshaman katota ixon Israelbaon ja senenhatibo
7 Ja matonshaman keenxon Ibon mato katotara, wetsa mainmeabo xewina icha iketian mato akáma iki, matora ja wetsabo xewina kikinshaman ichamashoko iki.
8 Diossenra Egiptonkonia mato pikoa iki, jainra kikini yanka yonokaataibo mato iká iki, jatianra faraónman mato iboaa ikenbi, jawen ani atipana koshin mato xabaa iki, mato noixonra, ja maton rekenbo axonti yoini senenhatin keena iki.
9 Onankanwe, ja maton Ibo Diossa jakaya ikon Dios iki, ja joni kaiboresaibo betanra ja senenhabekonti joi aká akonkin senenhai, já noixon jan ati yoia jawen koshi joibo senenhaibo betanra jaskara akai;
10 ixonbira já omisaibo jato keyoai, jaton akábo senenhamakinra jato akai. ¡Basiamakinra jan omisaibo jato masá tenemai!
11 Jaskara iken, ja anon ixon rama en mato yoia ja senenhati koshi joibo, ja ati esébo, jainoax ja koshibaon jato senenhamati joibo senenhakanwe.
Yoiti ixon jakon bitibo
12 Jaskáakin nato jaskara iti joibo ninkata pekáo, maton senenhai itan jan yoia akí mato axeai, jatianra Ibo Diossen senenhati iki, ja jato betan senenhabekonti joi aká, itan maton rekenbo axonti yoinibo.
13 Matora noiti iki, matora jakonhakin shinanxonti iki, jaskáaxonra mato akonbireskin kaimati iki, ja maton bakebo, maton banábo, maton trigobo, maton uva xeatibo itan maton xenibo, jainoax maton yoinabora mato jakonhakin shinanxonti iki, ja maton rekenbo meniti yoini mainko mato iketian.
14 Ja wetsa mainmea jatíbi jonibo bebonbires jakonra mato iti iki, ainbo iamax benbo bakeati atipanyamaara mato xaran yamati iki, maton wakaboribira benebo iamax awinbo bakeaismabo yamati iki.
15 Mato ayamanon ixonra, jatíbi isinbo, ja ani onsá jato abotankin masá tenemai isinbo, Ibon ochó imati iki, jaskara isinbo Egiptonko raana iníra matonbi kikinhakin onanke; jaskáayamakinra, maton rawibo jaskara isinbaon jato masá tenemati iki.
16 Ikaxbi maton Ibo Diossen amaa ja matonharessai jemabora, jatíbi maton keyoti iki; matonra jato noibatima iki, jaton diosboribira maton rabitima iki, jaskáaxbira mato jakonmain manóti iki.
17 Matonra shinanbirati iki: ‘Nato maibotiibira jonibo noa bebonbires icha ikanai; ¿Jawekeskáaxonki jaton ikáinoabo non jato potati iki?’ ixon.
18 ¡Jaskara ikanaibi, jatoki rakéyamakanwe! Faraón itan jatíbi egipciobo, maton Ibo Diossen jato aní keskáribiakinra, ja jonibo ati iki,
19 matonbira jaskara iníbo onanke, ja aní jawékibaon jato tanani shinankanwe, Egiptonkonia jato pikonontianra, jawen ani koshi jishtiakin pikoa iki, jaskáaxonra ja oinxon onanti jawékibo, itan jaskara iosma ratéti jawékibo aká iki. Jatíbi mato jaki raketai jemabora, jaskarabaonribi Ibo Diossen jato ati iki.
20 Jainxonribira, ja mawáyamai texeaboyabi ja jonetabo keyoti, Ibonra icha bina jatoki raanti iki.
21 Jaskara iken, jatoki raketi saki iamakanwe, mato jaskáti ikaxbira maton Ibo Dios, ja onsá itan ani Dios mato betan iki.
22 Jainmashamanra ja maibotiibi iká jonibo, Ibon potaboti iki, ja potábicho maton jato keyotira atikoma iti iki, maton jato akábira ja mato katemai iaketana inaatima yoinabo kaixon mato ati iki.
23 Ikaxbi ja maton Ibo Diossen mato amaara, ja maibotiibi iká jonibo matonharesti iki, jatianra jainmashaman aaboxon maton jato keyoti iki.
24 Jaton apoboribira moa maton jatoaresa ikax, mato naman ikanti iki, jatian maton jato keyoara nato netemeax tsoabi jatoakin shinanni itima iki. Maton jato akára tsonbi tewantima iki, jaskáaxonra akonbireskin maton jato keyoti iki.
25 Jaton diosbo jisaakin akana jawékibora maton menoti iki, ikaxbi jan rapoa oro itan koriki biax jayá iti shinanyamakanwe; jaskaraton keenti shinanbaonra mato jakonmain pakénake, maton jaskara akára Ibon oinna jakonmabires jawéki maton aká iti iki.
26 Jaskara iken, jakonmabires jawékibo maton xobon boyamakanwe, matoribira keyónake. Jabora moa keyokin ras ati iki, ja jawékibora jakonmabires iki ixonra maton shinanti jake.