DEUTERONOMIO
Israel jonibo jaskara winotabo yoia
Jaskara ati onanmakin yoia
1
Nato joibora jawebi jain xoxoyamai mananman ikanaitian, jatíbi Israel jonibo Moiséssen jato yoia iki, Jordán paro bari pikotaori iká Arabá ikainxon, ja Suf keiba iká Parán mai, itan ja Tófel mai, jainoax ja Labán, Hazerot itan Dizahab mai iká naxaranxon.2 Ja Horeb ikainoax, Seir mananman iká bain kaax, ja Cades-barnea ikain nokótira chonka westiora nete iki.
3 Ja chosko chonka baritia, moa chonka westiora oxeya iketian, jawen reken netera, Moiséssen israelitabo já meranxon Ibon yoia joibo, jatíbi ja senenhakantibo jato onantiakin yoia iki.
4 Jatianra iká iki basima ja Hesbónhain jaa, amorreobaon apo Sehón, itan Astarot betan Edrei main jato jan ikinai Basán apo Og, Moiséssen jato betan reteanankin jatoaresa.
5 Moab main, Jordán paro bari pikotaiori ikanaitianra, jaskara akantibo Moiséssen jato yoikin peoa iki.
6 “Horebhain iketianra non Ibo Diossen noa neskáakin yoia iki: ‘Nato mananman mato ikára moa basi iki.
7 Maton jawékibo biax, ja amorreobaon manan patax iká jatíbi mai ikainkobo botankanwe: Ja Arabá iká mananman, itan ja teshanpa ikainko, ja paro kexá iká Néguev ikainko, ja cananeobaon mai ikainko jainoax ja Líbano ikainko, ja aniparo Éufrates ikain senen jaai botankanwe.
8 Ja maira en mato menike, moa iboakin biax jain itankanwe, jara maton reken papashoko Abraham, Isaac, Jacob, jaton Ibo ixon jato meninoxon en yoini mai iki’ ”, akin.