2 Ikaxbira Ibon Josué yoia iki: “Enra Jericó jema, jawen apoyabi itan jawen sontároboyabi mia menike min anon ixon.

3 Mato israelita sontárobaonra sokota nete senen, nato jema netetiibi westíoraakin mayati iki.

4 Ja kanchis sacerdotebora, ja senenhabekonti joi jain iká ani bonanti bebon kati iki, westíora carnero machán tii atiabo, jainoax ja kanchis netenra, sacerdotebaon machán xoon akai kaman, kanchis akinribi maton jema mayati iki.

5 Ikaxbi jawetianki wetsaresibiakin, jakonshaman machán xoon akanai maton ninkatai, jatianra jatíbi maton koshianixbi mato saí iti iki, jatianra jan jema chitea chiké ras iti iki. Jatianra mato westíorabo jema ramiai jaakiribainti iki”, akin.

6 Nunman bake Josuéninra sacerdotebo kenaxon jato yoia iki: “Ibon jato betan jaskara ati shinanna joi jain iká ani bonanti moa bokanwe, jainoax kanchis jatíribi matobora, ja noibamisti shinan esé iká ani bonanti bebon carnero machán tii atiabo bokanti iki”, akin.

7 Jainxonra ja jonibo yoia iki: “Moa jema mayai bokanwe. Ja reteananti onan jonibora, Ibon ani bonanti bebon bokanti iki”, akin.

8 Jatíxonbira ja Josuénin yoia keská akana iki. Ja kanchis sacerdotebaonra, ja Ibon ja senenhabekonti aká joi jain iká ani bonanti bebon kakin, kanchis machánribi xoon abainkana iki, jatianra ja ani bonantiaxon chibanbokana iki.

9 Ja reteananti onan jonibora sacerdotebo bebon bokana iki, jatian jan ani bonanti koiranabora, japekáo bokana iki, ja sacerdotebaon machán xoon akin jeneyamakanai kaman.

10 Ikaxbi ja sontarobora, netéshamanax bokanti Josuénin jato yoia iká iki, jatíbi jaton koshianixbi saí iti jato jan yoiai kaman.

11 Josuéninra westíoraakin ja Ibon ani bonantiaxon, jato jema mayamaa iki. Japekáora, jaton carpa peotainko banéribikana iki, jainra yamé tantikana iki.

12 Ja nete xabata kikin yamékirishoko moa Josué weníketianra, sacerdotebaon, Ibon ani bonanti moa iakana iki.

13 Ja kanchis sacerdotebora, Ibon ani bonanti bebon bokana iki, ja boira tsasiamakana iki, itan machán xoon akin jeneyamakana iki. Ja reteananai onan jonibora jato bebon bokana iki, jainoax jatíribibora ja ani bonanti pekáo bokana iki. Ja machánbora xoon iki jeneyamaa iki.

14 Ja rabé iti netenra, jakiribi ja jema mayai bokana iki, jainoaxa jaton carpa peotainko banéribikana iki. Ja sokota nete kamanra jaskákana iki.

15 Ja kanchis nete iti xabataitian wenítaxa, moabi abea keskáakin jema mayai boribakana iki. Ikaxbi ja netera, kanchisi mayákana iki.

16 Jatian kanchis akin, sacerdotebaon moa machán xoon aketianra, Josuénin jonibo neskáa iki: “¡Saii ikanwe! Nato jemara mato Ibon menia iki.

17 Nato jemara moa Ibon jaskáti yoia ikax, jatíbi jawen jayata jawékia keyóti iki. Ikaxbi tsini ainbo Rahabbichoresa, jaweayamakin non jamati iki, onsá ikaitian jawen xobon beax jain ikáboyabi, ja paranaxon ointi jato non raanabo jawen xobonko noa jonexonyantana iketian.

18 Jaskara iketianra mato koiramekanti iki, ja jemamea jawéki maton binaketian itan maton tii anaketian, jara moa Ibon keyónon ixon imaa iki, ikaxbi mato Israelbo yoitimaketianra, maton carpa peotayabi jakonmaatax, mato rabinti iikaresti iki.

19 Ikaxbi ja oro, plata itan jatíbi bronce akana jawékibo itan ja yami jawékibora, Ibona iti iki, jabora jawen kopí jawéki ikainkobiribi ati iki”, akinbo.

20 Jatianra jonibo saí ikaitian machánboribi xoon ika iki. Ja machánbo xoon ikai ninkataxa, israelitabo kikinbiresi koshin saí iki peokokana iki, jatianra ja jema chike ras ika iki. Jaskataitianra jemakiribainxon, ja jonibaon moa iboakin bikana iki.

21 Japekáora, espadanin jato retekana iki, benbobo, ainbobo, bakeranonbo, yosibo jainxon jaton wakabo, carnerobo, burrobo. Jatíbi jabora kikinhakin keyokana iki.

22 Jatianra Josuénin, ja paranaxon mai oinni kayantana rabé neskáa iki: “Katanwe ja tsini ainbaon xobonko, kaxon jain jabé ikáboyabi jato pikotankanwe, ja maton jaskaatibo yoiantana keskáakin”, akin.

23 Jatianra jabo boax jikixon, Rahabyabi jawen papa, jawen tita, jainoax jawen poibo, itan jatíbi jawen rarebobo jato pikokana iki, jaskáaxonra ja Israelbaon carpa peotainko jato imayamakin, jatonbiribi tsonbi jaweatimainko jato imaa iki.

24 Jaskáa pekáoshokobira israelitabaon jatíbi ja jain ikáboyabi ja jema menokana iki. Neskaraboresa bikana iki, oro, plata jainoax bronce itan yami akana jawékibo, jabora ja Ibon jakon jawéki kopí ikainkobiribi akana iki.

25 Ikaxbira Josuénin, ja Rahab betan jawen rarebobores jato jaweayamakin jamaa iki. Jan ja Josuénin Jericó jema ointi raanabo, jato joneyantana iketian. Jainoaxa Rahabnin kaibobo, israelitabo betan jaai peokokana iki.

26 Japekáora Josué Ibo janetaanan neskata iki: “Tsonki jakiribi Jericó jema benáati shinanai, jara Ibo bebon jakonma iti iki. Jaton reken baken yorakibira, jaki chiké koshitibo tsamankanti iki, jainoax jaton chiní baken yorakibira xepótibo nichínkanti iki”, iki.

27 Ibonra Josué akinna iki, jaskatira Josué jatíbiain ja main jakon ninkakaata iki.