2 “Nokon yonoti Moiséssa moa mawáke, jaskara ixonra rama min jatíbi Israel jonibo jato Jordán paro shitakinti iki, jaskataxa en mato mai meniainko mato kati iki.

3 Ja Moisés en yoini keskáakinra, jatíbi ja maton taen jamatai mai en mato meniti iki.

4 Ja mato en meniti mai riki, tsoa jonibi jain jaama mananhinoax peookotax Líbano mananyabi, jainoax aniparo Éufrates kaman, itan jatíbi hititabaon maiyabi, jainoax aniparo Mediterráneo kaman.

5 Tsonbira mia jaai kaman, reteanankin miaarestima iki, ea Moisés betan ikátiai keskáribira ea mibé iti iki, enra mia potatima iki, jawetianbira en mia jenetima iki.

6 Rakéma itan koshi shinanya iwé, minra nato jonibo mai menipaketi iki, jara maton rekenbo en jato meninoxon yoini iki.

7 En mia yoiai riki, rakéma itan koshi shinanya mia iti, jainxonra jatíbi ja nokon yonoti Moiséssen mia esé meniabo, min senenhati iki. Ja esekan yoiai keskáshaman min senenhaitianra, jatíbi ja min akai jawékibo jakonbires kati iki.

8 Ja Diossen esé kirika meran yoiaibo, banebanekin nete itan yamé yoyo axon shinankin jan yoiai keská akí jatíbitian jawé, jatianra jatíbi min akaibo jakon pikóti iki.

9 Ea riki jan mia raanai, rakéma itan koshi shinanya iwé. Rakéyamawe itan min shinan yosmayamawe, ea riki min Ibo Dios jaweranoki mia kaai, jainribira ea mibé iti iki”, akin.

10 Jatianra ja jema koshibo Josuénin neskáakin jato yoia iki:

11 “Jatíbi carpa peotabo ikain kaxon jato yoitankanwe, ja boti jaton jawékiati jawékibo moa benxoakanon ixon, nenoax kimisha netera non Jordán paro shitai kaai, ja non Ibo Diossen noa meniai mai binoxon”, akin.

12 Jainxonribira, Josuénin Rubenman rarebobo betan Gadnin rarebobo, jainoax jatíribi naponbekon senenres Manaséssen rarebobo jato neskáakin yoia iki:

13 —Shinankanwe, Ibon yonoti Moiséssen mato jaskáti yoini, matora maton Ibo Diossen yoia iki, ja mai biax jain jaax moa mato tantinon ixon.

14 Ja maton ainbobo, maton bakebo itan maton yoinabo nenobi jenekanwe, ja nato mai mato Moiséssen Jordán keiba meniniori. Ikaxbi jatíbi ja reteananti atipana jonibora, jayakax reteananti jawekibo biax, jaton kaibobo reteananatiain akini jato bebon bokanti iki,

15 jain tantiti Ibon jato mai meniai kaman, mato aká keskaribiakin, jatianra jaboribi Ibon mai menia, moa ibo banékanti iki. Japekáora maton mainko ja paro bari pikotaiori ikáo mato banéti iki, ja Diossen yonoti Moiséssen jatíbitian matona inon ixon mato mai meniniori —akin.

16 Jatianra jabaon yoia iki: —Non abánon jatíbi ja min yoia keskáakin, jaweranoki min noa raanai, jainra noa kati iki.

17 Ja moatian non Moisés ninkáxonkatiai keskáribiakinra, mia non jatíbitian ninkáxonti iki. Jaskara iketian mia non yokatai riki, ja Moisés betan ikátiai keskáribi ja min Ibo Dios mibé ikára jakonhira iti iki ixon.

18 Jatíbi ja min ati yoiabi miki yoitimaibo, itan ja mia ninkáxonkashamaibora non jato reteti iki. Jaskara ixon mia non yoiai riki, mia rakéma itan koshi shinanya itires —akin.