2 Jainoax kimisha nete winota pekáora, joni koshibo carpa peotabo tsamatainko bokana iki,

3 jainxonra israelitabo neskákanon ixon jato yoikana iki: “Jawetianki ja Ibon ja senenhabekonti joi jain iká ani bonantia, ja levita sacerdotebo winotai maton oinnai, jatianra ja mato ikainoaxbo pikóxon, maton jato chibanti iki.

4 Jatianra maton onanti iki jaweratonki mato kati iki ixon, jawetianbira mato westíorabi moatian ja bain kayosma iki. Ikaxbira, ja ani bonanti ochóma mato katima iki, jatíbitianra mato japekáo banéti iki, ja ikainko nokóti westíora kilómetro maxkatainko”, akin.

5 Jainxonra Josuénin jato yoia iki: “Maton yora mekebainhanan chokitax itan maton shinanyanixbi benxokakanwe, Ibon bakish mato bebonxon jaskara iosma jawéki akaira maton ointi jake”, akin.

6 Jainxonra sacerdotebo yoia iki: “Ja senenhabekonti joi jain iká ani bonanti bixon, ja jonibo bebon paro shitakanwe”, akin. Jatianra sacerdotebo ja senenhabekonti joi jain iká ani bonanti biax, jonibo bebon shitákana iki.

7 Jatianra Ibon Josué yoia iki: “Rama peokootax mia kikin iikaresaitianra israelitabaon mia oinkanti iki. Jaskáaxonra jabaonbi ointi iki, ea Moisés betan ikátiai keskáribi, ea mibé iketian.

8 Minra sacerdotebo yoiti iki, ja senenhabekonti joi jain iká ani bonanti boaibo, Jordán paro kexa nokotax, jain neníkanon ixon”, akin.

9 Jatianra Josuénin israelitabo yoia iki: “Neri bexonpari ninkati bekanwe, ja maton Ibo Diossen yoiai.

10 Ja jiria Diossa noo napon iki ixon, maton onanti kopíronki, mato kaaitian cananeobo, hititabo, heveobo, ferezeobo, gergeseobo, amorreobo, jainoax jebuseobo jato keyokin potaboti iki.

11 Oinkanwe, ja jatíbi nato mainmeabaon Ibon ja senenhabekonti joi jain iká ani bonanti, mato bebonbi Jordán paro shitamakanaitian.

12 Jaskara ixon, rama katókanwe chonka rabé joni, ja chonka rabé tsamá Israelnin rareboboibakea westíorabo.

13 Jatian ja nato mai Ibon esé jain iká ani bonanti boai sacerdotebaon, jaton tae jenenko moa nenanketianra, paro jene chopéti iki, ani chiké keskara wetsaoribicho tsamáti iki, rebokiaxa moa jene baitima iki”, akinbo.

14 Israelitabora jain jaton carpa peota ikainoax, paro shitai boi jokonkana iki, jatianra ja senenhabekonti joi jain iká ani bonanti boai sacerdotebo jato bebon kaa iki.

15 Jatian ja yoabo tsekatitianra, Jordán jenetiata iká iki. Jaskara ikenbi jato sacerdotebaon paro kexa nokóxon jaton tae jenenko aká mechaketianbira,

16 rebokiax jene baiti jeneta iki, jaskara winotara ja Saretán patax iká Adam jemainoax ja ochóbires iká iki. Jainoaxa aniparo mawatakiri boai jene, jaki boi keyotai kaman baita iki. Jaskatax paro jene chopéketianra, israelitabo Jericó jema bebon shitákana iki.

17 Jatíbi jonibora Jordán paro tsosina manxanshamantonin shitákana iki, jaskákanai kamanra, Ibon ja senenhabekonti aká joi jain iká ani bonanti boai sacerdotebo, mai manxaman taxkéyamai charókana iki, ja Jordán paro naponbekon.