2 Jatianra Aarónman jato yoia iki: —Maton awinbo, maton benbo bakebo, maton ainbo bakebo, jaton oro paronotibo bichinxon ea neri bexonkanwe —akin.

3 Jatíxonbira ja sawea jaton oro paronotibo jopexon, Aarón boxonkana iki,

4 Jatianra Aarónman, oro bixon charaaxon cincelnin tsosabokin axon, waka bake jisá aká iki. Jaskáaketianra jatikaxbi neskákana iki: —¡Israel, nato riki min dios, janriki ja Egiptonkonia mia pikoa! —iki.

5 Jaskákanai oinxonra, jainxon yoina menoti, ja waka bebon Aarónman makan tsamana iki, jaskáaxa saii ika iki: —¡Ibo kikin shinankinra bakish non fiesta ati iki! —iki.

6 Wetsa nete xabata yamékiri wenixonra, yoinabo menikin jatiobi keyokin menokana, itan jan raeananti yoinabo retekana iki. Jaskáapekáora jonibo, piaananbi xeai yakákana iki, jainoax iorai raroi moa jakonmabo ionkana iki.

7 Jatianra Ibon Moisés yoia iki: —Naman katanwe, min Egitonkonia tsekaa min jonibora moa jakonma ikanke.

8 Basimabiresa jaskara akanti en jato yoia chibankin jenekanke. Oro charaaxonra waka bake akanke, ja rabianan jawékibo meniira ikanai, jainoaxa neskati yoyo ikanai: ‘¡Israel, nato riki min dios, jan riki mia Egiptonkonia pikoa!’ ikibo —akin.

9 Jainxonribira, Ibon Moisés yoia iki: —Nato jonibora en oinke, itan enra moa jato onanke, ikonbires jaton keena keskáres akaibora ikanai.

10 ¡Rama ea teareshamawe, eara kikinbiresi sináke, jaskákinra en jato keyoai! Ikaxbira mii meranxon ani jema en akai —akin.

11 Jaskataibira, Moiséssen jawen Ibo Dios neskara joibaon tantimakasa iki: —Ibó, ¿Jawe kopíki, ja min ani atipana koshin ja Egiptonkonia miinbi jato pikoa joniboki mia kikinbiresi sináti iki?

12 Ja egipciobora ikanti iki neskati: ‘Jakonma shinanxon, mananman boxon nato mainmea keyokin jato retenoxon Diossen pikoa riki, iki. Minra jabo jaskámati yamake’. Moa sinati jenewe, min jonibo ramiati shinan moa jenewe.

13 Shinanwe ja miinbishaman akonkin senenhati ixon ja min yonoti Abraham, Isaac, Israel, min jato neskaakin yoini: ‘Maton chiní bakebora kikinbires icha ikax naikanmea wishtintiibires inoxiki, jatíbi nato mai mato meninoxon en yoinira, jatíbitian matona inon ixon en mato meninoxiki’, akin min jato aní —akin aká iki.

14 Jatianra Ibon jawen jonibo ramianoxon yoia shinan moa jenea iki.

15 Jatianra Moiséssen ja mananmameax moa iipakekin, ja senenhati esé jain iká rabé tabla okenbekonbi wishaaya, tsomaxon bea iki.

16 Ja rabé tablabi, itan ja toxkotimaakin jaki wishaara iká iki Diossenbi aká.

17 Jatian ja jonibo saa ikanai ninkaxonra Josuénin Moisés yoia iki: —Ja ikanainkora reteanani saa ikanai en ninkake —akin.

18 Jaskáabira Moisésnin yoia iki: —Jatoaresax iti bewáma riki, nin jatoareskana onisi iti bewámaribi riki; ja ikanai en ninkatara wetsaresibi bewábo iki —akin.

19 Jatian ja ikanainko nokóxon waka bake meraax, itan ja ransakanai oinnax kikinbiresi sináxon manan tenaman ja tabla rabé Moiséssen potaara, beshékaina iki;

20 jaskaatananra ja wakaakana bixon chii tiritai meran potaa iki, jaskáaxonra potonon kaman renea iki, ja potora onpaxan meskoa iki; jaskáaxonra ja onpax xeanon ixon israelitabo yoia iki.

21 Jatianra Aarón yoia iki: —¿Nato jonibaonki mia jaweaka, jawe kopíki min jato ani ocha amaa? —akin.

22 Jatianra Aarónman yoia iki: —Nokon ibó, eki sináyamawe. Minra kikinhakin onanke, nato jonibo jakonma atin keenbo.

23 Jabaonra ea yoia iki: ‘Jaskara atibo noa jan yoiti noa dios axonwe, Egiptonkonia jan noa pikoa Moisésra jawe winóbirake, nonra onanyamake’ akin.

24 Jatianra en jato yoia iki: ‘Ja oroyabaon ea neri bexonkanwe’ akin. En jaskaara ea oro menikana iki, jara chii tiritaitonin en charaa iki, ¡Jaskáaxonra nato waka en aká iki! —akin.

25 Moiséssen oinnara iká iki ja jonibo, jan jato bechitenti yama, itan jaton rawibo jatoki shirokantibires, koiranti atipanyamaxon Aarónman jato jaskámaa ikáx,

26 jaskara iketianra jain ikana peotabo tsamata xepikotinko chankáxon jato yoia iki: —Ja Ibo betan rabetaibo, ebé tsinkiti bekanwe —akin. Jatianra jatíbi Levitabo jabé tsinkikana iki.

27 Jatianra Moiséssen jato yoia iki: —Israelnin Ibonra neskara yoiai: ‘Mato westíorabaon espada bikanwe, jain ikana peotabo ikain jakiribi botankanwe, jainoa ja xobobotiibi maton wetsa, mato jabé raenanai, ja mato patax ikábo, mato westíorabaon jato retetankanwe’ —akin.

28 Jatianra levitabaon senenhakana iki ja Moiséssen ati yoiabo, ja netenra kimisha waranka joni retekana mawata iki.

29 Jatianra Moiséssen jato yoia iki: —Jatíribibaon maton bake ikenbi, itan maton wetsa ikenbi maton reteketianra, já bebomea ikon ja axonai inon ixon mato Ibon koshi menike. Jaskara iketianra rama mato Ibon jakon shinanxonai —akin jato aká iki.

30 Ja nete xabaketianra, Moiséssen jonibo yoia iki: —Matonra kikinbires ani ocha ake. Ramara jain Ibo ikain ea mapéti jake, jawebi shinanxonyamakinki mato jaweatima iki ixon oinni —akin.

31 Jaskáxonra Moiséssen Ibo ikain jakiri kaxon yoia iki: —Jatonbi oro dios akax jonibo anibiresi ochacanara kikinbires ikon iki.

32 Enra mia yokatai, jaton jakonma akábo moa shinanxonyamawe, ikaxbi jaton jakonma aká shinanxonreskin, ¡Ja min wishaa kirika meranoa nokon jane soawe! —akin.

33 Jaskákenbira Ibon yoia iki: —Ja eki ochaaboresa nokon kirika meranoa en jaton janebo soati iki.

34 Jaskara iketian, jain jato boti en mia yoiainko jonibo botanwe. Mia boira nokon ángel mibé kaai. Jato ati nete nokoketianra jaton ocha kopi en jato masá tenemati iki —akin.

35 Jatianra Aarónman aká waka rabikana kopí, kikin jakonma jawéki ja Ibon jatoki raana iki.