2 Jainoaxibi benxokaawe bakish yamékiri Sinaí mananman mia mapénon, ja wetsabo xewinna keyá mananman kaax jain ebebon inóxiwe.

3 Tsoabira miibetan mapétima iki, jatíbi ja manan ikainra tsoabi itima jake; carnero betan wakaboribira xobi pii jain itima iki —akin.

4 Moiséssenra makan toexon rabé tabla reken iantana keskáribi aká iki. Ja wetsa nete xabata yamékirishoko, ja rabé makan tabla biax Sinaí mananman mapeta iki, ja Ibon jaskáti yoiibata keskati.

5 Jatianra Ibo nai koinman joax Moisés betan jain iká iki, jainxonra janbix janekaakin jawen janebi yoia iki.

6 Moisés bebon kawanira koshin yoyo ika iki: —¡Ea riki Ibo! ¡Ea riki Ibo! ¡Akonkin noibamis itan onísamis, ishtonbires sináisma, akonbireskin jato noia, ekira ikoni koshikanti iki!

7 Waranka kamanbi kaikaresti jaton chiní bakebora, jatíbitian jato noikin akonkin senenhai, jaskákinra jakonma aká ikenbi, yoitimakana itan ochakanabo ikenbi, moa jato shinanxonyamai; ikaxbira jakonma akábo oinresshamai, jaskara ixonra papabaon ocha kopi, jaton bakebo, jaton bababo, itan jaton bababaon bakebo jato masá tenemai —iki.

8 Jatianra ishtonbires maikibi bekepitaanan, Ibo rabii Moisés

9 neskata iki: —¡Ibo! ¡Ibó! Akonkin ea noixon ea akinti ikax, nobetan kawé. Nato jonibora ikonbires jaton keena keskáres akaibo iki, ikaxbi non ochabo aká ikenbi itan jakonmabo non aká ikenbi noa shinanxonyamawe, jaskáaxon min jonibo noa imawe —iki.

10 Jatianra Ibon yoia iki: “Ninkáwe, ramara ja senenhabekonti joi jatíbi jonibo bebonxon en akai. Nato main iká jemabaon tsonbi jaweranoxonbi akáma ratéti jawékibora en akai, jato xaran mato iká jatíbi jonibaonra, ratétibires jawékibo Ibon atipana oinkanti iki, jaskara ikaxa en mato betan akaibo ratétibiresbo iti iki.

11 Rama en ati yoiabora maton senenhati iki, jatianra mato bebonmea amorreobo, cananeobo, hititabo, ferezeobo, heveobo, jainoax jebuseobo en jato potati iki.

12 Jain mato ikí kaai main jikixonra, jain jaa jonibo betan ja senenhabekonti joibo maton atima iki, jaton jakonma jawekiainbo mato pakémakanaketian.

13 Jaskáayamakinkaya, jainxon yoina menoti makan tsamankanabo jato ras akanankanwe, jaskáaxon ja makanbo keyokin beshéakanwe, ja rabikanai jiwi xate chankatabo poxakanwe.

14 Wetsa diosbo rabiamakanwe, Ibora washimis iki. Jawen janera washimis Dios iki.

15 Ja main jaabo betan ja senenhabekonti jawe joibi ayamakanwe, jaton diosbo rabikin menikana jawékibo pikin, mato kenakanara atima ikenbi matonribi piax mato ochanake,

16 jaton bake ainbobora maton benbo bakebo betan wanomakanake, ja ainbobo jaton diosbo rabii ochakanketianra, akinkana jabaonribi rabiax, maton bakebo ochakanake.

17 Jawetianbi yami charaaxon ja rabitibo ayamakanwe.

18 Ja Levaduraoma axon piti panman fiesta akanwe, jaskaakin ati en mato yoia keskáakin akin, levaduraoma aká pan kanchis nete senen pitiakanwe. Jatianshaman maton ati riki ja Abib oxe, ja oxenra Egiptonkoniax mato pikota iki.

19 Jatíbi maton reken benbo bakebora, nokona iti iki, jaskáribiira jatíbi wakan reken bake benebo, carnero reken bake benebo, cabra reken bake benebo, nokona iti iki.

20 Burro awinin reken bake iketianra, ja burro bake bene menititianbi jawen toan carnero bake bene iamaxon cabra bake bene meniti iki; ikaxbi meniamakinra, ja burro maton texteti iki. Maton reken bakebo kopíra, maton jawéki meniti iki. Tsoabi jawebioma jotiyamake ea oinni joi.

21 Socota nete senenra mato teeti iki, ikaxbi ja kanchis nete itinra mato tantiti iki, banati itan tsekati ikenbira, mato tantiti iki.

22 Trigo rekeni bimia tsekati Semanabo, itan baritia keyotaitian tsekaxon ati fiestabo akanwe.

23 Jatíbi jonibora, bariatiatiibi kimishai Israelnin Ibo Dios bebon kati iki.

24 Mato bebonmea wetsa mainmea jonibo potaxonra, maton mai ani inon ixon en mato pextinhaxonti iki. Jatianra baritiatiibi kimishai maton Ibo Dios bebon mato iki kaketian, tsonbi maton mai noibakin bichinkaskinbo atima iki.

25 Yoina retexon, jimiabi meniamakanwe, jainxon pan levaduraya akáribi meniamakanwe, Pascuatian texea yoina, bakish neten ati texeayamakanwe.

26 Maton main, maton banaa ja reken iká bimi jakonshamanbora, maton Ibo Diossen xobonko maton boti iki. Jawetianbi ja cabra bene bake, jawen titan xoma jenenbi yoa ayamakanwe”, akin.

27 Jainxonra Ibon Moisés yoia iki: “Nato joibo wishawe, jabora mibé itan israelitabo betan ja senenhabekonti akai joi, jaki koshiai iki”, akin.

28 Jainra chosko chonka nete, itan chosko chonka yamé Moisés Ibo betan iká iki, piaoma itan xeaoma. Jainxonra ja rabé tablain ja senenhabekonti joibo wishaa iki, ja iki ja senenhati chonka esé.

29 Ja aká pekaora Moisés, ja esé tabla rabé bei, Sinaí mananmameax ipakea iki; ixonbira ja mananmameax ipakekin, ja Ibo betan ikax jawen bemanan peneta onanyamaa iki.

30 Jatian ja Moiséssen bemanan pené iketian oinnax rakékinra, Aarón itan jatíbi israelitabaon patáxshamakana iki.

31 Jaskákanaibira Moiséssen jato kenaa iki, jatian Aarón itan ja jemamea joni koshibo jaiba bekanketianra, Moisés jato betan yoyo ika iki.

32 Jaskata basimabira, jatíbi israelitabo bekanketian, Sinaí mananmanxon Ibon yoia jatíbi jaskara atibo Moiséssen jato yoia iki.

33 Moa jato betan yoyo iki senenaxa, chopan bepota iki.

34 Ibo betan yoyo iki jikiaitiibira, pikotai kaman Moisés chopan bepoyamaa iki. Jatian moa pikóxonra Ibon jaskara ati yoiabo israelitabo yoia iki.

35 Israelitabaon oinna Moiséssen bemanan pené iketianra, jakiribi chopan bepota iki, jakiribi Ibo betan yoyo iki jikiai kamanra jaskara chopan bepóya iká iki.