Gilgalhainoa carpa peota
5
Jatíbi ja Jordán paro bari kaiori iká amorreo apobo, itan ja aniparo Mediterráneo ochóma iká cananeo apobaonra ninkákana iki, Israelbo shitánon ixon Ibon jato Jordán paro tsosinmaxona, jaskara ninkatax ikonbiresi rakékinra, israelitabo bekanaitian jato bechitetibobi shinanyamakana iki.2 Jatianra Ibon Josué yoia iki: “Jaweti chichika makan awe, jaskáaxon moa akátiai keskáribiakin, israelitabo jaton jakina rebichi xatexonwe”, akin.
3 Jatianra Josuénin chichika axon Aralot mananmanxon israelita benbobo, jaton jakina rebichi xatexona iki.
4 Ja jaton jakina rebichira jato xatexona iki, ja Egiptonkoniax pikókanontian moa sontaro iti baritiayabo iníbo, ja tsoa jonibi jain jaama mananmameax moa mawákanabo iketian.
5 Jatian jatíbi ja Egiptonkoniax pikotax beaibo, moa jaton jakina rebichi xatéyabo ikainbira, ja tsoa jonibi jain jaama mananmameax pikotabo akanama iká iki.
6 Ja israelitabo chosko chonka baritia tsoa jonibi jain jaama mananman ikannontianra, ja Egiptonkoniax pikotax beaibo jatíbi ja sontáro kati baritiayabo moa mawákanabo iká iki. Ja jonibaonra Diossen yoia ninkáxonyamakana iki, jakopíra janbi jato yoia iki, ja maton rekenbo mai meninoxon en yoinira maton ointima iki, ja maira ikonbires jakonhira ikax kikínbiresi yoábo xoxoai iki, akin.
7 Jaskara iketianra, Josuénin ja jonibaon bakebo jaton toan iti jaton jakina rebichibo jato xatexona iki, Ibon imaabo iketian, jatian jabora moa bekanai kopí, moabi jaton jakina rebichi xatexonyamakana iki.
8 Jatian moa jatikaxbi jaton jakina rebichi xatéyabobires ikaxa, jato benxoai kamanpari carpa peota meran tantii banékana iki.
9 Jatianra Ibon Josué neskáakin yoia iki: “Nato maton jakina rebichi xateatonra, Egiptonko yanka yonokatai ikax rabínti iitainbi moa mato bichinke”, akin. Jakopira rama kamanbi jain, janekanai Gilgal, akin.
10 Ja Gilgalhainxonra Israelbaon, oxe chonka chosko neteya iketian, Jericó mai teshanpainxon yantanpake Pascua fiesta akana iki.
11 Ja neteribira levaduraoma pan betan trigo tobán pikana iki, ikaxbi ja nete xabáketianra, ja main xoxoa jawékiatibo moa pikin peokana iki.
12 Jainoax peokotaxa moa maná manni jeneta iki, jaskáketianra israelitabaon ja baritian canaán main xoxoai jawékiati jawékibo jawékiakana iki.
Josué betan ja Ibon sontárobaon koshi iká
13 Wetsa nete Jericó ochóma iikinra, Josuénin ja bebomea westíora joni espada tsomaya oinna iki. Jatianra Josuénin ochómakainxon neskáakin yokata iki: —¿Miaki nona iki iamax miaki, non rawíbaona iki? —akin.
14 Jaskáara jonin yoia iki. —Eara tsonamabi iki ea neno joára Ibon sontárobaon koshires iki —akin. Jatianra Josuénin maikibi bekepinon kaman beoxon neskáakin yokata iki: —¿Nokon Ibó, nato min yonotininki mia jawe axonti iki? —akin.
15 Jatianra Ibon sontárobaon koshin yoia iki: —Min sandalia jopéwe, ja mia niainra iresama iki —akin. Jatianra Josuénin ninkáxona iki.