2 Ja min toeyantana reken makanbaon iká joiboribira nato rabé makan panchakan en wishai, jabora ja ani bonanti meran min benxoati iki’, akin.

3 Jaskaketianra, acacia jiwi en ani bonantia iki, jainxonra en rabé makan panchaaka iki, jabo akáxa jayá ea mananman mapeta iki.

4 Jatianra Ibon ja tablabaon chonka ja senenhati joibo wishaa iki, ja mananman jatíbi noa tsinkita inontian, chii meranxon rekenhakin mato yoyo anontian ayantana keskáakinshamanribi. Jabora ea menia iki,

5 jatianra mananmameax ea ipakea iki; jainxonra ja makan panchabo ani bonanti meran en aká iki, Ibon jaskáati yoia keskáakin, jaskara ikaxa rama kamanbi jainpari iki”, ikira Moisés iká iki.

6 (Beerot-bene-jaacán ikainoaxa israelitabo moa bokana iki ja Móserain, jainoaxa Aarón mawata iki, jatianra moa miinkana iki, jaskáketianra jawen bake Eleazar jawen toan sacerdote iká iki.

7 Jainoax pikotax Gudgoda ikain bokana iki, ja Gudgodainoaxa, Jotbatahain bokana iki, ja mainra icha onpax jake.

8 Jatianshamanra ja Leví jonibo Ibon jato katota iki, ja senenhabekonti joi jain iká Ibon ani bonanti bokánon ixon, itan já bebonxon já rabiaibo ikanon ixon, jainxon jawen janenko, jakon ikánon ixon jato jakon shinanxoni yoyo inon ixon, jara ramatian kamanbi jabaon akai.

9 Jakopíra Levitabo jaton wetsabo xaran jawe maiomabi ikanai, jaton anibaona jatíbitian iboati mai bikanara yamake, ja Ibobi riki ja jatíbitian jayáti jaton biá, ja moatianbi jaskara iti Ibon jato yoia keská.)

10 “Chosko chonka nete, itan chosko chonka yaméra mananman ea iká iki, ja rekeni inontianra ea jaskáribia iki, nato jakiribi inontian en yokatara, Ibon ea ninkáribia iki, jakopira mato keyotinin keenyamaa iki,

11 jaskákinra ea yoia iki: ‘Katanwe, benxokaaxon jato iotanwe, ja moatianbi maton rekenbo meniti en jato yoini mai jato bichinax, jain mato janon’ akin.

12 Jatian ramakan, israelitabó, ¿Jawe atiki mato Ibo Diossen yokatai? Jawemakan mato jakires rakéti, itan jatíbi jan yoiabores akin maton jenetima; jatíbi maton shinanyaxonbi maton noiti, itan jatíbi maton kayayaxonbi maton rabiti,

13 jainxon jakon janoxon jan yoia joibo, itan jawen esébo maton senenhati.

14 Shinankanwe, maton Ibo Diossena riki ja naibo, itan ja nai kikin keyábo, jainoax ja mai itan jatíbi jain ikábo.

15 Jaskara ikenbira maton rekenbaon keenxon, Ibon jato noia iki, japekáora ja mato jaton chiní bakebo katota iki, wetsa jemabo xaramea, jaskara iti iketian mato akára rama non ointi atipanke.

16 Ja onanti inon ixon jato betan senenhati aká joi, maton jointiain akanwe, itan maton keena keská akin moa chibanyamakanwe,

17 jaskara ikaxa ja maton Ibo Dios, diosbaon Dios iki, itan ibobaon Ibo iki, jara jabicho jatíbi xewina koshi Dios iki, jara koshibires itan onsá iki, jatíbira senenbires jato jakonhai, tsonbira kopíaxon jawéki amati atipanyamake,

18 kachiana itan benomaatara atikeskabiakin jato jakonhai, jainxonra ja mato xaran iká wetsankoniax joa joni noixon, ja jawékiati betan ja saweti meniai.

19 Jaskara iketian ja wetsankoniax joá joni noikanwe, matoribira wetsankoniax Egiptonko kaa iká iki.

20 Maton Ibo Dioski rakékanwe, jainxon jabi chores rabikanwe; ikonshaman ponté ixonkanwe, jainxon jawetianki akonkin senenhati ixon maton jato yoiai, jawen janenko akanwe.

21 Jaskara ikaxa Dios iki ja maton rabiai, jara maton Dios iki, ja ani jawékibo itan ja ratéti jawékibo jan aká maton oinnara, mato kopí aká iká iki.

22 Maton rekenbo Egiptonko nokókanontianra, kanchis chonka jonibichores ikana iki, ikaxbi ramara maton Ibo Diossen kaimaa, mato naikanmea wishtíntii icha iki.