Paranaxon Jericó jema ointi Josuénin jato raana
2
Sitimhainxonra Josuénin rabé joni paranaxon Jericó jema ointi raankin jato yoia iki: “Botankanwe jawekeska mairin, itan jawekeska jemarin ixon Jericó jema oinni”, akin. Jabo boaxa Jericóainoa westíora tsini ainbaon xobónko nokókana iki, jawen jane iká iki Rahab, jainra ja yamé oxakana iki.2 Ikaxbi wetsaxon Jericó apo keshankin neskáa iki: —Jaweti israelita jonira joke, nato yamé paranaxon nato mai oinni —akin.
3 Jatianra apon Rahab neskáakin yoiti jato raana iki: —Ja mia oinni bea ja min xobonko iká jonibora min jato pikoti iki, jabo ronki nato mai oinni beabo iki —akin.
4 Ikaxbi jato jonea ixonra, yoia iki: —Ikon riki jaweti jonira eiba bekana iki, ixonbira jaweranoaboki ikanai ixon en jato onanyamaa iki.
5 Moara yametaishokobi bokanke, ja hora jema xepoti moa xepokanai iketian, enra onanyamake jaweranora bobirakanke. Ikaxbi ramabi chibani boxonra, maton jato nokoti iki —akin.
6 Ikonra iká iki, ja ainbaonra jawen xobo pekaten jato mapémaxon, lino nishi choshinon ixon tsamá meran jato jonémaa iká iki.
7 Apon jonibaonra Jordán paro nashitatinko kaman jato chibankana iki. Ja sontárobo pikóbaina pekáobira xepóti xepokana iki.
8 Jatian ja paranaxon oinni beabo oxaamatianbira, jato ikain mapéxon Rahabnin jato yoia iki:
9 —Enra onanke nato maira Ibon mato menia iki, jakopíra noa ikonbiresi raketai. Jatíbi neno jabora ikonbiresi rakékanai.
10 Nonra onanke mato Egiptonkoniax pikónontianra, Diossen mato shitánon ixon joshin aniparo mato jene tsosinmaxona iki. Jainxonribira non onanke, Jordán paro keiba iká rabé amorreobaon apo Sehón itan Og, yamatiakin maton retea iki.
11 Jaskarabo onanax ikonbiresi rakékinra, mato betan reteanantibobi tsonbi shinanama iki. Ja Ibo, ja maton Dios iki bochiki naikanmea, itan nato naman iká mainmea Diossibi.
12 Jaskara kopíra, en mato yokatai akonkin senenhanoxon nenonxonbi maton ea yoiti, ja Ibo kopi nokon rarebobo maton jakonhati, en mato jakonha keskáribiakin. Jatian ikoni mato ikai en onannon ixon ea westíora jawéki axonkanwe,
13 jainxon, nokon papa betan tita, nokon poibo, itan nokon wetsabo jaweayamakin maton jamati iki, jainoax jatíbi jato betan ikáboribi. ¡Mawáti ikenbi noa kishpinmakanwe! —akin.
14 Jatianra jabaon yoia iki: —Mato janon ikax noa ibanon mato kopi mawati, ikaxbira nato jawéki mia keshatima iki. Jawetianki nato mai Ibon noa meniai, jatianra akonkin, mia non jakonhai onanti senena iti iki —akin.
15 Rahab iká iki, ja jema chike maxkatenbi westíora xoboakanaton jaa, jainxonra westíora risbí ventananin paninxon jato pakémaa iki.
16 Jaskáxonra jato yoia iki: —Ja mato benaibaon nokonaketian mananman botankanwe. Jainra mato kimisha netepari jonéti iki, jan mato benaibo nato jeman banékanai kaman. Japekáora mato karibati iki —akin.
17 Jatian jabaon yoia iki: —Nonra mia akonkin senenhaxonti iki, ja min noa jaskáti yokata keskáakin.
18 Ikaxbi jawetianki nato main noa jikiai, jatianra jan noa pakémaa ventananin, min joshin risbi paninti iki. Jainxon min xobonko jato tsinkiwe, min papa, min tita, min poibo jainoax jatíbi min papan kaibobo.
19 Jaweratoboki ja min xobonkoniax pikotai, jabora jatonbinix mawáti iki; ja jaskataibora non imaama iti iki. Ikaxbi tsonki, ja min xobon ikábo meetai, nonra jabo ointi iki.
20 Ikaxbi nato jawéki min jato keshanketianra, nonribi ja mibé akonkin senenhanoxon mia non yoia jawéki non senenhatima iki —akin.
21 —Non jaskara akára jakon iki —akinra ainbaon aká iki. Jainxon jato raanara, moa jaabo bokana iki. Japekáora, ainbaon ventananin moa joshin risbi nexaa iki.
22 Jatian ja paranaxon oinnai rabéra mananman kaax, kimisha nete senen jain jonékana iki, ikaxbi sontárobaonra jatíbiain benakinbi jato nokoyamaa iki, jainoaxa moa Jericóain banéribikana iki.
23 Jatianra ja paranaxon oinnaibo, mananmameax ipakexon paro shitakana iki, jainoax banébaini boax Josuéiba nokóxon, jatíbi ja winota jawékibo yoikana iki.
24 Neskáakinra yoikana iki: “Jatíbi ja maira moa noa Ibon menia iki. Jaskara ikaxa, jatíbi ja main jaa jonibo, moa raketen mawataibo iki”, akin.