2 ja maibo riki Neftalí, Efraín, Manasés, ja aniparo Mediterráneo kaman iká jatíbi Judakan mai,

3 ja Néguev, ja Jordán mai xanken, jainoax ja Jericó mai teshanpa, jaribira xebon niiya jema akanai iki, ja Zoar kamanra oinmaa iki.

4 Jatianra Ibon yoia iki: “Jawen chiní bakebo akonkin meniti ixon en Abraham, Isaac, Jacob yoini mai riki nato. Jain jikitixonmabi, min ointininra ea keena iki”, akin.

5 Jaskataxa, ja Diossen yonoti Moisés, Moab mainkoniax mawata iki, jaskáti moa Diossen yoia keskáshamanra iká iki,

6 jatianra Moab mai teshanpain Bet-peor bekeiba minmeeta iki, jain ikára ramatiankamanbi tsonbi onanyamake.

7 Pacha rabé chonka baritiaya ikaxa mawata iki, ja mawatai kamanra jakonhakin jawen bero betan jawen yora koirana iki.

8 Ja mawata netebo mekéxonkin senenhaira, jain jawebi xoxoyamai Moab manan ikainoax, kimisha chonka nete kaman israelitabaon Moisés winixona iki.

9 Jatianra Josué, ja Nunman baken, Moiséssibakea jaskáaxon jakon ati onan shinan bia iki, ja bimakinra Moiséssen jawen meken Josuékan maponkon aká iki; jaskáaketianra israelitabaon Josué yoiti ixonkana iki, jaskara ati Ibon Moisés yoia keskára akana iki.

10 Jaskara ikenra, wetsa profeta Moisés keská Israelboiba jawetianbi yamaa iki, já betan beibananax Ibo yoyo ikaira tsoabi yamaa iki,

11 Egipto apo jawen joni koshiboyabi, itan jatíbi ja main iká jonibo akin, ja jaskara iosma itan jawéki ratétibo Ibon amaa akai joni Moisés keskára yama iká iki,

12 jatíbi Israel jonibaon jishnonbi, koshi shinanman, ani jawékibo itan jakon jawékibo aká jonira Moisés betan senen tsoabi yama iká iki.