2 “Katówe chonka rabé joni nato jemamea, já rarebobires tsamatainkonia westíorabo,

3 jainxon jato yoiwe, ja sacerdotebo jain chankata paro naponbekonmea, chonka rabé makan bikanon ixon, ja boxonra nato yamé mato jain tantiainko akanti iki”, akin.

4 Jatianra Josuénin ja chonka rabé katota jonibo kenaa iki,

5 jainxonra jato yoia iki: “Jordán paro naponbekon botankanwe, non Ibo Diossen esé jain iká ani bonanti bebon, jainoara westíoraxonbo, westíora makanbo iaxon maton beti iki, ja westíora tsamá Israelnin rarebobotiibi iti kopíra iti jake chonka rabé makan,

6 jara itiki westiora jaweki maton ja oinxon onanti, iikaxon maton bakebaon mato yokáti iki: ‘¿Jawe yoii ikárin nato makánbo?’ akin.

7 Jatianra maton jato yoiti iki: ‘Ja Ibon ja senenhabekonti joi jain iká ani bonantiaxon Jordán paro shitakanontianra, jato bebonmeaxbi paro jene chopetax oken ibékona iki. Jaskara ikenra israelitabaon nato makánbo oinxon jatíbitian shinankanti jake, nenoax jaskara winóni jawékibo’ ”, akin.

8 Jatianra Josuénin yoia keskáakin jabaon aká iki. Ja Jordánhainoara chonka rabé makan bikana iki, ja jatí tsamá Israelnin rarebobotiibi, jainxonra boxon ja carpa peotainko tsamankana iki, ja Ibon Josué yoia keskáakin.

9 Jaskáribiaxonbira, Josuénin wetsa chonka rabé makan tsamana iki, ja senenhabekonti joi jain iká ani bonanti boai sacerdotebo jain ikanainko. Ja makánbora ramakamanbi jainbi iki.

10 Ja senenhabekonti joi jain iká ani bonanti boai sacerdotebora, Jordán paro naponbekonshaman ikana iki, ja Josuénin jaskara ati, Ibon yoia israelitabaon jatíbi jawéki akanai kaman. Jatíbi ja akanaibora, Moiséssen Josué ati yoia keská akana iki. Jainoaxa jonibo moa ishtonbires shitákana iki,

11 jaskati moa jatikaxbi keiba shitákana pekáora, ja Ibon ani bonanti boai sacerdoteboribi shitatax, jakiribi moa jato bebon bokana iki.

12 Jainoaxibira ja reteananti onanbo, ja Rubenman rarebobo betan Gadnin rarebobo, itan jatíribi Manaséssen rarebobaonribi paro shitakana iki. Jabora shitákana iki moa reteanantires, ja Moiséssen jaskáti yoia keskatira wetsa tsamá israelitabo boai bebon bokana iki.

13 Irabiraa iki chosko chonka waranka joni, ja jayakax reteanantiabo, ja moa reteanantires ikax Ibo bebon boira, Jericó mai teshanpaori bokana iki.

14 Ja netebaonra Ibon jatíbi Israel jonibo ratémaa iki, jainxonra Josué kikin shinannax jaki rakékantiribi jato imaa iki, ja Moisés janontian akátikanai keskáribi itiakin.

15 Jatianra Ibon Josué yoia iki:

16 “Ja senenhabekonti joi jain iká ani bonanti boai sacerdotebo, moa Jordán paromeax bekanon ixon jato yoiwe”, akin.

17 Jatianra Josuénin moa bekanon ixon jato yoia iki,

18 jatian ja Jordán paromeax mapetax, moa main ja sacerdotebo niketianribira, ja paro jene moa ipachoai keskáribi jenetiax moa baita iki.

19 Israelitabora Jordánhainoax, reken oxe chonka neteya iketian pikókana iki, jainoaxa Jericóainxon oinna bari pikotaiori iká Gilgal jemanko banékana iki.

20 Jainra Josuénin ja chonka rabé makan Jordánhinoa bekanabo tipina iki,

21 jainxonra israelitabo yoia iki: “Iikaxonra maton bakebaon mato yokáti iki. ‘¿Jawe yoii ikarin nato makanbo?’ akin.

22 Jatianra maton yoiti iki, jawekeskataxki israelitabo Jordán chopeketian, mai manxanshamantonin shitáni ixon,

23 itan jawekeskaxonki Ibo Diossen mato shitánontian Jordán jene tsosinmaa iki, ja moatian joshin aniparon noa shitánontian aní keskáribiakin, ixon.

24 Jatianra jatíbi nato netemea jonibaon, ikon riki Ibo koshi ixon onankanti iki, jainxonra jatíbitian maton Ibo Dios kikinhakin shinanxon rabikanti iki”, akin.