2 Jan mia botira nokon ángel en raanai, cananeobo, amorreobo, hititabo, ferezeobo, heveobo itan jebuseobora ja mainmea en jato potai.

3 Ja kikinbires icha jawékiati ja mai jakonhain botankanwe. Ikaxbira mato betan ea kayamai, bain kakinra en mato retenake, matora maton keena keská akai jonibo iki —akin.

4 Nato koshi joibo ninkataxa jonibo onískana iki, jatianra tsonbi jaton yami pené jan raotibo saweyamakana iki,

5 moa Ibon Moisés yoiara iká iki: —Israelitabo yoiwe: ‘Matora maton keena keskáres akaibo iki. ¡Mato betan iwanxonra, jatianbi en mato keyokin retekeanke! Ramabi maton yami pené jan raotibo jopékanwe, jatianra matoki en jaweati iki ixon en ointi iki’ —akin.

6 Jaskáxonra, Horeb mananmanxon peoxon, israelitabaon jaton yami pené jan raotibo moa sawekin jenekana iki.

7 Ja peotaati carpa bixonra, Moiséssen ja ikana ochochaa carpa xoboaxon janea iki, jainoax Dios betan nokoananti carpa xobo, akin. Jaweratoboki Ibo betan yoyo ikasai, jabora ja xobonko kaa iki, jara iká iki jain ikana carpa xobonkoniax ochochaa.

8 Jatian Moisés ja xobonko kaitianra, jatíbi jonibo wenitax jaton carpa peota xepikotinko charoxon, ja xobonko jikiai kaman Moisés oinkana iki.

9 Moisés ja xobo meran jikiketianra, nai koin joax ja xobo xepikotinko itoshia iki, ja Moisés betan Ibo yoyo ikai kaman.

10 Jatian jonibaon oinna ja nai koin joax ja xobo xepikotinko iketianra, westíorabo jaton peota xepikotibotiibi, já rabii chirankookana iki.

11 Diossa Moisés betan beibananax yoyo ikatiai, jabé raennanai joni betan ikai keskati, jaskata pekáora jain ikana peotain Moisés jokátiai. Ikaxbi ja bakeranon Josué ja Nunman bakera, ja xobo meranoax jawetianbi taxkeyamaa iki.

12 Moiséssenra Ibo yoia iki: —Ninkawe, nato jonibo bonon ixonra min ea yokatai, ixonbira tsoaki ebé kati min raanai ixon min ea yoiamai. Jainxonribi min yoike, akonkin jakonhakin jaweki en akai min kikinhakin ikonhai, itan ea jakonhakin akintiribi.

13 Nato min ea yoia ikon iketian, min jaskara anoxon shinanabo ea onanmawe, jatianra min ea akonkin akai en onanti iki, jainxonra miinra ea akinnai ixon en shinankin janetima iki. Shinanwe nato jonibora min jonibo iki —akin.

14 —Eabira mibé kati iki, jatianra en mia tantimati iki —akinra Ibon aká iki.

15 Ikaxbi Moiséssen yoia iki: —Miabi nobé katima ixon, nenoa noa raanyamawe.

16 Jaskati mia nobé kayamaitianki, ¿Jawekeskáaxon min jonibaon itan en onanti iki, minra noa akinnai ixon? Mia jaskaketianparira jatíbi nato mainmea jemabaon onankanti iki, ja min jonibo itan ea, noa wetsaresibi jonibo —akin.

17 Jatianra Ibon yoia iki: —Nato min ati yoiaribira en ati jake, enra mia akonkin ikonhai, jaskara ikax en mia akinti jakon iki —akin.

18 Jatianra Moiséssen teaa iki: —¡Min pené en oinnon ea beismawe! —akin yokákin.

19 Ikaxbira Ibon yoia iki: —Jatíbi nokon jakon min onannon ixonra en mia oinmai, jainxonra nokon jane min onantiakin en mia yoiai. En akasaibora en jato jakonhati iki, jainxonribira en akasaibo en jato noibati iki.

20 Enra mia onantiakin yoiai, eara min beisti atipanyamake, jan ea oinna jonira jawekeskataxbi jatima iki —akin.

21 Jainxon Ibon yoiribia iki: —Oinwe, nato epatax shanka ikátonin peníwe.

22 Jawetianki nokon peneyabi ea winotai, jatianra shanka kini meran en mia jikimati iki, jaskáaxonra ea winotai kaman, nokon mekenman en mia bepoti iki.

23 Japekáo nokon meken en jainoa tsekaketianra, nokon peká min ointi iki; ixonbira nokon bemanan min ointima iki —akin.